陽梁廟旺終身因男人煩
某日有位俏婆娘到訪，但見佢懸針侵破印堂，加上落落寡歡樣子予人鬱悶感覺……心中測度咁個款條命好極有限。坐低冇耐即報上出生資料，開盤一look不禁戚眉，於是乎微笑問道：「太太你本身有冇神經系統和婦科、乳腺……諸般疾病？」答：「家陣五十，自幼開始終日跌親，年輕時子宮已有肌瘤，乳腺暫時冇事。大師點解咁問？」我回道：「事關你八字五行缺水而土旺，須知土旺必剋水在先，水主：骨和婦科故發生禍患必在上述器官。最重要係斗數天機化忌陷宮守巳垣而纏天壽，身宮酉垣無正曜照卯宮太陽天梁喜太陽化科……」
婆娘聚精會神聽到呢戍搶話問道：「講到命理我也略懂皮毛。大師，唔係話身宮太陽天梁有管理天份咩？」我抬頭望了她一眼：「冇錯！但天梁本身更有解决麻煩的本能，受日照雷門嘅太陽光芒影響自然做事得心應手。唯獨不可不留意本身命宮係落陷天機化忌纏天壽，即係話天梁解厄天份肯定越解越煩，特别與太陽同宮而涉及此類别的人和事極頻密。」婆娘：「你係指同我有關係之男人和外國人？」我回道：「正是如此，同時因為命中天機化忌纏天壽，主要應驗一老一嫩人等……」婆娘略沉吟頷首道：「咁又係喎，我後生嗰陣老竇肝癌走咪應天機，個仔自閉症又驗天機，自己子宮肌瘤更驗……該煨囉！第日會唔會應埋個老公架？！」我笑道：「係應佢都八十開外啦，之不過夫家一老一嫩肯定令你好唔得閑。嗱！仲有你命纏天壽、斷估老公一係細過你否則大過你冇拾年都有八年卦？」答：「佢大我八年。」
我繼續：「但同時太陽天梁而太陽化科，老公必然位居管理階層。至於你身宮事業照夫宮應該揩到管理天份少少、解决麻煩機會卻多多……呵呵呵！」婆娘聽到呢戍不禁黯然神傷：「半世人工作辛苦已不為人知，還要擔心家人，便你話齋、夫家人口最濕滯。」我安慰道：「但你八字五十七歲後行30年水運而旺夫旺財呢，你冇計入去噃！」婆娘聞言微微頷首忽然若有所思：「大師你一味評論我命中男人犯忌，咁女人呢？」我莞爾笑答：「同你有關係之女性均醒極而無與倫比，唯獨心理、乳腺、神經……等等系統均有毛病甚至頑疾。家陣最易中招係令壽堂和令千金……老嘅無能為力唯有調理，後生嘅最好出國。」我嘅說話基本上解開了婆娘心結，因為見佢離開時面露發自内心笑容。(本篇完)
