吳鈞洋師傅其他文章

                                                文•吳鈞洋  

中國走資美國共產

       今年都幾奇怪wo,新正頭已經咁叉熱,難為我哋呢班「有份量」人仕,終日付出多收入少(汗流夾背兼冇胃口),有時真羨慕班「涼血族群」,點解人家冇汗流呢?嗰日出街食完晏行緊返公司,邊行邊忟憎自己「收支不平衡」問題,又用欽佩眼光E下仲大件細件裹着身嘅男女,如是者越諗越激氣……

    「跌咗錢啦,四眼佬!」聞得有人大聲叫,於是乎慌失失向地上搜索、並且禮貌地揮手連聲說「唔該!」。然則塊地不知幾乾淨、廢紙都冇張,正在納罕間、抬頭卻見老而不條粉腸戙在面前望住我瞇着眼笑。「揾到着數咧,開心啦、死老而不!」我橫了他一眼嗔道,「冇,見你頭耷耷唔知諗緊乜,提醒下,驚你撞倒啲靚女就唔好啦,嘻嘻!」老而不烚熟狗頭般答道,我笑駡道:「睇見你副衰樣就打泠顫……想去邊呀?」,答:「正想揾你……」,我笑笑口答道:「好似冇乜着數畀你揾噃?」,老而不佯作怒狀:「超!你幾時有着數畀我揾過?有都係我益你多。」,我笑道:「咁又係,之不過你益來嘅都係鹽倉珍品居多,唔係點啱使。」說到這裡大家相對哈哈大笑。

 

    一路行一路笑語着,忽然聽到老而不轉腔唱起歌仔上嚟:「二十連連,三十天天,四十周未見,五十打禡祭,六十聽拜年,七十告老歸田園」,我見他配着音韻唱得幾好聽、歌詞也幾得意,不禁問他:「老……嗡錯,大編輯至真,你究竟唱乜?」,老而不神秘地笑道:「練功歌嗻……」,我沉默一陣、聽他唱多了一遍:「練功?你條老淫蟲!」,老而不得意地答道:「咩呀?養生歌之嘛!」,我不以為然道:「養精至真卦?……你睇下幾多阿伯上去東莞、番禺……買屋呀,等你七十告老歸田園嗱,超!」,答:「唔係退休上去買樓養老咩!」,「唔使審,你條粉腸梗係有份……」我還未說完、老而不已先行舉手示停:「唔該你嘞,獅虎!算我唔着、咪咁大聲愁死冇人知……咪講嗰啲衰嘢。我嚟問你先,你網誌最近好叉熱鬧,留言薄內有位讀者buzisowei、係唔係你獅虎嘅化身呀?」,「咩呀,我網誌留言薄?」我表示不明,「呢!叫人去西九龍買樓嗰位呀……」,我剎時醒覺:「呵,嗰戍!,梗唔係我啦!不過條友幾有料架。」,「我應該叫班朋友睇下,你知唔知為咗呢個(零正)問題,呢幾年我費咗多少唇舌呀,獅虎!」老而不嗔氣道,「攞嚟煩……使乜嗻,你叫你班Lo友去我網上舊作:(術數學堂)第14項睇 風水進化的歷程.咪瞭如指掌囉。好啦!咪討論呢個細佬哥都識嘅問題嘞。」我沒好氣答道,「唔係呀!好多細佬哥唔知敦倫先至有細佬妹架,嘿嘿!」老而不語帶雙關譏諷道,「睇怕當今天下只有你老而不一家才咁憨居……」語畢彼此又哈哈笑個够。笑完之後老而不不禁又再唱道:「糧冇加、糧卻加,成日咁加由佢話……」,我得戚答道:「好彩我戒咗煙唧!」,老而不顯得不忿:「挑!你以為戒咗煙有益呀,人家鄧小平就係靠(熊猫牌)至活到九十歲有多……如果唔係班(壞分子)夾硬要佢戒煙,邊會咁快死……嘻嘻!」條粉腸說着說着自己也忍不住笑了起來。「喂!咪再嗡你嗰啲歪理嘞,等陣畀(控煙辦)聽到、拉你老而不告將官去……」我道,「哈哈!又係(告將官去)名句……唷,我好驚呀!」大家又嘻嘻哈哈笑將起來。

 

    這時候見到個南亞裔人攬住個賓妹煙煙韌韌地走過,被老而不眤到又忍不住開腔:「依家啲阿差就威啦!好似香港人上大陸……」,「你死嘞!說話岐視少數族裔,又要(告將官去),嘿嘿!」我調笑說道,「挑!唔叫阿差,你教我叫乜嘞!」老而不沒好氣回道,「可以統稱南亞裔人……」我答,「咁嘅話,叫警察做差人都係岐視嗻!」老而不強詞奪理回道,我微笑說道:「乜都好啦,總之老而不永遠是對的……講番你頭先個問題,人家南亞人在香港溝賓妹非但唔使花費雀粟,反下手還有鴨銀袋。邊似班(港燦)傾家蕩產養北妹仲分分鐘冒家破人亡之風險。」,老而不聞後也不禁點頭稱是。

 

    行行下、忽然見到隻大老鼠響坑渠口竄出而成過街老鼠,瞬息間「不幸」被幾個大漢戳殺了……「大老鼠慘遭(毒手),神兆機動適逢中國國寶(鼠、兔)在多舊魚嗰度拍賣,要知道鼠、兔本身係子卯相刑,唔使問阿貴,撒爾科齊肯定大卵鑊……」我剎時沖動推斷,「何以見得?」老而不問,「條扑街55128日生,三柱(甲午、丁丑、己丑、XX,目前53入咗癸未運)天剋地沖。今年己丑。日柱犯伏吟衰過年柱犯太歲。喜神甲木己土合去,限星癸水乘勢剋丁。秋後必爆大鑊!」我屈指推算娓娓道來,「唔使算都知兜友唔會做得長,冇理由布殊仚旗、佢仲有得do」老而不顯得有些招積,佢呢份人不嬲係咁樣、樂極忘形時一定認屎認屁:「我仲預測未來日子中國繼續開放,堅定不移地地走(中國特式資本主義),反觀歐美卻中移動地轉行(歐美特式社會主義)……」,我頷首認同:「乜叉都收歸國有……遲下仲會發糧票、肉票、日用品票……」,老而不聞後大樂:「還有美僑證、高價證……哈哈哈!」,我也笑到淚水都出埋:「第時美國人出國要申請,國民高呼:(打倒XX帝國主義)呵呵呵!」,老而不打趣道:「喂!你嗡清楚啲XX帝國主義呀?」大家你一句窒我,我回一句潤你,如是行行下已到了公司笠口。(本篇完)

 

吳鈞洋網址:www.ngkwunyeung.com.hk

吳鈞洋電子郵箱:raymondnghk@yahoo.com.hk

WB01343_.gif      回首頁     WB01345_.gif