端陽佳節催文昌
年年難過年年過，講講下又到芒種月、亦係端陽君上座時節。湊咁啱得咁橋我公司附近有間屈臣氏執笠（當然唔會認執笠，只話搬遷而矣。）嗰日經過，見到花園街天文臺（柒蚊雞）響戍指指點點：「我同你講，這間舖一旱應該執笠！」我問道：「此話怎講？」答：「它名字叫（屈臣氏）你哋廣東話意思不是老屈個大臣至死！而哪個大臣不就是屈原嗎？」我聽後覺得似乎有道理，實際上卻是無理取鬧……但不禁好笑。
記憶中雖然差不多每年5、6月都有大事發生，但感覺上今年最立立亂。家陣仲未交6月芒種，而整個東南亞；國有國劍拔弩張，民有民刀光影…… 。有人話年內：甲午年係祝融司權「火燒青龍天馬行空，甲庚子午沖出兵戎」，怕係卦、年內飛星九紫入坎宮，莫非祝融共工、水火不容又再打餐死！
講到端午節係人都識，唯獨提到端陽就考起好多人。記得去年端午節我和老而不成班友去晚餐，當時個靚女部長走嚟問乜嘢叫「端陽」？佢咁一問自然中正老而不下懷，自然又講三級半笑話：「小姑娘，你知不知道甚叫端？」答：「正、直、不歪、不斜……普通話也可以說是奉茶，或把目標攻下……」眾人聽後解釋都撫掌稱讚，老而不當然讚口不絕添、但係啲衰嘢亦跟住出籠：「叻女，認真叻！咁再考下你啦，陽係乜冬冬？」答：「嘻嘻！肥佬咸鬼濕……」，老而不可得戚矣：「將正、直、不歪、不斜……等等好嘅形容一齊配套入個陽字，咪端陽囉！」話音一落哄堂大笑，而靚女部長卻臉紅紅無言定開。
據《荊楚歲時記》記載，因仲夏登高，順陽在上，五月正是仲夏，它的第一個午日正是登高順陽天氣好的日子，故稱五月初五為“端陽節”。
五月初五係前半年裏面最熱的一日，在《易經》卦裏面，代表著陽卦。所以端午這一天也是陽氣最旺的一天，許多地方民間俗例都選擇呢一日中午陽氣最盛嘅時候，用艾草、芙蓉和抹草……煮水，沖涼沐浴，以祛除身上的晦氣滯運，藉此強身旺運。至於五行陰盛陽衰、 健康欠佳的人群，也可以選擇在端午節這一天的早晨起來沐浴陽光，用五月五的正陽之氣來驅除身上的低迷運勢。除此之外，也可以，將瞓覺嘅枕頭、被舖攞去曬太陽，不僅可以驅除枕頭上嘅灰塵和細菌，仲可以淨化自己情緒，改善睡眠質素，增進健康運勢。
有啲地方仲過癮，直情將端陽節打造成「女兒節」由初一至初五，家中少女一律打扮成靚妹、仲有咁靚時整咁靚。作用係採陽補陰，以陰精採純陽。更加有啲女人響端午節正午時分在海灘遮遮掩掩晒「吉穴」，咪話佢哋戇居，查實好有改運效果。
之不過喱日故老相傳不適宜辦喜事，事關端陽日過剛而搶盡陰氣，若然鸞鳳和鳴婚嫁日子，容易半世夫妻結尾。
今年甲午，甲木端正、午火炎，火由下低燒上去即如火燒旗杆，燒燒下變長炭…… 冇得端矣！所以太陽化忌，陰精得勢陰盛陽衰。年內逢馬有劫，係陽都衰。
甲午年桃花文昌方位在中宮、西南、東北（坤、中、艮）端午節芒種月財星文昌分別「坤中艮」。可以擺桃花陣催谷。(本篇完)
