日東去，何來春，南水北調點安泰
對於立立亂嘅泰國政局，雖然唔關自己事、燒唔到我哋嗰疊，但睇見電視日日播出之紅轟轟、鬧哄哄嘅畫面，睇得多也覺得煩！
有讀者献上首歌仔，並且抒發佢嘅玄學見解：「泰者、地天泰卦。坤在上乾在下，如魚見清水、如地沐甘霖，其快無比也。（春水換日）而成泰象，泰以水立國，大忌乾旱」，「泰國原叫做暹邏，左右俱水及船，位於中國南方偏西南，是中國和印度東方間的中南半島之中心地帶。八運後因戊土司權、中國南水北調運作汲水加倍困難。今年直到目前，中國南北方氣候極其反常：北方大風沙而西南鬧大旱，明確顯示出旺土制水之機兆。物旱而生赤火，火烈沖水而成（火水未濟）卦，大象：春下水涸日落、既非春亦非泰。莫非紅衫軍俱（夏秋冬）欲偷天換日（挽回個春）？非易事耳！恐怕立秋之前泰國政局勢難回復穩定，皆因：日東去，何來春，南水北調點安泰」。
呢位讀者能夠作出咁玄機嘅推理，並且有紋有路，着實令人佩服！
冇錯！乜嘢都出在運勢蛻變之演化程序中。老實講，早在世紀邊沿2000年之初，正當新馬仔發生家變、以至星殞紅塵…..我就開始留意世運交替過程之種種「新陳代謝」蛻變。及後2003年沙士肆虐，羅文、梅艷芳、張國榮……等等巨星相繼殞落而聲寂人逝，唔講你唔信，呢個時候、戊土八運仲未開始交接只不過係氣先進而矣！當時心中早已暗忖：未曾轉運已經剋死咁多名人，若然於真箇轉運豈不是死得人多？！
唉！想唔到好嘅唔靈醜嘅靈，轉正戊土八運之後，運勢挾其雷霆萬鈞之勢，好似希魔消滅猶太人、老毛清剿地主….. 等等一樣而對付「乾兌」金，將佢過往40年流行過嘅一應事物、一概鏟除而逐步毁滅！
大家有目共睹，自2004年開始交入咗八運之後，對於金（西方）、聲、色（雞）、醫、投機、娛樂……等等作有系統而年復年地逐一摧毀，先埋金後剋水。（種種殘酷現實讀者可以參考我過往文章作引證）。
知唔知：點解年初會起大風沙？點解今年西南會鬧旱災和西北會大地震？點解要派汪洋掌廣東？點解舊年陳水扁會扮蟹？點解中央要開放自由行，買怕香港？點解要趕北佬嚟香港買貴樓？點解畀國內同胞落嚟痾仔？點解……
咪問咁多喇！呢度話畀你知，千祈咪縮耳、咪斬眼…
須知道風水之陰陽定律係：山管人丁水管財。優良之地理分佈要求：「陰陽合拍、一卦純清、山水有情、相生得令」，概括而言：「北水南山、陰陽調和」，即係：「西、北、西北、東北……等等西四方要見河海分佈，東、南、東南、西南……等等東四方宜佈崇山峻嶺。若然違反咗呢個定律的話、謂之「陰陽失調」，註定地方衰敗貧脊而永無翻身之日。
中國地理環境本來就係違反陰陽嘅天然佈局，結果幾千年來應富庶嘅地域自然民生富足、唯獨卻為富不仁，應貧脊之地方至終貧者越貧、不免挺而走險。所以自古以來：西北出悍民、兵賊、王候……，東南出書生、商賈、富戶……係中國風水嘅金科玉律，中華民族之傳統宿命。
到咗共產黨治國之後，國家有識之仕拍板改造風水，中國總設計師鄧小平承前啓後地按本子辦事、已經係公開秘密和不爭事實。
七運兌金司權，乘金生水之勢頭、而在國內進行規模浩大更前所未有之南水北調工程。
首先進行嘅係長江三峽水利樞紐工程，簡稱三峽工程，係長江中上游段建設之大型水利工程項目，亦係中國有史以來建設的最大型的工程項目。
繼而打通東方青龍上海到西方白虎湖北宜昌渠道，以利南方朱雀香港至北方玄武首都南水北調工程。南水北調工程嘅目的就係要將長江流域豐富之水資源抽調一部分送到華北、西北，名目上話由此以緩解那些地區的缺水情況，實際上係借助風水去改變中國山水不平衡之風水現實。南水北調工程有東線、中線和西線三條調水線路。此工程的規模和難度都超過三峽工程。
