《新玄機》雜誌主頁   吳鈞洋師傅其他文章

                                                   文•吳鈞洋

遏樓市搶銀紙,損丁絕育收尾時

    今年唔知撞乜鬼,交入芒種已經熱到黐肺,你話「7.1」上街遊喎,到時睇下有幾多人中暑入醫院吖!好似「89民運」班知識分子遊行行至天安門老毛個像下,忽然刮起怪風落起暴雨,夾雜住黃沙煙雨迷濛一片……成條「臭老九」隊伍潰不軍,散哂!由此可知共產政權仲係如日中天,老毛陰魂未散。你話遊行倒曾蔭權猶是可,若然將矛頭指向……保證你以後冇運行! 

    嗰朝晨運,老而不和佢幾位同事都有來,其中大爛財我以前有提過,好耐冇見又大隻咗(實情肥叉咗好多,和老而不拍埋有得揮)。記得早幾年有二個月左右差不多朝朝走埋耍太極,好想知佢哋有冇進步,至於班友個老頂、老而不,我就知佢領悟性進步神速,事關好多時見佢同班記者吹水,噏東話西全不着邊際,點到班友陀陀擰(呢啲咪太極精髓囉!)曾經有太極高手靜雞雞同我講,佢話:「太極易筋係有嘅,至於少林易筋就所知不多當年張三豐揹住垂死張無忌上少林寺求醫,本身就係太極高招三両撥千斤,志在將個波交畀少林以卸責!」是真是假不得而知,有冇張無忌存在過更加要問金庸,哈哈! 

    一眾人行到罄恰恰,坐低抹汗之際,大爛財突然行埋嚟似有所圖…「有何貴幹,睇你條友似足老而不、冇着數唔會笑口噬噬……望見你哋笑就提心吊膽、驚有損失! 」我笑着藐咗老而不一眼,條肥佬詐睇唔倒冷冷回道:「講到呢泛最有叻係你 十足…州官, 我望見你時、夠35度天時仍要着棉衲囉!」,我聽完之後打個哈哈、隨即問番佢轉頭:「你頭先話乜州…?」,誰知話音還未落卻被條剝咀裝正彈弓:「啊!堂堂大師傅竟然爆粗口…嘻嘻!我話廣州官之嘛!」,畀佢吹脹,無奈之下只有朝大爛財道:「叫我睇乜嘢?」「夏日炎天日最長,人人愁熱悶非常,天地也解知人意,薰風拂拂自然涼…咦!觀音籤51籤,唔多妥噃!問乜?」,對方哎了一聲遞過一張籤文:「冇,想問事業、財運……啫。」,我望望佢又瞄瞄老而不,正式道:「第一句解作超時工作,第二句你都識解架,大家做到罄、發哂爛渣,第三句係話你哋老總……嗰個正能量肥佬,佢會為你哋爭取利益。」大爛財及幾條靚聞我說話均異口同聲多謝老而不,條友若無其事詐諦睇風景,條粉腸有時都幾有義氣嘅、不過鍾意扮吓嘢啫!「咪開心往,你哋老細孤鬼寒,人工唔會加得多……薰風拂拂自然涼,前面係指太監用拂塵為皇帝煽風取凉,後面係講明皇上因此感到凉快……」,「咁咪好囉!點解話人工唔會加得奀呢?」各人聽我解析後有啲不明,我無奈嘆了口氣:「夏日炎天日最長……係指6月22日夏至前嘅夏天,夏至過後陰氣滋長,日短將逐漸取替日長……同時炎熱之中,寒氣時不時萌生,皇上自稱孤家寡人,薰風拂拂自然涼咪擺明話畀你知風吹皇帝孤乜寒…加有限咋!」,大爛財和幾條靚聽完我說話之後顯得冇哂心機。「車!你唔畀皇上因孤乜寒而要加衫呀,衫同薪差不多音,嘻嘻!」呢個時候,老而不開腔反駁道:「驚乜吖,財哥,你聽吳老不嚇你啦!內定咗包你哋滿意。」聽老而不咁講,眾人真正皆大歡喜。但唔知點解,睇完咗大爛財支籤,個心始終有啲忐忑不安,似乎有些兒山雨欲來感覺…… 

    沉默咗一陣,老而不察覺到我神色有多少凝重,佢始終係見過世面之老嘢、點會唔知我諗緊乜:「夏日炎天日最長,人人愁熱悶非常係咁,便你話齋由夏至過後,香港一路25交加衰到出年…呀!仲有,你咪話過山管人丁水管財嘅!依家在陰陽交替、煞氣交錯之際,政府忽然出招限制北丁南產(絕育),同時強硬對付丁屋僭建(損丁)」話音一落眾人大笑,我更加指住佢笑罵:「話你正能量充沛冇錯……先前阿爺南水北調截咗香港米路,依家曾蔭權又再絕育損丁…咁咪即係將香港風水趕往上山下水絕路!」,「喂!你估佢夠唔夠在任內出多招勁招彻底打遏樓市,困死上頭嚟炒樓之黑金?」老而不陰陰咀笑問,我也笑答道:「橫掂都唔撈囉!畀着我幾大博一舖以保英名而收檔。哈!我記得曾蔭權佢當年宣誓就任日子……」於是慢慢思索,寫出弱勢政府就職個八字出嚟。 

