擇偶以老竇作模式
國內土豪慕名到訪算命，批完自己之後再遞上一命求算。我開出命盤一看、情不自禁睥睨了對方一眼。「咪誤會呀大師，條命係我親生女兒黎架！」土豪笑騎騎道。「你唔講真有D誤會，哈哈！」我瞇著眼點頭回他：「壬水生酉月本來恰似(平湖秋月) 寧靜而有氣質。奈何四柱金多水旺而掀起滔天巨浪，正是(獨水三犯庚辛、號曰體全之象) 格成潤下，其人艷麗兼精叻然則要求獨特敢愛敢恨……」對方聞言後先是點頭稱是、隨即搖頭嘆息：「唔係我誇口，個衰女真係叻到加零一，只不過任性非常，成日俾佢激奀，唉！」
我也點頭對佢之說話表示認同：「冇錯！八字金多生水，首先出世後後臺強極、家底豐厚，其次係阿媽多……呵呵！」土豪聞說話頗為自豪回道：「男兒在世若無三妻四妾直情枉作為人，更何況好多靚女都話我男人味充沛……」，我聽佢講完差D作嘔出醜，好彩忍得住更加眛住良心說話：「事實上你外表對異性極之討好，接觸仲有抗拒不得的親切感！」，聽過我恭維說話條友直情鬆毛鬆翼，我繼續道：「講番令愛條命，紫微斗數紫微化科貪狼對火星祿存，是(火貪格)終身富貴而財用之不盡，同時命賦才藝技能。」不待我說完，土豪即搶話：「就係咁至令我頭痛！你話人若生得醜又蠢笨做父母既自然唔會要求高，但似佢條件咁好卻……」，至此又輪到我搶話：「哈哈！令愛是否喜歡成熟型男仕？」，土豪答道：「何止喜歡成熟型，直情鍾意同我年齡相若之老人家！」
情形盡在意料中。於是對土豪恭維道：「你邊算老呀、何況咁有型分分鐘引死女仔……拿！你也許不知，令愛斗數擇偶條件根本以你作模式。」說話令土豪慌了手腳：「唔係馬大師，如果係真咁就咸吉杬囉！」我搖頭答道：「你睇佢父母宮三方四正；巨門會照午垣太陽，奪盡申垣太陰月光仲化埋忌添！還有呀，父母宮巨門纏天壽。」土豪問：「即係點？」答佢：「即係佢(親愛的)要看父母宮父系巨門照太陽……條件和你不相伯仲：年紀雖然大多少唯獨高富帥、有老婆多女人。你睇佢交友宮天機祿太陰忌同宮，一世同人爭老公……」
土豪聽到呢戍當堂面青，剛才自豪既威樣經已蕩然無存。 (本篇完)
