八字時辰好重要
女強人僱菲傭，首先傳佢年月日俾我，諮詢是否請得過？要求「誠實，忠心，不落隔，不溝仔……」。
我一看六字：丙寅 丙申 癸丑，即刻叫佢閘住先！事關日元癸、朋丙出干，提綱申金被年支寅沖破，有如遇上五級大火而所有供應鹹水街喉壞晒。命格明顯財多身弱因財壞印，何止冇樣及格，仲分分鐘被人利用偷錢添！
女強人聞後二話不說即時趕去僱傭中心取消臨時合約。也不知是賓主有緣還是對方有運，原來對方有出世時辰，於是苦苦央求睇埋時辰先至決斷。於是乎女強人抱著萬分一機會再來見我……。
誰知編出命盤一看，雙眼恰似陳寶珠首歌歌詞：兩隻眼核放光……庚申時柱格局蛻變成「用財壞印格」皆因雙丙透干惟金強聚黨而沖破寅木斷絕火根，終身努力求火尅金（金強印重壓力大，不能不用財壞印以求心理平衡）如此一來追求物慾心強烈貪小便宜乃天性使然，正因如此先使未來錢便成了習慣，被人利用擺上枱是意料中事。最重要一點係個人性格剛銳之極兼且詞鋒銳利得理不饒人。
細節可以參考紫薇斗數：紫相身宮沖破軍辰戌羅網，貪狼福德照廉貞化忌財帛寅申（正是八字年月支寅申沖）。
女強人聽我解釋完之後不禁搖頭想話起身走，我及時微笑舉手示意之稍安無躁：「其人性格雖然如此，但好處在於肯負責任唔衰得，猶其是女主人只要給予小恩小惠，佢可以為你上刀山落油鑊，上面所講被人擺上枱正是如此。嗱！你睇佢命宮武曲天府對 沖七殺會照殺破狼，纏昌曲三方四正，天府之謹慎在命運中起咗主導性作用。再睇父母宮太陰太陽丑垣會照機月同梁而天梁守最差之巳宮祿存同度，天機化權。意味住能旺女主人也甘受之牽制（做馬騮），唯獨不利女主人婚姻及少男丁……。」
女強人聽完笑答道：「反正都唔指望再有婚姻呢層冇乜相干，怕只怕佢響外頭衰感情俾人呃爭落一身債咋！」我掃咗一眼命盤天梁巳垣交友，廉貞化忌申宮財帛……也不敢多加說話。 (本篇完)
