缸瓦變瓷器，政治要知機
唔知係咪應景緣故、個天連續幾日落住滂沱大雨，禮拜嗰朝、因為大雨而零舍好瞓，記得「孔老二」好似講過「民以食為先」，佢都烚戇嘅，有邊個唔知瞓緊要過食吖！話之佢咁多、幾大都瞓番夠本……。
唉！邊有諗到自己福德宮天同雙化忌影響咁大，連覺都唔畀你瞓好！原來國內貴客胡君過境嚟咗香港、第朝趕住飛去加拿大，所以經紀陳打電話通知我。第個可以唔見，胡君卻不能不見，點解？因為佢姓胡囉，哈哈！
我最怕雨天開工或交際，事關自己係丁火命靠乙木生火，雨露濕柴如何點得着火？咪好似隔夜油炸鬼冇厘火氣，嘻嘻！番到公司冇耐，胡君由經紀陳傍住而踵門。寒暄過之後，自然又扯到46票對13票嘅話題上。胡君直截問我箇中玄機和政治趨勢，我亦明知佢必有此一問，故早有準備而做足功課、靜雞雞用「非洲八字」回答佢：
己 庚
丁 乙 乾造
卯 子
亥 酉
金水傷官，也喜見丁火透月干，略嫌五行欠陽火溫暖，喜38歲後一路火運相輔相乘福命到老，係青年大器成就之格。
響八字中配套：丁火主特區政府，乙木自然係北京青龍。至於庚金非西方白虎莫屬，亥子水為泛民統稱、惟亥水係民主黨、子水係公民黨，卯木視作建制派，酉金配套社民連……。
庚寅年、寅支六合亥水而生丁火，壬午月天干壬水乘勢作合丁火而承寅亥之六合而化木。地支則子午卯酉朋沖，一舉沖散泛民陣營、打亂其陣。不單如此，經此一役之後，西方勢力在本地將有一段時日起不了頭……。
胡君聽過我分析之後，顯得興致勃勃，仲問過經濟、樓市、股市……等等走勢。最後由經紀陳向我轉告說話：「胡先生好賞識你，想話……」未等老陳說話講完、我即刻打斷：「多謝夾承惠，千祈咪搞我！除咗上去睇風水，其他一概冇興趣。嗱！老陳，橫掂你都萎萎哋，不如問胡總攞個常委做仲好啦！」話音一落，我同經紀陳互相指住大笑！
