知驚末？7月昌曲化哂忌
文昌主正統、文曲管偏鋒，天下間所有「吉凶休咎、榮辱禍福」呢一對星曜均有無限之主宰權力，其能量勝過正曜、驗事準過主星。「時空」只要遇上此對星化忌，話之你其中一粒見祿存或化科都無濟於事，啲災難禍事立竿見影話嚟即嚟而屢驗不爽。
點解無啦啦會講起昌曲化忌呢？皆因嚟緊呢個7月咁啱撞到正。嘩！遇上又窮又多災嘅流年，再遭逢雙天至尊無敵化忌降臨，你都咪話唔濕滯，前人所謂：「屋漏兼逢連夜雨」之滋味、末嚐過嘅今勻肯定冇走雞，保證令你有排濕熱兼閉翳！
我不嬲最怕遇上昌曲化忌，事關呢組對星若然連環化忌、最能打亂你已經部署好的思維而令你百般無奈，甚至使你的計劃和夢想完全泡湯而感到無名沮喪。
既然清楚瞭解昌曲之特性，咁就言歸正傳，試起出2009年7月（農曆閏五月）個八字斗數盤，好細味斟酌化忌之驗事：
丙
癸
辛
己
（小暑）
辰
丑
未
丑
盲嘅都識睇係明顯之土厚埋金兼且剋水結構，衰多兩錢重係地支四季土刑沖，咁搞法：火炎土燥天剋地沖，肯定谷爆乾坤而釀起天災人禍。
紫微斗數：「巳酉丑、亥卯未」三方四正「殺破狼」沖照「府相」會昌曲化忌響「父母、田宅」宮
飛星雙五黃疊臨正北，同樣疊二黑病符飛臨正西。
未過年之前，特區雙怪「白頭道長」&「深山大野人」經已驚死嚇你唔死而擘大喉嚨嗌救命，佢哋兩怪一管「文昌」、一管「文曲」，既然救命嗌得咁淒厲，即係擺明兩怪除非具有超人之預知能力，否則必然有嘢做錯咗而先行預警以補鑊。換言之無論係點、都明副其實之「昌曲」化忌。
哈！你咪話雙怪唔係彌賽亞先知再世。踏入牛年真係未嘗好過，或許全球經濟死火早有先兆、畀佢哋預測到並不算奇，但世界「豬流感」隨之而流行佢哋能先知道卻唔到你唔服。
嗱！嚟緊呢個月昌曲併化忌，相信本地股市將緊隨外圍調整而進一步下挫，豬流感也肯定變種肆虐全世界。嘻嘻嘻！本地雙怪？佢哋因「昌曲」一併化忌之緣故，月內無可避免地煩過「梵蒂岡」，預料將被雷曼苦主同埋班議員「追殺」，恐怕求生不得、求死不能，至於雙怪執掌之「財政司」和「金管局」更加獨領風騷而成為社會眾矢之的。
「昌曲」人所共知係主管文化學術之對星，若「化科」、社會自然國泰民安，社會昌明，文風鼎盛而有加。唯獨化忌嘅話，則擺明社會不靖而民不聊生，鼠摸狗盜輩出、烏煙瘴氣充斥……淨睇下今時今日香港之學校、學生，睇怕喊得一句句。莫講靚仔嘞，就係班靚妹已經夠哂人版：啪丸、打劫……無日無之，問你服未！仲有學校呢？一陣又爆出董事局貪污劈炮，一陣又話居民反對開學校……等等，嗰啲仲係碎料，最慘係各間學因豬流感而封校提早放暑假，復課無期。呢！一如上述所講「昌曲併化忌」已經臨門踵至，唉！月內真唔知又再衰邊泛，總之有如俗語所有云：「一命、二運、三風水、四積金錢、五讀書」，讀書本來排收尾而最冇用，遇上昌曲」併化忌唔單止冇用、驚住月內仲大單嘢爆出而驚動社會添！
「昌曲化忌」差啲講漏咗醫療嗰泛，流年文曲本化忌，本地醫療事故、失誤、醜聞……等等已經升上最高級別而成為地方之冠，佢哋個頭頭「周一鱷」，大可以上臺攞「大止驚」勳章。有冇發覺周局長最近肥咗？唔講你哋唔知，原來佢早已終日帶備驚風散和牛皮衣着成套、全副武裝肅立而「聽抦」。
唉！人衰起上嚟多數「福無雙至而禍不單行」，無端端又多咗泛豬流感流行病由正西「美帝國紙老虎」嗰邊傳過嚟（呢勻仲唔係扮豬食老虎乎？嘻嘻嘻！！）。既然流月「昌曲」化忌驗證哀樂，月內講唔埋會有人嗚呼哀哉！若然真箇搞出人命嘅話，你估特區市民仲會唔會咁老定呢？
