旺西南旺正西？聽佢老點周身蟻！
年過過年年年過，又一年矣！唔知係咪紫貪桃花沖起文昌化忌緣故，踏入咗兔年正月班茶煲老友、差不多個個唔係去旅行就係話有家事……搞到今年嘅春茗冇哂着落，老B話；睇個世界立立亂，若不及時行樂恐怕再冇機會，所以佢唔理依露柒闔府環遊世界先……今年斗數卯酉唔少人係紫貪桃花，大體上風氣都比舊年開心。唔似得明年辰戌羅網，至少着咗一半人武曲化忌守命。真該煨！你都咪話唔擔心！
咁啱我今年又冇計劃出門外遊，所以整個春節百無聊賴……係咁moon
cake（悶極）直到元宵節嗰日，得老學究和經紀陳相約飯局先得以佳節有着落，總算得上有啲多快樂啦！
剛到步酒樓還未坐低，不嬲有禮數嘅經紀陳早已笑口噬噬，操着係人都聽得出帶有京腔嘅廣東話說道：「祝大家逃稅快樂……」，恭喜話還未講完、老學究已經一句窒過去：「撈鬆陳，係你自己逃稅咋！咪拖埋我哋落水，事關我哋都係正人君子……」，經紀陳失驚無神畀佢一窒、先是一怔，繼而打個哈哈笑笑口指着老學究：「兔歲至啱嘛……哈哈！發音唔正，慚愧！」。我睇在眼裡也忍悛不禁：「鬼唔望你老而不去北方時畀老陳啲鄉里窒番夠本……哈哈！」，經紀陳好認同咁點頭兼竪起拇指稱是。
呢個時候老學究忽然朝我藐藐咀道：「甲申開始嘅廿年八運；到今時今日數手指已行咗六年有餘，2010年庚寅太歲六冲甲申、明確暗示七運兌金至此已煙燒雲散，話之你（旺西南大師）點樣唱好正西、西南，總之玄機嘅嘢自己要執生，否則耶穌都無能打救你……以上說話係響你今年流年運程中讀到而抄咗落樣嚟……
」，「嘻嘻！咁畀面呀、老……老學究」我差啲又開口夾着脷，老而不笑駡道：「老而不嘛！預咗你咁稱呼喇……正一屎忽口，畀你係咁一咒，成個世界真係由西南亂起嚟！」，經紀陳也點着酸蕎頭附和：「係喎！風水依家東北正、西南零，世運正係衰西南嘅非洲，埃及和突尼斯領導人均被推翻……睇嚟利比亞跟往，西南之亂象好容易蔓延至世界各地噃！」，「世界東方地域響亞洲，由於五黃飛東、二黑飛南，今年二五交加夾東南……年內高危度環繞於呢戍地域，由大運西南將煞氣吹散而蔓延到正東、中宮、正南……等等地區」，老學究接話：「今年下半年睇個勢頭肯定進一步不穩定，暴亂及天災仲係集中在此……整個亞洲；特別東南亞，相信烽火連三月，無處是樂土……」，我聽老學究發洩過後、越發顯得無奈：「到咗明年五黃飛東南，加上武曲化忌，東南亞肯定大亂……」我話音剛落老學究即刻笑住望咗我一眼而搭腔：「仲有，除咗執政人物被推翻下臺，更有皇候貴胄、殿堂人物……等等不再食人間煙火而騎鶴西去……嘻嘻！呢番屁話咪你條屎忽鬼在流年運程中發嘅囉！人家旺西南大師不嬲唱好西南，係咁畀你一咒……直情累死好多人！」老學究難得戚咁響戍指桑駡愧。「喂！你哋哋口口聲聲提及嘅旺西南，佢係乜誰呀？」經紀陳莫明其妙地發問，老學究笑着反問：「有邊位大師由2004年唱好西南一直唱到今時今日吖？自從佐敦、大角咀……等等西南地區一帶樓群落成之後，呢位大師開口埋口都話旺正西、旺西南……等一眾盲毛信以為真。」，點知經紀陳不聽猶是可、一聽即刻扯哂火：「係咪仲話西九文娛將帶旺塊地……乜係佢呀！靠！收咗人家地產商錢、唔知佢真無料抑或偣住個良心去唱好……我老爸和一班世叔伯早幾年就是聽佢老點在大角咀、佐敦……一帶買咗樓，住咗冇耐、大大話話死咗六七個，不死嘅也家破財淨……總之冇個掂係啦……」，「唔使講落去，佢講嗰個西九文娛中心有梁展文做版睇架！」未等經紀陳媽完我已截住說話：「使乜講多啫！今趟由西南地方燒起嘅人民革命已經係衰西南嘅最好明證……先挫失運西、再衰零西南！西南入咗廿年之衰運，由呢個方位散發出嘅衰氣、相信世人仲要捱多拾零年添。至於今年正月未過已經四處災禍，原因在於舊年歲運都禍西南而病東北，西方既衰到貼地、西南梗納餘氣。今年流年一轉轉成禍正東而病正南……文昌化忌係誘因，而化忌主要驗證於維基解密……」，我嘅說話老學究自然心領神會，但對於經紀來說卻是深感興趣。於是乎我繼續說下去：「嘻嘻！呢個世界上有精仔有懵仔
有叻仔散仔 賭仔 重有戇居仔……仲有好多人相信民主、共產……
種種欺世謊言。大話車起嚟非常好聽兼有價值觀，實際上冚扮爛揾老襯兼夾揾笨突，事關權力呢種嘢邊個揸倒邊個話事，幾時輪到你班平民百姓指手劃腳！執政者永遠可以胡作非為，事後擺入機密檔案加密封存……
