小雪過後好番啲，起碼頑疾有得醫
「班友擺明捉蟲……」末見個影先聽把聲，喱種咪正宗老而不風格囉！我不敢怠慢、急急腳走去開門：「又乜料呀不哥？個天都畀你嘈冧」，老而不打開張報紙畀我睇，我落眼一望：「車！板前、板長壽司結業之嘛，有乜奇喎？」，老而不回話：「再細心睇落去……」，「啊！原來……只不過全線贈送結束」我縐着眉頭答話：「乜搞啲咁嘅嘢，萬一真應驗咪大鑊！」老而不乾笑了一聲：「你老闆，早輪你咪觸機咩叉：雙十節百歲，雙棺雙風吹，雙木乘風成林去，文昌化忌日日衰……配套入喱單捉蟲嘢去測，我認為又係大婆塊山地（凶多吉少）」，「自古帝皇由此出，探花榜眼狀元來……人家塊福田、你老而不話係山地，信唔信告你詆譭嗱！哈哈！」我邊笑罵死肥佬邊答他說話：「你條友雖然咸咸濕濕，唯獨思想有時都正確、諗嘢也有建設性，可以抵消多少罪咎嘅…… 」，講到匿戍老而不也不禁失笑：「 哈哈！你知嘛！外國科學家研究發現，凡係蘿友大嘅人、多數聰明伶俐……」，「係咩！咁你記住好好保養咪畀佢瘦囉！」我對佢扮咗個鬼臉答道：「你所講我亦認同，嗱！（雙棺雙風吹，雙木乘風成林去，文昌化忌日日衰）正好道出兩塊板兩件木……將一語成讖，文昌化忌日日衰……講得嚟啱喇！睇佢幾時真執笠。」
跟住老而不又開腔：「匿輪外頭帝國主義國家冇個掂，我哋祖國繁榮富強應該值得開心架。相反內心卻終日忐忑不安，原因係國內又再高唱大海航行靠舵手……咪話聽到歌聲、就係聞說也即刻毛骨悚然！」我聽完佢講之後拿拿淋起出出年個命盤：「係咁之嘛！唔使慄wo阿doy！你睇吓出年個八字就不會大驚小怪喇，壬辰、壬寅、乙未、乙酉。不哥，你有乜發現呢？」，「全木局，水弱、缺火、金損…… 」老而不答。「冇錯，五行偏枯，所以明年好極有限。配套入關係法：乙未為巽係毛，壬水為坎係澤，寅辰拱卯為震係東……玄機一早測定老毛陰魂不散，並且追殺帝國主義者（酉金）哈哈！」，老而不睇完個八字也覺得好笑，之不過冇耐塊面沉了下來：「陰功！你睇舊金幾折墮、縮埋一角。照咁睇，明年歐洲應該全面揸兜……」，我好肯定咁答佢：「冇錯！話西方、西南……掂嘅除咗我哋特區不講零正、命名不論部首、批命不論用神八法……嘅長毛大師之外，斷估略有風水知識之人都不會發表意見咁笨！」大家相顧發出會心微笑。隨即老而不再發問：「喂！吳老不，你點睇今年第四季投資市場？」，我沉吟了一陣答道：「今年二五交加夾東南，大雪後年月五黃二黑打孖嚟，冲激起煞氣……講到明年東南，由今下半年衰到出年係正路。你睇下八字喇、金寒水冷土結冰，五行欠金缺火……我覺得投機市場不過冬至幾難有轉機……還有，整個冬季天災人禍相比往年有增無減……」，老而不插發問：「咁即係話12月22日過冬前後股市會有喘定、反彈………機會？」我笑着頷首認同：「11月23日交入小雪，匿個節氣其名艷如桃李冷若冰霜………所以許多女孩子都喜歡取之作名。雖然小雪之後嚴寒加劇，惟過冬至後一陽萌生，象徵隆冬將不久、溫暖已在望。12月上旬交入大雪農曆十一月，月令雙五黃二黑叠飛正東正南，當然受災地區勢必禍不單行，慶幸斗數太陽化祿天府化科……五行殺旺用食制。至此萬物衰極有個譜」。
發嗡風至此大家都有啲肚餓，於是乎話之佢世界未日，最重要係祭肚為先！(本篇完)
