如夢中，騎上虎背笑東風？
為咗响應「東亞病夫」運動會12月舉行，最近我哋一班名副其實嘅病夫密密在假日鍛鍊體魄，一如老而不話齋：「仁者樂山，智者樂水」，我哋研究過自問都係「仁者」占多數，所以選擇咗遠足行山為樂事。
呢日係星期天，我哋一行七人又進行「仁者」運動，今勻行嘅係石梨貝水塘、亦即係俗稱「馬騮山」，行程由明愛醫院側邊南華中學對開上山，登上程翔道跟住福德祠而再攀上大埔道……雖然唔使一個鐘可以行畢全程，唯獨一路上大家均「啞口無言」，因為想開口也乏氣出聲……挨到山上問乜都曉，係喘氣嘄嘄聲之「曉」也！
休息咗一陣，還是老而不回氣回得快：「仁者樂山未必時時係樂事！」，C君超咗佢一眼笑道：「我哋不嬲都咁仁，唔似得你時不時麻木不仁噃！」，「你想講乜呀！」老而不佯裝怒狀瞪着對方，忽然間笑起來唱道：「五指山上英雄多，英雄們為人民立大功……」，老B冷冷地回了一句：「原來老而不發起愛國情懷，想起五指山革命娘子軍班靚女……」說話引來一陣開懷笑聲、令人短暫忘記咗疲累。
哪邊廂，經紀陳正和行家D君悄悄話：「有冇發覺最近各行各業都異常淡靜？」，答：「使乜講！正行淡靜仲情有可原，連省港澳黃業都嗌哂救命……你話死唔死！」。講到呢戍A君插口道：「呢啲咁嘅時勢，人工勁減而樓價暴升，人人都冇安全感，唔怪得新婚夫婦寧養狗仔而不造人仔……哈哈！」，C君搖搖頭接着呻道：「因為人仔而害死人仔……」，「想噏乜？」經紀陳問道：「莫非又因令公子引起感觸乎？」，C君苦笑咗幾聲：「個仔好番好多矣！之不過感觸上面社會冇哂社會良知同埋倫理觀念……難道人仔真係大於一切咩？！」，我加把口答道：「哎喲你舖話法呀！歌仔有得唱喇，有乜嘢令我心花怒放？錢……」，老而不忽然打叉：「喂！吳某人，你好嘢，你在11月風水預測中寫咩：呢個月五黃入中宮，釀災地域自然以亞洲為主，又以中東地區及印尼、巴基斯坦、中國大陸……最多最頻密。下半月當小雪過後，陰精漓漫而覆天蓋地，步入大雪其八字火虛缺木……天地陰陽怪氣一片，黎明前的黑暗持續，非過渡至臘月小寒二陽進氣，鄧小平之改革開放仍然未能取替毛澤東的嚴寒歲月。另一方面，由於大雪五黃、二黑進氣犯西北而會聚激起〈白虎、玄武〉地域之煞氣，整個歐洲及美國將要面對更多自然和人為災難侵襲，至於經濟體新一輪的金融海嘯也隨之再度爆發餘波……。今次杜拜單嘢畀你恨倒喇，好有滿足感咧！」，我還未答話、老B已經沖着我操住半咸淡上海話附和說道：「燶可嘢……Lao Wu，真佩服燶寫：自稱天下第一大國之總統……初到中國貴境即刻開口夾着脷，咁多嘢好講唔講而咒人家燶，神兆機動影響所及、唔執勢勢係假。上海畀佢係咁一咒，睇怕將來有排衰，至低限度去親嗰戍投機嘅人炒乜燶乜係意料中事…… 唉喲！一語成讖，現在何止上海呀，全世界都炒燶啊……」，「佢嗰把不嬲係烏鴉口，唔怪得廣州班官員話佢係反革命分子……」老而不插咀：「依家好喇！美國佬話你係恐怖分子，廣州市更評你為反革命分子……以後邊都唔使去喇，哈哈！」，我反脣相稽道：「物極必反，我響兩個極端世界成為極端分子，豈不曠古絕今而威哂？！」，老而不指着我笑罵：「恬不知恥，睇你幾時被佢哋雙方趕到走投無路呀！」