    2007.7.1.9am宣誓就職八字如下:

            

            

    「由於香港在中國之東南方位,雖然地域處首都之正南端向首,面向太平洋、源源不絕咁南水北調將生旺氣進貢北京。所以五行以時支巳火睇香港,睇埋特首添!」我一路端詳盤數一路娓娓道來:「由於五行地支三刑逢沖、雨露蔽日火坐刃…當年夏令本地接二連三地發生〔天擊地陷〕事件,再加上整個華南地區風風雨、又落雹又水浸……等等災難事故,不由不使聯想到〔事出有因並非無由〕,且看作為京畿〔向首〕重地之香港、在行將舉行〔回歸盛事和策封大典〕前夕竟然發生咁多天災人禍,睇怕〔祥徵瑞兆〕應該冇幾多應驗,而〔唔老利〕事情相信陸續有嚟。點知話口未完,4月24日中午,港島中環利源東街一個地盤旁邊卻發生地陷事故,路面五個小販攤檔連同地盤雜物下陷,4人受傷……。本來香港事故日日都有發生唔值得大驚小怪,唯獨呢單事故卻大大不同。點解呢?因為呢庶係〔香港禮賓府〕目前〔特首辦〕落脈(結穴)之地(唔信?你可以實地去勘察)。由於呢條街係港英時代〔港督府〕、回歸後〔禮賓府〕嘅(穴位),噉即係名符其實之(風水地)。若然關係到〔港督府〕、早已經過哂氣可以不理,牽涉到〔禮賓府〕亦無關痛癢可以話之佢,弊就弊在呢庶家陣係〔特首辦〕,仲有係新一任嘅(特首)還未曾正式就職、佢個(風水結穴地)就先行落陷而要(填氹),你話該唔該(煨)?唔着緊就勢係假!如果〔特首〕未(欽點)只不過一年半載貨仔可以不理,家陣唔係喎,剛啱先至欽點)完、至少還有五年日子挨,任期內真係唔知衰邊泛?唯一值得安慰可以(賴)新任特首尚未曾正式就職,衰至多衰舊時嗰個。哈哈!舊時嗰個係乜水呢?咪又係番依家呢個!」,大爛財聽到呢戍入神到口水都滴埋,同我上趟講刺岳飛後面篤佢背脊個女人……時一樣:「嘩!咁鬼邪喎!」大爛財繼續:「條友正式就任之前做緊代凸首嘅時候,咪枕住:填海、搬碼頭、拆鐘樓……等等清除風水障礙功夫,結果破壞哂自己風水局,睇番劉天賜俗語趣談所講,正一係:陸雲亭睇相唔衰攞嚟衰!」,「大前題之下弱勢政府冇運行,冇運即係民生凶多吉少,弱勢政權之下九宮飛星只論凶不論吉,財星臨門也冇料入庫房……一個唔覺意凶星到位的話,班官員仲有得震冇得瞓、唔知衰邊樣添!政權呢瓣,好嘅越好、衰嘅越衰,你越抽秤佢、踩佢越衰!」我無奈愾嘆,老而不接話:「當年6.4民運期間,香港班友仔冇有識死,好似……吳老不咁充滿正能量,百萬人上街遊行開聲埋聲話打倒李鵬。當然有北京京官提醒我咪咁得戚,因為李鵬係水利專家,亦係風水名家,當年南水北調、大亞灣核電、三峽工程等等通通由佢問責,鄧伯伯只不過喺後面睇實而矣」,聽到呢度大爛財搭咀:「咁即係話李鵬在風水做咗手腳咯噃」,話還未說完老而不即刻一句質過去:「我乜叉都冇講過下,老吳你做證!」,我哋幾個聽見又再笑到前仰後翻。「唉!響日本福島做官預期早死於輻射,香港特區做官註定夭壽於受咒!未來越接近五十年大限短命率越增,死唔去嘅也會絕育冇仔生…以後罵人最毒的說話竟然係:畀個官你做……等你快啲死,哈哈哈!」老而不吟吟沉沉自言自語,我拍拍佢膊頭:「睇開啲!人生自古誰無死?有啲宗教最近沾沾自喜,認為世界未日在即,大審判快要展開……你老而不咁正能量、咁正氣,一定會上天堂睇日出日落仲有大爛財佢哋都係罪人,註定落地獄受錢銀女人遭質!我哋都唔怕,你點解口顫顫吖!」大家又再開懷大笑。

    晨運唔係一定要周身郁郁到身水身汗嘅,有時成朝盡情歡笑收效仲大、人更樂觀,乜都睇開哂! (本篇完)

 

吳鈞洋網址:www.ngkwunyeung.com.hk

吳鈞洋電子郵箱:raymondnghk@yahoo.com.hk

 

WB01343_.gif      回首頁     WB01345_.gif (616 bytes)