文•吳鈞洋 
董建華變了面？
〔玄學雜錦之一〕
最近因為董伯伯獲高票當選連任，為咗切身利益和香港幾佰萬人未來五年福祉著想，所以落足眼神睇真下佢個相。(九七年也曾經留神睇過，得到答案係做財主佢個相突出有餘，當官卻未成氣候)隔了五年再翻睇，發覺董伯伯個相真係變得好交關。首先佢條頸粗咗形成後枕肉奇厚，個頭順勢短緊多少十足「豹子頭」。以前雙眼都算幾大，但依家矇咗仲有少許突突地添。最明顯係個鼻同埋雙顴變得犀利，前者鼻翼賁張怒開，兩旁顴位豐厚直迫眼肚，而眼肚更極奇脹卜卜。
九七年時的董伯伯
今日的董伯伯
可以話，董伯伯個相已經由一位慈祥老人樣貌改變成有威嚴�H官家相格，甚至有多少似軍佬添！有人會覺得董伯伯個樣惡鬼咗好多，猶其係小朋友仲驚驚地佢。呢個極之好的現象，做官如果冇個官樣，點會話得事擔得起枝大旗呀！試睇下以前鄧伯伯就係個相已經信得佢能夠安邦定國(佢私底下對的小朋友卻極為慈祥)，現在睇睇下董伯伯雖然身形高大好多，但有的似似地鄧老爺子生前。
先旨聲明我唔係擦董生皮鞋(我地無文化的九流術士擦咗鞋亦搵不到著數)，單就佢個相睇，我個人幾看好未來幾年香港運程，起碼我地個頭頭外形有咗威勢，加上添緊的的殺氣，做起事來可以攬得起權鎮得住班手下(以往就係因為佢太慈祥領過唔少嘢)。等如打工仔，如果老細個相唔惦當都幾難有好運行！
水火不濟人必黐線
〔玄學雜錦之二〕
最近城中熱門話題又係神童輝，聽聞話「神經系統短路」黐咗線，真黐抑話假黐難求驗證。有朋友問我玄學觀點如何睇法？我認為係佢雙眼累事。真人我未見過，但佢副尊容連阿婆都認識，皆因日日見報出名過江澤民同董建華。猶其係對燈籠仔似的突眼，響報紙檔零啥搶鏡。
眼屬火，受神經中樞管。火燃燒勢必向上，水流動自然下走。木主神經，下受水滋潤根基則炎上通明，故腎納水心萌火。假若腎水不足心火必盛，火水不濟管神經之木自然受損。
今年壬午，水弱而火盛，正月壬午地支寅午會火局，水虛耗被蒸乾。人如果腎水不足養不成木必被燥烈火焚飈，俗稱：乾柴烈火係最佳形容，用於無色不歡之神童身上更加貼切。試睇此君眼突而神散渙，明顯係上述五行病態逢致命年月，點會避得過呢一刼呢？！(若然末發過還好地地，發過則衰多幾錢重！)
再算下佢個姓名：「羅兆輝」，個姓拆開是四維。乜叫四維？是禮，義，亷，恥也！其名兆輝，即係幾拾億火炎。本來個姓名好到加零一，四維不離火(因火主文明，有文明才有四維)，熊熊烈火去生四維，若然水力不濟，木燥自焚的話，烈火就變質成祝融，不是生四維而係燒去(四維)，咁就慘矣！一來四維點火頭惹事端，二來將文明之：「禮，義，亷，恥」燒到變形變質成了：無禮，不義，不知亷恥！不排除神經有問題！
中間女人衰哂
〔玄學雜錦之三〕
由於中國加入世貿，班外國佬一窩蜂湧入國內想飲頭啖湯。但好多人生路不熟，要盲公竹，所以造就香港中旅發達。有股票界老友叫我買呢隻股票，話保證數年內賺幾個開云！提到香港中旅令我記番起一單舊風水案例。
話說1999年己卯，中旅某高層老友請我到尖沙嘴北京道口分社其辦公室作指點，因為份屬老友自然食餐飯算數。該分社向彌敦道，是卯酉坐向，而內局職員辦公接待客人counter沿東南到西北曲尺形排列。(我要寫的不是風水佈局，在此略過如何擺設)該年流年五黃飛到南方離宮，在卦理東南巽是長女，離是中女，流年煞星到離自然不利中女。故此我當時對老友說：今年貴公司上下均不利，丟官失位官司意外層出不窮，鬼叫你間公司叫中旅咩，「中旅」和「中女」不論普通話廣東話都同發音應卦。特別衰：最高層個幾個，中層女性和居南座位前面女職員。更何況貴公司上環總部也是坐南向北，山管人丁水管財，煞星到坐必有人事大變動。
言猶過耳，據老友回報應數事件：該年香港中旅集團董事長朱悅寧被調回北京改由車書劍接替，外賓部女主管去職，連同尖沙嘴南方counter前排個女職員也入醫院做大手術。唉！真係好的唔靈衰
的靈哂數！
(本篇完)
吳鈞洋網址：www.ngkwunyeung.com.hk
吳鈞洋電子郵箱：[email protected]
回首頁
