《新玄機》雜誌主頁   吳鈞洋師傅其他文章

                                                    文•吳鈞洋

 

 

左又兇右又兇,五黃二黑疊艮宮

     

        最近有一喜一悲新聞,喜嘅係四叔添孫,佢個長子家傑啲料出類拔萃,成功試菅植人、唔使洞房而一索3B,講到威水、日本首相「菅植人」走埋一邊,呢個直情屬於香港人之天大喜訊,更加係華人嘅驕傲,三胞胎喎、你估咁易求呀!仲有,3B泛指維生素B1、B6、B12,對人體乃絕不能缺少物質、係健康保證之元素。

    悲嘅係強颱風鯰魚過境台灣,造成蘇花公路大規模坍方,共24人失去聯繫,其中20位是大陸旅客和大陸領隊(雖然生未見人死未見屍,但睇嚟都係凶多吉少囉!),謹此肅立祈禱,誠望上天保祐廿多個遊客、一如電視劇般死唔去,萬一真箇不幸蒙馬克斯寵召,也希望收番個全屍!

    今年流年心中始終有個結:庚金劈木夏秋多釀災,金寒水冷冬季難免禍。

    記得一個甲子前的庚寅年韓戰爆發,中國人民志願軍在當年10月25日雄糾糾氣昂昂跨過鴨綠江……,相隔了一個甲子、相同八字日子不過相隔咗十日八日而矣!今個庚寅年行緊下元八運中旬,年中中日因釣魚臺問題而磨拳擦掌紥哂馬,令不少人包括我在內以為有機會歷史重演再爆發中日戰爭…… 。唯獨向老而不請教時佢竟然咁回話:「中秋節打鴨蛋就多多都有得打,話因釣魚臺起打起嚟、就打死我也不會認同!點解?道理等同兩隻貓爭舊魚一樣,冇咗舊魚肯定打餐死,多舊魚反而因為有為食目標而不會對打,若然多舊魚仲打,哈哈!咁就認真多舊魚囉……」,死老而不真衰口、但說話聽落亦幾有道理。結果仗真係打不成,話雖如此,卻仍然有超級颱風打埋嚟而應運,香港因為有尊大佛照住、大風過門不入而執到身彩。唯獨兩岸就冇咁好彩囉!最慘係臺灣,足足死了幾拾人,當中還包括廿多個國內遊客,聽聞係國家稅吏(以前主耶穌基督最憎嘅就係稅吏、咒都畀佢咒死,但今時今日要是沒有他們,哼!國家要吃西北風矣)。

    大家不會忘記七月立秋、五黃入中宮哪個月吧!?   我記得這樣寫過: 踏入大暑之後,個天好似穿咗個大咕窿,豪雨落下個不停,第戍咪講喇,單係香港、未入立秋已經懸掛咗兩次黑雨信號。到立秋之後、白虎司權,唔知係咪秋後算帳緣故,更加唔講得笑!豪雨引發水患而在世界各地釀災肇禍……邊戍最嚴重呀?仲使問嘅,梗又係我哋祖國啦!(好嘢甚少有份)

    結    果:由於二五交加犯門白龍再沖黑龍……白龍江引發泥石流後,黑龍江又水患,及後再有客機失事……

    上面提過:庚金劈木春夏多釀災,金寒水冷秋冬難免禍。

    嗱,又嚟喇!睇番十月立冬個八字,又係寒金劈木而生風起雪,聽聞六十年前嘅十一月韓戰發生時,中國太子毛岸英,因為違犯軍規在陣地中生火炒飯而被美國軍機炸死。一個甲子後嘅呢個月,二黑入中宮、二五交加中宮併艮宮,西南、中宮、東北,成條軸心二五復二五交加,未交立冬先在世界中宮嘅印尼發生海嘯,希望不會因此掀起天災人禍序幕。好耽心犯煞嘅軸心,在聖誕前係釀災肇禍之根源。天災不過風霜雨雪,地震、海嘯……等等,事前可以防患未然。最怕係人禍:局部戰爭、恐怖活動、疾病流行、疏忽釀禍、經濟失機、泡沫爆破……。既然令人憂心係煞星導致嘅噩夢發生,但憂心又如何?唔通有得防咩!記得早兩日會見位北方妹妹講到佢行緊衰運噩夢可能隨時降臨、叫佢要加倍小心,呢位靚妹妹一味將噩運兩個字發錯音而頻頻讀成「\almond」,幾經糾正照錯如儀……心諗:「咦,好似卦象喎!almond咪杏仁囉!杏字:壯木伐日而鎮於其上,再日本翻轉而成杏字。仁者,二人之謂,即日皇明仁夫婦……唔通顯示日本仔將有排衰!」 (本篇完) 

 

吳鈞洋網址:www.ngkwunyeung.com.hk

吳鈞洋電子郵箱:[email protected]

 

WB01343_.gif      回首頁     WB01345_.gif (616 bytes)