逢六沖，又有大禍臨廣東
一年容易過轉眼到中秋，幾個老友又循例碰頭，一如A君所說的「開政治局會議」。到達酒樓入座之後慣例又係A君先開腔打開話閘，他這次是先向歡喜寃家C君爆石：「老C，你有冇睇無線《搜神榜、》，奇怪柳毅點會榜上有名？」「邊個柳毅呀？係唔係羅家寶首本名曲《柳毅傳書》中唱龍女三娘時連含六嘢、嗰個柳毅呀?」C君摸着頭騎騎笑問，「邊有隻粵曲有咁多個（含）字呀？」陳君瞇着眼疑惑。「有架，我唱俾你聽，嗱，聽住嘞、係柳毅唱：席間龍呀女三娘，佢仲含含含含含……」A君得意地答道並唱出了（柳毅傳書）中一段，「乜個龍女（含）咁耐架？」B君不經意地打叉爆出了一句，惹來哄堂大笑。「老B，斷估你個外省佬唔識聽粵曲，人家粵曲係要哦番咁耐嘛！」A君不滿B君驟亂歌柄，「係啦！唔好意思、算我錯，請繼續」B君微笑道歉，「含含含含含……情，將酒呀献……」A君唱畢大家撫掌叫好。「唉！柳毅全輸，就係無線呢出打壞戲、搞到個市跌破萬九……」D君吚吚哦哦而搖着頭太息着，「超！賭仔姓賴！」陳君忍不住笑笑口對他說「你唔記得自己去年初豪言壯語預測過（預咗今年要食谷種咩！）」，D君搖搖頭無言以對。這時C君又眼定定望住我欲言又止，「眼超超望乜呀、細路！係晤係身痕欠打？」我笑逗着C君，「我今勻都落咗疊，想知道後市點睇？」對方向D君打個眼色一齊央我作答，哪邊廂陳君也幫着腔：「講起上嚟我都好想知道下啲玄機？」，我微笑着掏出筆邊寫邊道：「（澤火革）離下初爻往上數三，變卦（震）而成（澤雷隨）……間爻則成（天風姤）。此卦（兌金）為卦體用神取（震木）及間卦（巽木）為（財星），加上乾兌金在立秋後進氣而有力劈木……嗱！記唔記得去年中我哋聚首時集眾人智慧起出此卦，係由B君口占〈23〉而得，A君還高唱賭仔自嘆以附和，一切都紀錄在我2007年《恒指有望創新高，豬公此劫恐難逃》文章中，文中也指出：此卦（震卦）財星為用神，無可避免地未來本地股市的波幅肯定進一步擴大，分分鐘瞬雷不及掩耳地將投資者手中貨源一概（震走），跌至幾近谷底先至反彈。如是者幾上幾落而完成（牛市）末期之過程，個市先至宣告壽終正寢……計計數2008年庚申、辛酉立秋、中秋兩個月乾兌全金司權，木入金鄉必被劈個粉身碎骨，睇怕末來個股市縱使非正式宣告壽終正寢，也只有反彈之餘勢而難有上升之動力。換言之，一眾芬佬已離場，恆生指數極難再舞上23000點樓上矣！」B君聞後乾笑了幾聲：「即係話個市係咁先啦？」，我無奈答道：「相去不遠矣！」。A君道：「老B，你份人咁穩陣，唔會輸入肉嘛？」B君答：「咁就冇，還執咗一身彩添……」「你個Lao B睇幾時班齊馬去擦你餐勁嘅！」陳君笑着搶答：「佢條友仔睇見（中移動）跌得咁殘，走去銀行贖回份掛鈎基金而買入，結果前者升番上嚟、後者因贖回而執番身彩唔使跟人上街遊行……吃吃吃！」「喂！真架，我遲吓特地為此擺番幾圍，專揀啲貴夾唔飽益大家」。
