咪天真，西南見海非好運！
上個月有位專做泰國生意嘅朋友打電話向我報喜：「師傅，你對上篇文章咪話過泰國個泰字內嘅水被大陸南水北調抽乾哂嘅，依家上頭水浸華南噃，咁咪一天光哂囉！」。話口未完真係講掂數，紅衫運動喺交入立夏後不久便宣告散BAND而草草結速。
探討原因，呢個5月亦係昌曲科忌會照三方四正、須知道昌曲科忌大象係談判講數，明顯主枱底交易，國家如是，平民亦然。
或者會問：「點解昌曲科忌主枱底交易？」，答：「文昌化忌主死約，文曲化科係走盞，亦即係一如俗語所謂嘅：嘴頭生、老襯死咁解！」，每當碰上昌曲科忌之歲月交會、佢嘅靈驗程度往往嚇鬼死你！不妨睇下近期所發生嘅大事。
政治層面：4月份中美巨頭碰過頭密謀過如何設局「裝羊牯」之後，世界股市已經呈膠著狀態，到咗5月初交入立夏、個市即刻勢如破竹咁向下調整、跌到阿媽都唔認得。再到咗5月中北韓金仔訪華過後，唔知兩國又密斟過啲乜而令到後者突然間硬起上嚟……個市因此而進一步跌至不忍卒睹！
社會層面：5月份星相界熱爆全城嘅「姊弟情仇」好似做戲咁做：初初紥哂馬，一邊宣稱糾集半打律師同甲方死過，而另一頭則張揚打孖禮聘御用大狀跟乙方對砍。當時雙方意氣風發，風頭一時無兩！仲巴閉過昔年龜苓吳同佢家姐對簿公堂，還厲害過華懋龔對決光頭聰……，過程轟動全城、勢頭直追柴九和Laughing哥。超！……也麼，唔使一個禮拜課仔咋，竟然話握手言和喎，仲快趣過細路响公園玩煮飯仔、還化學過花靚在網上搞洞房，哈哈哈！
我不嬲都話做戲好過做九流術士啦！只要識得造勢嘩眾取寵，保證名成利就、收入好過真正算命、風水，起碼冇壓力先。
好似某君在三色懷舊臺教阿叔阿嬸學ABC咁，紅黃藍白黑……任佢竪起「仙家指」做神仙指點顏色。錯咗你夠膽抽秤佢咩！
講開又講啦！以往我有個好鬼夠膽嘅舊客、點解話佢有膽呢？原來佢乜叉風水擺設都敢嘗試、就連火燒五黃都不怕。好久不見佢矣，還以為佢發咗添！誰知最近見番，但見佢頭耷耷、眼濕濕、衣不稱身人噏耷……嘩！搞邊科呀，乜話？最近做咗韓國影帝「撲到直」！點會呀？
原來佢早幾年響有線電視聽某人老點，在本地和外地買咗一大堆西南見水嘅樓房，結果好似時鐘報時嗰種震人心弦嘅聲音「零舍當泵」，2004年之後直插水而一蹶不振至今。明知會畀我孖叉、還邊有face嚟見我呀！
須知道依家運旺東北正方「8」而衰西南零方「2」，條公式係：正十零＝拾（合十阿彌陀佛）。舉凡西南見水地方嘅人流年必行衰運，特別今年雙五黃飛西南、二五交加打孖嚟，除咗搬走之外睇唔到有乜解救方法。
或者有人會發微言：「書都有寫啦！零方見水係救貧水……」，
係就係有所謂零方見水，正方必旺發。但有冇考慮過、正方靠近零方而見水的話，好難避免本身所在地就係零方。好似港島西南地區咁，本身所在地區2004年交入八運後已經係失運敗地。既然位居失運敗地，理叉得你外局零方見海水如何好法，起碼自己衰咗地位在先至真！
我嘅經驗係：依家八運買樓千祈要避開建築物外局西南零方見江、河、海……等等活水之地區。搬入去住嘅話，一係破大財、纏惡疾，一係鬧婚變、犯官司。仲未有事發生？咪開心住先，起碼過埋呢五年危險期至講。
