維港驟變鱷魚潭
本地股市最近越升越有，升到阿媽都唔認得，連二五凶數（恆指二萬五千點）因有胡錦濤「九五之尊」照住冇有怕而安然超越。每當睇怕要調整嘅時候卻突然有「爆炸性消息」由國內外傳出令到個市又再顛起嚟。如是者就算個市跟隨外圍作調整，只不過跌千零點就即刻彈翻上嚟，除咗收復地失之外、甚至升突有餘。
（我在寒露運程所預測之本地指數在炒上「三萬」到位與未到位之間，亦即係「二黑五黄」疊見「五黄」之際大有可能來個「亮晶晶」直插水而驗證「二五」凶象……，睇怕「更加希望」22/10跌咗嗰千一點已經驗事完成。）
有老友問我係唔係特登誇大「二五」凶數嚟標榜自己？我答道：「梗唔係啦，貪利是咩！」話雖然係咁講，但內心到底有個疑團在「滴咕」：「明知（二五）凶數唔講得玩，莫非驗在其他地方？」，亦唔知本地個市短期走勢將如何？於是乎索性用「二五」之數再起多支「梅花易」睇睇夠竟係「乜冬冬芫荽葱」。二兌「卦為澤」、五巽「卦為風」，支卦係响「申時」占，卦問：「短期股市走勢」？得卦：「澤風大過變水風井」，即係「澤風大過」變咗第四爻。而間爻卦成「乾為天」。
「早二個月曾經占過支「梅花易」睇恆生指數走勢，得卦「澤火革」變第三爻而成（澤雷隨）卦，間爻則成（天風姤）。用神取（震木）及間卦（巽木）為（財星），加上乾兌金將進氣而有力劈木任財，屬於「穫利卦」而顯示出香港股市仲有排玩，驚嘅只不過係（震木）為用神，肯定個市將會大上大落之間而將一眾散戶手上「貨源」一概震走而矣！」
今勻支卦「澤風大過變水風井」卦嘅「卦體」係「巽卦」（巽為風，其象好似一陣風：來也速時去也速），用神係「坎卦」而「坎水生巽木」，由於間卦係雙乾「乾為天」而金生水，故斷卦：大體上仍然係跟隨早前所占嘅「澤火革」卦而驗事，換句講話講，香港股市有排未玩完，驚嘅只不過係個市隨時隨刻會進一步大上大落而令一眾「投機者」無所適從。
照卦睇，未來幾個月直到明年，香港個股市將明顯升多而跌少（震為四、坎為六，嘻嘻！讀者大可以幻想本地指數有機會炒上「四萬六」）。唯獨「坎卦」含有「陰濕險詐、艱難阻滯」嘅大象，依然維持上頭嗰句「溫馨提示」：小心股市進一步大上大落而將你手上「貨源」震走。
從支卦嘅「卦象」去揣摩：因為係秋占，所以「母旺子相」而子旺（水），看來由「西方和北方」流入之水勢庶難能阻擋。站在香港人立場而言，對此趨勢似乎一則以喜一則以憂，喜者自然係地方再次成為世界金融中心、股市應該還有排可玩。惟憂者係「各路大水」流入嘅資金足夠買起香港有餘，唯獨以目前所謂「香港獨立行政區」其風水配套應有之「獨立性」根本不存在，本地政府管治能力既然有限，又幾多能力去維持地方金融體系之「獨立性」而不受外來之沖擊頓成疑問。特別係各地大鱷雲集於此地揾食，股匯市場風高浪急之下，若有乜差池而危及民生嘅話、曾蔭權必大鑊矣！
由支卦用神係「坎水」而間卦「乾金」生水滔陷不絕，配合「巽卦」卦體，好似一陣風：來也速時去也速。現實嚟睇，來本地股市揾食嘅資金仍然以外國為主，國內為次。
「坎卦」卦象既然有「江湖人物、盜賊」之顯示……肯定來說「世界股壇大鱷」目前均雲集「維多利亞」狹窄之海床內游弋而爭相「做世界」。換言之，「維多利亞海港」依家已經蛻變而成「鱷魚潭」。發展下去本地「股票市場」不排除變質成「股票賭場」，短時間內、至少整個2008年「戊子」本地股市只有「潮高潮低」而唔會「一蹶不振」玩完。（由於有「中華人民共和國」龐大資金作後臺，外來揾食者「咸水鱷」均樂此忘返，就算外資撤走國內資金「淡水鱷」必然隨之填補上而趁低吸納……如果持續係咁長買長升下去，世界自然美好，港人仲使乜做嘢咁辛苦？最怕「群鱷相鬥」而兩敗俱傷一個屈尾十撤走嘅話，香港特區肯定有排苦過「弟弟」）
讀者不可不知「坎卦」所含者有以下各種徵象：子年、子月，北方，利北方交易，江湖人物、盜賊，陰濕險詐、艱難阻滯，提防被暗算、防破財……等等。
形勢發展至此，只要「落咗搭」在股票市場末離開者，就當閣下仲留响「拉斯維加斯」、「蒙地卡羅」、「澳門」……等等「娛樂」勝地而有排未能甩得身。
現在才悟出「二五交加」凶數的道理，由「二萬五千點」起計，指數幾千點上落之間恰似（三國演義）嗰段開場白：滾滾長江東逝水浪花不知淘盡多少股壇「ＸＸ」，除咗「真大鱷」之外，一眾「盲無」包括「鱷魚頭老襯底」之輩目前都係响驚濤駭浪之中生存，賺到嘅「驚風錢」分分鐘末袋好就有機會要嘔番出嚟，甚至「嘔突」，呢一鋪或許死唔去執番身彩，下一鑊可能輪到你。依家恰似人家龍爭虎鬥，你卻夾在中間做〈磨心〉，但願上帝保佑閣下獲得好運！而唔係令你的靈魂獲得安息。(本篇完)
