《新玄機》雜誌主頁   吳鈞洋師傅其他文章

                                                    文•吳鈞洋

地天泰,春水換日好世界

老人家教落:從業九流,識放識收,切忌去盡,見好回頭。一字記之曰:勤有功戲無益! 

立夏後算準文昌化忌沖起貪狼忌,加上太陽午垣化權對沖天梁纏祿,須知太陽照遠不照近、沐陽暖在外而感天恩!所以偷佢個浮生半月閑,出外視察兼玩玩……唉!到底辛苦命、有福不能享(天同化祿入福德纏羊陀),始終不聽老人言(勤有功戲無益)結果吃虧在眼前。跌傷隻左蹄而結束旅程。 

尋日朝去老友D君間醫館做跌打,咁啱遇見老而不……我睇唔係咁啱,而係條粉腸有心響戍「僕」我贈興,一見我嚟到即係鬆毛鬆翼、似十足射雕裡面周伯通個頑童樣:「乜咁錯蕩呀,吳老而不……嘻嘻!隻腳咁得意嘅,究竟搞邊科?」。我藐咗佢一眼笑罵道:「咪得戚!今日吾腳遭不幸,他朝君足也相同……哈哈!」各人聞言齊笑!老而不笑着接話:「正東五黃和正南二黑重疊夾東南巽宮六乾,係正宗:二五交加夾金星。六乾係刀鋒之金,受煞氣相夾,刀光血影已浮泛其間……你自己寫架,加上文昌化忌……你睇:教育司長孫明揚腎衰竭,前喇沙校長歸天,大師吳鈞洋……嘻嘻! 傷了小小腳。」話音甫落、惹來笑聲更大,條粉腸繼續:「你哋唔知咋,吳老不失蹤了十多天、猶其接近六四,都咪話唔得人驚!弊在佢個真名叫吳艾文,當中個艾字最惹(火),講明架,遲多兩日再不見吳老蒲頭,我實行組織遊行,去中聯辦攞人……要求釋放兩艾,哎喲、哎哎喲……哈哈哈!」 

係咁畀條粉腸潤咗半粒鐘有多。無可無奈何、唯有暗中運炁,將個忍字發揮到淋漓盡致,雖然頂心頂肺、但也可以罩住「煞氣」。 

還是D君知情識趣將說話叉開,免得我下不了檯發起爛渣:「咪哎哎聲、哎到我班客走埋!不如講下下屆特首咧,雙英伴泰得個嬲,你哋估邊個係真命天子?好似話中途殺入個白頭佬添!」,我略為舒咗談煩氣答道:「兩個男人俱為港英餘孽,一個要振興英國、一個想英國萬年…… 至於白頭佬,一早已被我批死佢道觀終老。唯有范徐麗泰靠個泰字得米,斷估係佢喇!」,D君聞後搲頭不解:「呢位阿姐冇咗半邊腎、同埋獨乳……」話還未說完已經引來笑聲,猶其老而不最兀突:「你條友,獨臂、獨眼、獨腳……都大有名人在、更加上戲賣座,虧你想到獨乳、獨腎!唔……陰陽調順,水(腎)雨(乳)交融、而得(地天泰)卦……」 

我笑着接話:「確信今後香港特區政府任何施政都不能有效執行、舉凡政府有政策推行、民間必有反對聲音,原因在於白虎地坐大而主島被削權的風水效應延展。風水不均衡影響及、執政者往往庸碌無能、外來干擾勢力也相應壯大(猶其來自美英白虎地別有用心的滋擾行動)。如果提早結束特區自治、政經決策全權由中央主導、反而合乎:(北座權管南向、南臣面北朝聖)的風水現狀局面。若然謹遵既定遺訓維持香港特區自治五十年不變、而中央又放手不干涉政事的話、政經中心繼續保留在(港島)肯定弊多利少,眼見失卻均衡的風水,影響所及,特區政府勢必淪為(跛腳鴨)政權……上面說話係我在(樞府大嶼山倚傍天壇佛)一文中提及過。唯一可以制得住煞嘅,係用白虎制白虎以收(以夷制夷)功效,另外、用地天泰卦鎮壓,或者會有事半功倍效用。仲有,嗱!呢點最重要,須知目前八運戊土司權,剋水有餘。中國南水北調運作中汲水已經冇咁容易,加上呢幾年春夏中國南北方氣候極其反常:北方大風沙而西南鬧大旱,明確顯示出旺土制水之機兆:物旱而生赤火,火烈沖水而成(火水未濟)卦,大象:〈泰者、地天泰卦。坤在上乾在下,如魚見清水、如地沐甘霖,其快無比也。(春水換日)而成泰字,泰以水成卦……你話泰者若非凸首(凹下)揾鬼做……  

說話又一次引來笑聲,連送外賣嘅阿嬸也笑到咭咭聲,特別老而不指住我笑罵:「人哋話風水佬咸濕,諗落係真……」,「唔係噃、老而不,人家話世間文人最壞蛋至係真,你睇下……幾拾年前老毛已經鬧你哋係臭老九,全部打成右派關入牛棚!」我未等佢講完已急不及待一句塞回去:「風水本身就係講陰陽,乜係陰陽?男女相親相愛咪係囉!點謂之親愛呀?嗱……」講到呢戍我自己也笑到「皇上無話兒」咁不能接續落去。 

呢個時候有位四眼佬、個樣十足「八両金」加入話題:「一味話大陸問題食品氾濫,連調味品也成重災區,民眾避無可避,早輪廣州、江門近期分別查獲製假工場,繳獲假冒的家樂牌濃縮雞汁、美極鮮醬油、李派林喼汁等等,奸商以工業鹽、色素、糖精等原料,並以成分不明的濃縮液加水炮製冒牌豉油、假藥、假香水、假洗衣粉等,堪稱五花八門……想不到依家臺灣更叻,偽劣產品也不甘落人後啊!」,我聽聞之後極之感觸:「明年二五交加夾五黄巽宮,受煞氣相夾,天災人禍、刀光血影已浮泛其間….加上流年武曲化忌唔講得笑……肯定成個東南亞將輪流發生大鑊嘢!」 

「吳老而不講得啱……今年更加係辛亥革命一百周年,佢一早響年初篇(兩儀清晰,四象分明)文章寫過,超級月亮將引發大災難,因為、月亮五行屬水、專擇太陽帝國發射喇!架仔不嬲話自己係太陽子民,仲有佢哋枝國旗根本就係太陽旗!同時臺灣,佢枝青天白日旗咁啱亦有一百周年囉!希望呢個月同明年五黃飛東南冇佢份啦……」老而不感嘆地說:「聽講,台灣今趟所爆毒食塑化劑DEHP(鄰苯二甲酸二酯)毒性比毒奶粉內嘅三聚氰胺更毒20倍,即係一個人喝一杯500cc落咗DEHP嘅飲品,就已經超過單日食量上限。你知呢味毒藥損害人體邊部分嘛?特別男人生殖部分……」,D君緊張地追問:「咁對機能有冇直接影響?」,我笑笑口問番佢:「你想問外面抑或內部先?」,答:「梗係外面多啲啦!」,我微笑作答:「咁你定啦!起頭不難、唯獨質量欠佳……嘻嘻!」 

    我眤咗老而不一眼、彼此內心發出微笑,獨見D君搲頭搲腦。 (本篇完)

 

吳鈞洋網址:www.ngkwunyeung.com.hk

吳鈞洋電子郵箱:raymondnghk@yahoo.com.hk

 

WB01343_.gif      回首頁     WB01345_.gif (616 bytes)