一行人係咁行講下、講下又笑下，不經不覺行過咗「福德祠」，抵達大埔道之際、我不禁懷舊地回頭望番下個祠，之所以對佢印象咁深刻，係因為過往每年四月初八佛誕、嗰戍都有齋宴擺設以款待街坊，據講食過佛誕齋之後、嗰年肯定有佛光射住你而吉多凶少、更鮮有大病，我因此趁熱鬧去幫襯咗幾年，既然利口福兼夾加趨吉避凶……好話唔好聽：一世都唔會忘記而「死都記住佢」嘻嘻！。
沉默了約莫拾零分鐘，當大家透順咗條氣，經紀陳突然向我問道：「老吳，明年（白虎騎虎背）到底係咩預兆呢？」，我笑道：「驚青咧！」，回道：「做我哋呢行點會唔驚呢……唉！」，我呻了口氣不禁搖搖頭：「白虎騎虎背咪即係西方人着草囉！寅木旺東、東北方，鬼子佬肯定被亞洲人牽住個鼻走。庚金若騎卯木，則卯藏乙木暗合而財色兼收，弊在寅藏甲木必然同佢庚金死過……你不妨回顧下，大陸胡溫和美國烏卒卒呢兩個月邊有停過外訪？簡直馬不停蹄各有各忙，搞咁多嘢究竟為乜嗻，仲唔係鬥爆陰毒？我近排已好冷靜咁聞個世界味道……」，「你本身就係（大人頭上一朶花），嗅覺叻過人多多嘛！嘻嘻！」老而不用手指指向頭角而取笑道，「去死喇！老而不……」我瞪咗佢一眼，繼續經紀陳的說話：「你有冇發覺最近好多事情顯得唔尋常，特別中美、中歐之間貿易糾紛又再頻密，恐怖活動同時此起彼落，國內擺明車馬堵塞熱錢流入境內漏洞……等等，到咗27號星期五嗰日，忽然爆出杜拜冇錢還債而出現金融危機。消息遲唔爆早唔爆，偏偏要待烏卒卒訪華，再等小雪過後先至爆……。種種跡象顯示咗東風已經全面壓倒西風，鬼子佬騎上咗虎背之後想個籮友太平無恙斷估幾難矣，哈哈哈！」，「唔怪得今勻烏卒卒訪華，上頭先安排佢去中國嘅青龍地上海以挫虎氣……」經紀陳輕輕拍掌附和。呢個時候A君行近嘆咗口氣說道：「一個甲子矣！想當年1950年志願軍雄糾糾氣昂昂跨過鴨綠江……」，說話引起了C君興趣而接口唱：「你老豆嫌命長跨過鴨綠江……」引得各人又發出一陣笑聲。A君接着說：「上一個庚寅美國佬騎上咗虎背，而結果有得上冇得落，最終議和落幕。明年歴史重演，唔知又衰邊泛喇！」，老而不神態凝重答道：「咁睇落經濟仲係未掂喎！信得過歷史會重演……之不過美國佬今勻唔係衰在東北（丑艮寅）方，而係比之前更大鑊嘅（丑艮寅）八運。無他嘅，風吹雞蛋売財散人安樂罷了！」，「出年坐響虎背上面嗰個睇怕都幾牙煙……」我還未說完，D君已經好緊張地問：「點牙煙法？」，我笑笑口向佢扮了個鬼臉：「唔係咩？庚金坐寅歲有歌仔唱（春天木旺砍崩刀，夏日火炎入洪爐，入秋金強打餐死，隆冬封鐵冰混土），呢啲就叫做屎坑關刀冇叉用喇！ 」大家聞後七咀八舌地表示意見，雖然比起三八走埋一個墟好啲、但都唔靜得幾多，講講下不禁行到嗰間乜叉大茶樓，於是乎病夫們魚貫而行入去祭肚先，等陣再行過。