嗱！千祈唔好誤會只有共產黨先至會咁叉樣做。查實，鬼子佬做得更徹底、更恐怖、更密實！佢哋可以藉口軍事機密、（祖國係叫國家機密）而瞞天過海咁删去曾經做過啲衰嘢和壞事。記得當年美軍響越南戰場宣傳係正義之師，查實係屠夫所為……
最終被踢爆，因而導致美軍在越南撤出……
」，「講咁多無謂嘢做乜啫！一句話總括咪得囉！執政者用盡陽謀去對付人民，人民也被陰謀利用而回敬番當權者……
」經老學究簡簡單單兩句說話就道出咗主題：「維基揭密爆咗咁多嘢，佢個老細阿桑奇漾出咗一籮籮駭人醜聞、而掀起一單跟住一單嘅極權國家暴動導至政府被推翻……
」，聽到呢戍、經紀陳不禁豎起拇指讚道：「嘩！條友是英雄，頂呱呱啊！」，「他頂呱呱，你就也也烏囉，嘻嘻！」老學究對經紀陳扮了個鬼臉繼續說話：「維基揭密無疑係網絡時代的一件革命性大事，正在對世界運作方式造成有系統咁改變。自從舊年至今呢幾個月，維基揭密網站不斷爆料引發硬新聞同埋軟新聞震驚全球，也正在顛覆緊當今世界好多保守國家嘅政權，並持續將美國機密資料庫所提供嘅資訊檔案爆料供諸於世，當中包括阿富汗戰爭、伊拉克戰爭嘅諸多真相都被揭開，最攞命係一眾大小親美國嘅中東、非洲國家，佢哋嘅外交內政機密，加埋八卦秘聞……全無私隱、仲慘過八卦周刋…..咁遭到赤裸揭露……」，「冇鬼點會死人噃！」我帶着蒙娜麗莎式嘅微笑打叉：「阿桑奇，佢真係咁偉大咩？咁有政治價值嘅料係咁亂爆哂唔哂料呀！」，經紀陳用奇怪而欲知究竟嘅眼神望住我：「內裡有文章咩？你唔係想話有政治陰毛吧？」，「啊！撈鬆陳你壞……
」老學究又利用發音抽秤經紀陳：「你發臭美夢咧！陰謀呀，想創你喇陰毛……
哈哈哈！過去幾年中美領導人枕住出訪非洲、歐洲，去親至少都帶幾百人以上，你估唔使錢架？係喇，淨傾貿易喎，有人信至得架！」，當熱愛祖國嘅經紀陳聽到呢戍脹紅了面、與老學究爭辯起來：「中國不會用陰……
謀的，只有美國人才會！」，老學究則好似鬥牛勇士面對蠻牛咁個款回話：「陳腥，唔使咁大聲嘅，我都時常要上大陸，而我個膽亦比你細，邊敢誣衊祖國吖！我只不過想話某些檯下交易係達成響高峰會之後而矣！」，我睇在眼裏笑在心裡，擺明道士同和尚鬥法而出盡法寶，竟然會有經紀陳呢種食古不化嘅人版企響中間阻頭阻勢，無奈只有將話題叉開、於是朝經紀陳說道：「咪拗喇！你知唔知阿桑奇在瑞典被塔呀？」，佢聞後立刻回道：「抵佢死！強姦靚妹……
」，說話入到老學究耳朵裡不噗哧地笑出了聲：「陳腥，阿桑奇佢點強姦呀？嘻嘻！」，經紀陳一下子答不出而口窒窒。「係做世界不帶（隊）！」老學究答道，「甚麽做世界不帶隊……
不明！」聽到經紀陳一頭霧水，「經紀陳係老實人，你個老而不咪玩佢啦！」我沖着老學究接過說話，繼而語經紀陳：「佢在瑞典遭美國情報單位整蠱中咗美人計而被控性侵犯因而被通緝，聽聞佢做世界時赤裸上陣而冇帶安全袋（當氹）……
根據瑞典法律，仆嘢唔帶（當氹）等同犯咗強姦罪……
」話音一落引來哄堂大笑，連隔檯啲食客都笑埋。
停咗一陣，我繼續說話：「北非洲嗰幾個國家：埃及、利比亞、突尼斯、阿爾及利亞…… 加埋中東沙地阿拉伯、也門…… 等等係世界正宗西南地域國家（歐洲諸國屬西方），既然八運衰西南，自然由上面開始而一路衰落去。今年五黃二黑煞氣連貫正東、正南、中宮…… 辛卯月（農二月）飛星七入中，五黃二黑重疊正東、正南、中宮。呢個月慘囉！天災人禍、動亂暴亂、死人冧樓…… 統統由呢個月開始，再到清明亂入東南，係咁一路不停地衰，衰到龍年2012，中東、東南亞…… 無處是樂土。」，經紀陳聽後冇哂心機，老學究則頭拎拎，大家情緒極度低落……
好彩呢個時候有位靚女部長嚟寫菜，但見佢豐姿綽約兼婀娜多姿，煙視媚行而風情萬種……咦！好少見過咁索嘅尤物，就連經紀陳咁叉正經嘅人都聽見佢嘓嘓吞口水聲，更唔駛講老而不矣！「元宵佳節噃，風騷下又何妨！」老學究佢今趟真箇如假包換成個老而不，點解？因為佢忽然發起老姣……一路昅實靚女一路細細聲咁唱起紫釵記：「半遮面兒弄絳紗，暗飛桃紅泛赤霞，拾釵人會薄命花，釵貶洛陽價，落絮飛花辱了君清雅……」，都唱得幾好嘅、有板有眼，我哋響旁邊也哼着調子……話之佢第三次世界大戰啦！呢個時候乜叉憂乜鬼愁都忘記得一乾二淨。 (本篇完)