忽然間C君手機響起，但見他面色凝重地走開聽，大家正覺得奇怪之際，老B搖頭開腔：「佢老婆打落嚟嘅，咪又係關乎個仔飲咗毒奶……唉！共產黨呀、共產黨……」，「老吳口頭禪（單單新鮮鑊鑊甘），嘩！你咪話唔得人驚，上頭幾乎冇邊樣嘢係令人安心食用……」A君嘆道：「你溫家寶每次有起事上嚟都走出來鞠躬認錯、甚至流幾滴馬尿，開始還博得大眾推崇愛民如子，唯獨係咁單單新鮮鑊鑊甘嘅話，試得多就唔靈矣！」對此我深表認同：「與其中央開明清廉而地方官商勾結貪污瀆職，點解唔索性嚟一次大整肅呢？」「你舖話法呀，你話就做嗱！要知道君子坦蕩蕩小人長戚戚，因為後者夠長所以關係網絡特別廣亦更錯綜複雜，上一手經營咗幾多年至交權給你胡錦濤呀？別的地方不要說，單一廣東省就保證你中央咬唔入！」陳君侃侃侃而談，講到肉緊處竟然流出口水，可見得其人何等愛國。「老吳，想問下你、毒奶事件明年還會發展下去？嘻嘻！又或再有單單新鮮鑊鑊甘？」A君笑問道，這時C君剛好聽完電話回座，我先向A君打個眼色，接着學C君剛才望着我的眼神回望他表示關心，「孩子真的驗出了生石，醫生正在跟進中……」C君無奈地答道而眼睛顯得有些發紅，但仍向各人點頭表示謝意。「明年己丑，丑沖未（牛羊之沖），現實之中係太歲沖廣州市（五羊城），唔單止丑未沖、中間仲有個五黃夾住……」「點有五黃呀，老吳，有冇計錯數？」B君數着手指問，「唔使數啦！五羊城嘅五字唔計數咩？」我答道，B君點頭稱是：「咦？2003年沙士到咗明年大大話話又六年矣，喂，吳大師，咁算唔算逢六一沖呀？」我輕輕拍掌讚道：「一世人最叻今次嘞！03癸末干支，09己未正宗係天剋地沖……」，「係唔係逢羊必沖先？」C君陰陰嘴笑望B君因後者姓楊，「何止沖老B，連我都沖，你唔記得我名字中也有個洋咩！唉，先蕩木子後翻江……」，「有何玄機」眾人七嘴八舌問，答道：「即係話木子、江河汪洋都有難……」「你死嘞！響戍咒國家領導人，因住拉你去B！」A君用手作槍指着我，「驚就唔出聲啦！話之佢媽我個B抑或拉我去B呀，總之明年廣東省必大卵鑊、事關佢省會廣州市犯正大煞也，假若班貪官冇事而大步檻過嘅話，肯定老百姓遭殃……講唔定仲大鑊過非典！」，「張廣寧條粉腸都好事多為矣！」C君咬牙切齒：「老吳，咪以為淨係你領嘢，我都俾倉邊路（公證處）嗰班陷家LING玩殘，試過去《南方都市報》投訴卻不受理！」「超！你又唔試下去《香港大公報》報料，嘻嘻……」A君乘機用說話諦佢 ，「（公證處）又衰邊泛？」B君問，C君指指我答道：「同佢差唔多，又係公證員收賄帶人返鄉下辦證」，我聽後不禁拍檯：「步履摩！公證處都好事多為……作為後臺嘅張廣寧睇你點衰……」，大家不約而同笑問：「乜叫步履摩？」我聞後也忍 悛不住答道：「步履摩咪即係慢慢行咧……哈哈哈！」，大家聞後一齊爆笑。
「老吳，點睇美國大選？」陳君問，「黑鬼勝算高好多，除非佢俾剛才老A枝槍B咗、否則贏硬。」我答道，「何以見得呢？」陳君木着嘴追問，「哈哈！都係從衰廣州市嘅（己丑剋癸未）之捉機」，這時輪到B君開腔（他剛入完廁所）：「咁都得！準繩度高嘛？」，「你有冇洗手架？」A君打趣問道，後者將手掩向他口鼻：「你嗅嗅香否？嘿嘿嘿！」「唔……正衰人嚟嘅！」A君急忙將頭避開，大家看後不禁又大笑一餐。「咪嘈喧巴閉，先聽老吳解卦！」陳君高聲嚷道，看到大家安靜了下來，我於是扮扮嘢作作數手指狀、再呷啖水接續先前話題：「天干己土剋癸水，即係（二黑土剋一白水），地支丑未（土相沖）而土越沖越旺……嗱！你哋話（黑鬼）係咪贏面大？」，「係噃！二黑土剋一白水，不論物質數理都係黑嘅着數……」各人聞後不禁點頭稱是。
這時候侍應開始上菜，大家說話也到此為止。(本篇完)
