吳鈞洋師傅其他文章

                                                    文•吳鈞洋

 

折乜墮!教人燒錢禳災禍

                                         

     

    人總有三衰六旺,倘若行值逆運樣樣唔順嗰陣,又或好哋哋忽然遭遇上奇災橫禍嘅時候,信得過冇幾多人能夠冷靜對事、泰然處之而認命。

    大多數人(包括自己在內),大禍臨頭之際、莫不臨急抱彿腳地跪叩以求佛祖保佑、又或者超虔誠地祈禱主耶穌打救……至於不惜奉献巨款畀術士「作法」消災禳禍者,更大有人在、否則呢行點會歴數千年不衰。

    五行有一種匪夷所思之徵驗係:「有失必有得」,點解釋呢?意思即係話,命運克應有價講,並唔係一面倒地誅死你。換言之,只要閣下肯付出代價,乾坤大挪移「逢凶化吉、遇難呈祥」之交易、上天絕對不會賴帳,最直接簡單方法係付款以禳災,亦即係:破財擋災是也。除非認真衰到貼地而另有克應,普遍來說、凡人破咗一筆大財之後,可以為自己及家人擋去或減輕:病傷、意外、官司……等等,有鑑及此,不少人因此樂意平白地捐出大筆錢做善事以求改運。

    有人反駁:「一命二運,既然註定咗,個天點可以徇私架?唔怕天庭廉記咩!」,哈哈!你嗰鋪話法一定要戒,你唔知盤「天數」係自然而然存在、稱之謂「貞元」乎?

    所謂「貞元」即係:「皇極天數」,泛指得益者其祖宗餘福未享盡,又或積陰德在前所致。

   例如:某人行緊好運之際而遭逢大劫而身亡,上天係有賠償嘅!到時到候一定將上述某人未享受到之福氣、全數歸還畀佢兒孫後代某一房(至於邊一代及哪一房就無從稽考矣!又或者某人一生積善:修橋整路、賬災扶貧……等等,唯獨其積德行善善舉卻未曾穫得上天回報,故此亦係要隔幾世先至益到兒孫嘅兒孫。

    來得急之現眼報嘅只有一種,講來講去就係上面所講之:只要閣下願意肯付出代價,乾坤大挪移之改運交易絕對不會賴帳,最直接簡單方法係付款以禳災,亦即係:破財擋災是也。話得說回頭,並唔係咩嘢都可以破大財而擋哂災,假若閣下或屋企至親生癌(已經擴散開),又或者所犯之官司極難開脫……等等,破咗大財只可以減輕而不可以化哂,例如:生癌得以長多一年半載命、仲有係死時冇咁辛苦,又如官司或許可以判少幾籠……

   或者有人仍然唔多明,希望詳細啲解釋。嗱!咁就留心聽嘞:五行的生剋制化配套入人嘅生日常生活及倫理關係後,係一種「高深哲學」,例如:以男仕來說,我自己屬「金」,咁木係我之妻財,土係我父母和擁有物業,水係我嘅思想和老婆外家人口,火係我事業和子女……其他「木、水、火、土」五行一樣循上述例子之生剋制化而配套入,知道六親關係之後,大體消災禳禍可以循以下途徑而行:

    1).假若行值剋父母剋妻運,可以破大財或廣置物業,寧願負資產也要頂硬上,2).剋子可以過契過繼養育於外,3).健康多疾宜節食減肉及減慾(折福增壽),4).開刀傷殘可延壽元(破相延年),5).離鄉別井可減災(磁場效應),6).異族通婚或硬配雙方可以白頭終老……等等。這是因循命運五行喜忌,以人為方法趨吉避凶,屬於改運方法之一種。有時候非人為地刻意改運,惟突發意外導致破大財,惹官司、犯傷險、刑剋親人……等等,經歷咗切身痛楚之後,往往意想不到地使你渡過更大之災難。呢啲正係「貞元」驅使,上蒼刻意與你作出之一種「交易」,一如俗說所云:塞翁失馬正焉知非福。

   既然只要閣下願意肯付出代價,乾坤大挪移之改運交易絕對不會賴帳,最直接簡單方法係付款以禳災,亦即係:破財擋災是也……你話搵錢就難嗻,破財係人都識得做啦!如是者又何須勞動「術士」之手做法事呢?唔通請「術士」使多筆錢收效快啲、靈啲啩,哈哈哈!難怪嗰個風水名人,咁乜風光啦!   

   說到風水名人,聽聞佢教人擺風水消災禳禍嘅方法笑X死,教人響家居放屎放尿放衛生巾,仲有燒銀紙、唔過千蚊一張冇料到咁話……嘩!如此污穢不堪兼夾折墮行徑,算唔算邪術我唔知、也不想評論,至少在下唔相信、更加唔敢試(容乜易試咗學阿甜甜姐嘅結局呀!),我平時對顧客嘅溫馨口頭禪提示還是那句說話:最直接簡單消災禳禍方法係做善事和賑災,亦即係驗證:破財係擋災的實踐是檢驗真理的唯一標準(本篇完) 

 

 

吳鈞洋網址:www.ngkwunyeung.com.hk

吳鈞洋電子郵箱:raymondnghk@yahoo.com.hk

 

WB01343_.gif      回首頁     WB01345_.gif (616 bytes)