論盡白虎歲
到咗牛年尾都冇被恩召，學基督徒講句：感謝主！又無驚無險過咗一年。
值此金虎木馬歲，誠心向各位網友、讀者、Fans……等等拜個早年，誠心恭祝大家虎年（鞠躬作揖）：虎踞龍盤今勝昔、花香鳥語舊更新！全年：做世界生龍活虎，做大事虎虎生風，搵真銀龍精虎猛！
拜年話說過之後講番現實嘢而論盡虎年，我已有N年冇出運程書囉！習慣咗響網上寫流年吉凶休咎（當然唔係怕輸而唔出書啦，只係自己冇時間又唔想搵人代筆而矣！），閑話表過、講番今年立春八字先：
己 乙 戊 庚 (立春)
卯 酉 寅 寅
庚寅歲建，日元乙木壯旺，反觀金卻疲弱不堪並且被木所傷。五行欠火缺水而土虛，只餘木金兩神成象、明顯爭鋒打生打死。
試睇下庚寅！首先扯頭纜挑起事端嘅正係上面隻白虎庚金，佢想劈寅木、點知反被雙寅圍攻而搞到要着草。至於白虎嘅徒子徒孫同樣撞柱而車毁人亡（卯酉相沖）。唉，戴高樂！又多一單車毁人亡。
咦！庚寅歲干支，原來係(澤火革)卦
意義：革新、革命、改革。卦象：上卦（外）為兌、澤，下卦（內）為離、火。水加在火上可以挫火。火上有水，水份亦可以蒸干。水加沸可以轉變成水蒸氣體，故火可以改變水、使之氣化。上卦秋象（兌）下卦夏象（離），由夏至秋、陰陽之氣產生極大變化（革、意指剝去獸皮後變成不同之物），是為「革新」。
卦象：改革、革命，革新。去舊迎新，除舊弊。
辭曰：〔湯武革命，順乎天而應乎人。〕，其意為：商湯滅夏傑，周武王討伐商紂，均係順乎天理、因應民情的事，所以稱為革命。革卦有除舊佈新的涵意。
運勢：以往不順利之事、大體上已成過去，未來將轉趨亨通，如果進一步改變策略、方針的話，更加會有好結果。或許進行初期惹起不少爭議和諸多反對聲音，若然加以糾正錯誤而去蕪存菁，則往後越顯得順利，故不應太多顧慮以免失機。唯獨周圍都話革命、造反、起義……個社會想唔亂幾難！
看完八字和卦象之後，唔志在睇埋紫微斗數喇！
庚寅流年紫微斗數
紫微斗數命宮三方四正：天梁獨守亥垣，對沖天同化忌(巳垣)、身宮同宮，會照機巨卯酉、擎羊天刑同度事業宮，太陽化祿太陰未垣財帛宮、纏昌曲天壽。
我之前有文章寫過架，庚金坐寅木、上面係白虎而下面係東北虎，好明顯見到鬼子佬騎上咗東北虎背、去又難時落亦難，中國有成語所謂「騎虎難下」相信係咁上下所指卦。
寅木旺東、東北方，西方庚金肯定被東北寅木牽着鼻子走，庚金若騎卯木，則卯藏乙木有暗合之意而可能財色兼收，弊在寅藏甲木必然同佢庚金死過。鬥到底流年金弱木壯、着數在下面隻東北虎、上面隻白虎將冇啖好食。
記得上一個甲子歲、即係六十年前「庚寅」年，當時嘅新中國成立先至一年，就響嗰一年、美國佬糾集嘍囉扯起聯合國國旗而屯重兵於朝鮮半島對華有所行動。為咗保家衛國、中國政府毅然派出志願軍到北韓抗美援朝同佢哋展開正面交鋒。打咗幾年結果打個佢落花流水，最後議和，因此庚寅亦有「着草」之含意。
上個世紀乾兌金正值進氣當運期，屬金嘅美國人尚且大敗於東北地域（丑艮寅），到咗今時今日七運兌金已經脫運而下野歸西，照數推理其當黑程度應更甚，相信好難用人間數學計算得到。宜家八運旺東北而衰西南，亦即係話東北屬正而西南屬零（東北八運「正」十西南二運「零」＝合拾）。
由於正西剛退氣、西南屬零方敗地，如是者正西西南兩個地域宜家已成咗最失運嘅衰方、敗方。過咗2月4日立春入咗庚寅歲之後，流年五黃飛到西南，年煞重疊運煞，年內舉凡有乜災難發生，嗰兩戍地方必然首當其衝。
有讀者問：「今年會衰邊瓣？」答：「衰西方」問：「師傅你不嬲都話西方唔掂喇！」答：「我指嘅西方係包括統屬西方之金屬呀！」問：「啊！明白。記得老毛響五十幾年前、正當轉入六乾運前夕展開咗乜叉土法大煉鋼，下令全國各省各市各個家庭統統要拆哂門窗鐵閘樓梯……只要有金屬嘅（東西）都要向國家奉献……」答：「美其名為煉鋼、真正用意在於算準時間空間而造勢興壯木以挫強金運，抗衡當時得勢之西方。過五十幾年之今時今日西方金已經退氣，唔使用老毛嗰招佢哋都有排衰。」
庚金坐寅歲有歌仔唱：「春天木旺砍崩刀，夏日火炎入洪爐，入秋金強打餐死，隆冬封鐵冰混土」，成年除咗西方唔掂之餘，舉凡金屬製成品大多數出問題，就連個姓帶有金屬部首嘅都衰！
最明顯不過係年內所有人禍及意外事件、十不離九都由海陸空交通工具所引起。除此之外上至恐怖襲擊飛機、下至高空擲物……等等高空犯案也此起彼落。甚至高鐵風波、高鐵意外……等等也包括在內，猶其最多負面新聞嘅香港高鐵、恐怕年內餘波末了。差啲唔記得360纜車添，呢間Ge嘢對香港認真冇好帶摯，好驚佢年內又大大鑊咁整單杰嘢！
仲有係玄機計算整年世界暴力事件將激爭，恐怖事件肯定單單新鮮鑊鑊甘（南北韓姓金嘅領導人，湊啱強金劈寅木（正西同東北鬥），想話無驚無險幾難喇！睇怕北韓嗰邊中招機會高啲。
想話寫住咁多，誰知老而不打電話嚟、話收到料：海地地震係由美國核試引起……云云。講來或者有人唔多信，唯獨我卻信十足，問點解？因為庚寅一柱明顯睇出庚金飛彈成年收唔住掣而到處去傷人！
講到金融嗰瓣，流年「美金騎虎背」好明顯白虎較腳，預測美國聯儲局將繼續維持輕鬆貨幣政策，利率或者高番啲多、但大體上企響現水平。於是乎，美元閃閃雍縮縮還是停留在亞洲區炒作而不撤走。只要有美金響戍搞搞震，股市樓市幾難跌番落去，就算跌亦不過調整而矣。以前講過中央特區政策係希望50年內完成對本地實行祖國化（即係鼓勵國內資金來特區置業，同時吸引特區資金上大陸買樓），爾後想香港樓價跌返落去？恐怕天方夜譚矣！
曾凸首話樓冇泡沬到係事實，只係用大陸班闊佬買家嘅尺度標準去定罷了！
金木相戰而金敗，寅卯辰東方不敗三年，先剋金後強木再生火……流行性疾病仍然關係到呼吸器官，流年金主肺經受傷於寅木（虎），虎入貓科，唔通又有同（貓）有關、侵犯肺組織嘅新變種病毒流行爆發？
