得失不由人，禍福天註定
1.財多身弱、因財引「鬼」
早幾日有位師奶上嚟「睇流年」，喊苦喊忽話今年自從股票賺咗大錢之後未曾好過，一連串「厄運」接踵而來，特別係學生放暑假之後、啲衰嘢一單接一單發生而未停過，計開：先係個老公上大陸包二奶，咪話同自己行一次半次「周公之禮」、甚至連屋企都少返。跟住立秋冇幾耐個老豆又好哋哋因「中風」而拜拜走埋。話都冇人信最近自己又照出生「乳癌」，好彩係第一期。
聽佢講得咁「牙煙」，於是乎為佢起個命盤𥄫清楚……，誰知不看猶可、一看直情暗地裡「嗌救命」，原來呢位師奶所擁有嘅係一條「因財引鬼」命：辛卯日柱生丁亥月，全會木局而乙木透天干，除咗只得一點辛金透干幫身之外，全盤地支欠金缺土，擺明係「財多殺旺卻身弱」之命格。呢種命格嘅人唯一可行之運程只有「庚、申、酉」金幫身，「丙、巳」陽火調候，其餘五行一概列入「地雷炸彈」之衰運（土運：土厚埋鐵，木運：木旺傷鐵，水運：傷官見官，陰火運：鬼旺熔金）。
唉！時也命也，好衰唔衰佢依家剛啱行入卯木運，命中五行已經全盤木局兼且乙木透天干、復行卯木「刃」運，啲木旺極有如叢林，連埋「日元」只有嗰兩點之弱金想話同木鬥過嘅話，即如用「刀仔鋸大樹」肯定鋸崩刀。再加上月柱「丁亥」今年犯正太歲，若然破筆大財還可以擋緊多少災。弊在股票賺咗大錢呢，必然「因財引鬼」而惹禍上身！事關佢條命嘅五行以木睇財、以「丁火」睇老公（亦即官鬼），木旺生「丁火」非但不能調候反而無情相剋弱金（若見丙火又唔同，除咗能調候之外，兩點辛金見丙因爭合而合不成只論調候不論相剋）。
有時橫財呢尾嘢唔係人人受得起，許多時行起衰運時失驚無神發咗筆橫財末必係好事，講唔定發過之後、連串衰運必隨之而來。
2.空劫夾祿、照單全收
印象中記得早幾年曾經在《新玄機》寫過一單斗數關乎「空劫夾祿」個案。點解會觸起呢單記憶條筋呢？原因係前排有位在大陸做地產嘅熟客響大陸打電話嚟「嗌救命」，話因借貸出咗問題遭地方政府封哂啲樓而不准買賣。
條友目前行緊「機月同梁」嘅運限，幾靚架！天機太陰坐申垣守命，天機雙化權會天同雙化祿響財帛，身宮太陽午垣入妻宮會照福德戌垣巨門纏天壽，昌曲三方四正而文昌雙化科。天機化權主有計兼夾穩定，天同化祿主中年過後豬籠入水，打孖嚟更應驗。
弊在今年佢流年命宮坐天相亥垣（大運田宅宮），左右被刑忌相夾，而遷移宮巳垣武破纏雙祿存、雙文昌化科（原命田宅宮）左右被空劫相夾，會照流年福德丑垣廉貞雙忌七殺（大運交友）……事情發展落去聽佢講、話搞到要執笠破產咁交關。
當時我仔細睇清楚咗條友個流年盤後，大膽答佢：「冇有怕！過咗中秋事情肯定會有好轉機」。結果昨日（農曆八月十七）天文臺話個月最圓嗰日佢親自上嚟敝館奉上利是一封作答謝，話全部濕滯嘢真係搞掂哂！仲問我當時響佢「想跳樓」嗰陣點解我咁有信心斷佢過倒骨？因為條友都識多少斗數，於是我再一次答佢：「你唔記得你遷移宮巳垣武破纏雙祿存及雙文昌化科嗱！仲有流年未垣天府守財帛，今年丁年天干、巨門化忌、天梁既然夾得天相，午垣太陽有祿及太陰化祿、日月一樣可以夾得天府財帛架！遷移宮空劫夾祿嗻，文昌化科冇被夾格，（逢相看府）咪由得佢夾過嚟天相度（照單全收）囉！須知道九月（重陽）庚戌天府化科，太陽化祿而庚祿在申、又多咗兩個祿夾流年財帛宮，（逢府又看相），真係未驚過呀！」佢聽後至此才恍然大悟，再次謝過而離去。(本篇完)