以上所講不過係2004年之前六七運所做嘅舊事，當年有份策劃話得事嘅領導人、死咗嘅墓木已拱，退隱者十九垂暮不理事。多得佢哋，特別係鄧小平、鄧老爺子，如果冇咗佢發揮持久之愚公移山精神的話，今時今日富強之新中國點會一下子堀起而趕上立國幾百年嘅西方國家？！
瞬息間已經到咗艮土八運，呢個運係戊土司權，土厚而制水。呢啲嘢一早已經掌握在國內「科學院」班大師預計之內，否則點會有計劃咁欽定胡錦濤取代江澤民、取其「翻江起濤」呀！仲有呢，恐防回歸後因限制咗香港自由而加速八運戊土筑堤防洪、阻截源源不絕北流之南水，到咗九運又因南地運旺更加蓄水不放……等等，所以在回歸前、前所未有地宣佈畀多香港五十年自由以行資本主義制度，呢啲「德政」作用在於風水，爾後對香港政策一味揸頸就命咁死忍，乃在於跪地餵豬乸：亦不過睇在維多利亞港嘅海水能改造國運功勞分上而矣！
如是者2004年正式交入八運，當胡錦濤取代江澤民而「翻江起濤」之後，立刻起用曾蔭權做特首以取代冇叉用嘅航運董，並授意佢加緊破壞維多利亞港風水以鞏固南水北調水基礎，更加採用山管人丁水管財之「風水大挪移法」而開放國內各省各市個人遊，作用係「神兆機動」人為地調動國內人丁以換取香港水源（相對論：此方人丁必然抽調水源到對方）。並且速調「汪洋」南下廣東、取其汪洋大海之意以抗衡強土筑堤堵截北上流水。
南水北調嘅風水作用係引流北上，無間斷地維持南方太平洋海水經維多利亞港流入，必須好似人體血流般循環不息。七運兌金金能生水，水源充足而毋庸傷神費心，唯獨八運因戊土司權而南方生水能力根本有限，加上運勢非金生水之故、海水並非話抽就畀你抽。最慘嘅係風水既已改造好而勢成騎虎，整個大西北不能一日缺水（不單止係真海水或江水，無形嘅水蒸氣亦算入其中）。越係供水不足龟再要負起整個國內大西北之供水責任、自然力有不逮。如是者整個南方、東南、西南……點滴水源均被抽干，所以干旱蔓延至國外……咁有人話春下缺水嘅泰國係畀大陸南水北調累死、並且話：「一江春水向北流」，聽落好笑但並非無矢放的嘅！
我以前咪話過，入咗八運六年之後一定天剋地沖，同時間之飛星星數必現凶兆。今年庚寅年柱正好天剋地沖2004年入運年柱甲申，流年五黃飛西南、二黑飛東北，艮坤二五交加，
己 乙 戊 庚(立春)
卯 酉 寅 寅
庚寅歲建，日元乙木壯旺，反觀金卻疲弱不堪並且被木所傷。五行欠火缺水而土虛，只餘木金兩神成象、明顯爭鋒打生打死。再細察五行，欠水缺火，既無溫暖更加干枯。如此一來金剋木而木被金傷，春木幼嫩而迎刀斧也難免受到戕害，落得個兩敗俱傷。
未來還有37年起碼（由1997年起計50年之七尾至八、九運），國內求水極殷切，事關改造咗風水洗濕個頭，真係少啲水供應大西北都唔掂！冇起水上嚟會點？咪刮大風沙、大地震、礦坑倒塌……等等囉！今年流年睇八字然講明缺水矣，肯定年內周圍俱井枯水涸、而到處皆缺水。
唉！冇水最折墮！由此引起一大堆問題係正路。頭先有好幾個「點解架」，依家咪有咗答案囉！仲唔明？咁你就要由頭再睇過落嚟喇。
八運過咗中段之後，未來九運開始進氣，由於九運係朱雀火司權、火土相輔結果肯定進一步火炎土燥。咁即係話：火山爆發，地震海嘯，漫天風沙……
等等整個世界南北西東此起彼落。前人話戊土主正氣，一切浮誇、假大空……等等一概行不通，代表人物、事物……都被黃土掩埋。唯獨我有我嘅睇法：「火炎土燥嘅人異常固執並且食古不化，對於唔啱心水嘅事物必然悉數摧毁，過程中肯定泛泛都矯枉過正，好似：原教旨主義、毛澤東時代……」咳！都係咪搞我，講多錯多，收嗲！