咁風水學又話零方見水方大吉嘅？冇錯、問得好！八運西南係零方，外局見水大凶，但室內可在西南放置靜水則可以納吉。記住係靜水而唔係動水喎，啲水郁親必有禍！問原因？以下答你……
三元八運零正方、必須記住以下公式：正十零＝拾（合十阿彌陀佛）。
一運：旺正北正方「1」而衰正南零方「9」，1十9＝10
二運：旺西南正方「2」而衰東北零方「8」，2十8＝10
三運：旺正東正方「3」而衰正西零方「7」，3十7＝10
四運：旺東南正方「4」而衰西北零方「6」，4十6＝10
六運：旺西北正方「6」而衰東南零方「4」，6十4＝10
七運：旺正西正方「7」而衰正東零方「3」，7十3＝10
八運：旺東北正方「8」而衰西南零方「2」，8十2＝10
九運：旺正南正方「9」而衰正北零方「1」，9十1＝10
風水學係眾多學問當中最複雜又玄妙之一種，講到學無止境斷估佢認咗第二冇其它敢認第一。呢種學問到咗依家仍然好似阿拉嘅女人咁罩著重重面紗驚死畀人睇倒，原因在於歴代大師門派觀念奇重，寧可將功夫化簡單為複雜、也不想立亂傳畀外人而公開秘學。固步自封嘅結果咪令到真正用得到之學問變咗絕學或者秘傳，到時祕秘下肯定失傳。話雖然係咁講、但依家用得著嘅嘢和做得到嘅功夫、無論如何都有基礎理論支持。話之佢點變、但有條恆久定理係冇得變嘅：「生氣、死氣對流定理」
陰生氣即係日常受人歡迎而出盡八寶去收納之旺生氣。佢和陽死氣多數產生於高山或多樹木嘅地方、然後隨風散發、隨水飄流至建築物、地面……佢性質只會直線向前流竄，由旺方走向衰方，介水則將死氣卸下，遇風吹散、見水止步而流回旺方。公式：山(陰)十旺氣(陽)＝陰生氣，水(陽)十衰氣(陰)＝陽生氣)，組合陰陽生氣交替換運。
話之你將面紗罩多幾層、更遑論你如何作古仔將簡單化為複雜……總之風水呢種學問一言既之：「在衰方造功夫防止旺氣流失」，最佳方法係用水截住佢。
阿乜水教你家陣個旺運響西南、猶其外面有海嘅敗地買樓，本來用心良苦之極！因為外面有海可以為你堵截旺氣使佢回流入屋吸納。唉！唯獨佢嘅功夫認真有限。點解咁講呢？事關稍有風水常識嘅人都清楚知道：由山上產生之「生旺氣」佢嘅性質只會直線向前流竄，由旺方走向衰方，介水則將死氣卸下……公式係：山(陰)十旺氣(陽)＝陰生氣，水(陽)十衰氣(陰)＝陽生氣)。
所以自古以來、風水原則係講究背山面海（擇當運嘅坐山作靠背而居住，向方住遠處失運嘅大海），咁樣咪可以既收受山上形成之「山陰氣」，笑納介水即止步而回流嘅「水陽氣」，仲有係跨門入屋後個玄關（明堂）必須寬敞夠大、切忌擺滿雜物，原因一字咁淺，咪即係趁陰陽氣流做緊愛嗰陣、自己盡吸佢哋產生之精華囉！
冇陰功！老點人搬去零方近海嗰庶衰地住喎，咁咪即係叫人去等死咩！？好似上面所講我嗰個舊熟客咁、聽教聽話咪搞到一身蟻而冇瓣掂囉！你以為：水(陽)十衰氣(陰)＝陽生氣講玩架？分分鐘揩大鑊，到時點死都烏卒卒而懵然不知！
