澤雷隨，普世歡慶甲子歲
期望中，普天同慶之中華人民共和國建國60周年（甲子）慶典，還有個零月即將到來。或者某些別有用心嘅人會衰多口話：「聖誕節普天同慶係人都認同，
60周年國慶之嘛！有乜咁大陣仗啫！」，之嘛喎！呢舖話法一定要戒，大話怕計數，敢唔敢輸倒普天下之中、認同中國嘅人多抑或低貶嘅人多吖？
講到國慶斷唔能夠撇開毛澤東唔講，作為世界上人口第一多大國嘅開國元勳來說，以佢個人之霸氣和煞氣，斷估曠古絕今冇乜邊幾個同佢有得揮。佢在生時殺盡「壞分子」令人神聞風喪膽，死後聞說因鎮懾得住酆都而登上「鬼皇」寶座令眾鬼俯首稱臣。
懷着雀躍之心情迎接甲子國慶來臨之際，自然而然會諗起開國元勳們過往偉大之事蹟、腦海中也熱氣沸騰地對他們肅然起敬，當中猶其回味着毛澤東膾炙人口嘅豐功偉績，諗諗下……忽然間泛起一絲無厘頭念頭：「應該點稱呼毛澤東先至啱？」，如果稱佢做中國國父吧，或者佢威啲、唯獨和孫中山先生比較似乎有先後之分而顯得混淆不清。不如尊佢為黨父吧，之前卻有創立人在先、硬套用上去未必講得服班歷史學家。至於跟隨國內人稱呼佢做毛主席掂啦啩！唔……好就好嘞！但叫起上嚟總覺得有啲瑕疵，事關乜叉社團嘅阿頭都可以稱作主席，就連貴利公司嘅持牌人也叫主席，至於我屋企立案法團嗰個主席更加係姓毛嘅添！
呢啲就係世間事未必盡如人意嘞！閑話表過而言入正題，我呢個人好鬼得意，只要諗起、講起某個人，而對呢個人產生好感又落足感情嘅話，不自覺間就會打個冷顫而急尿、仲有係模模糊糊好似有啲嘢上咗身……好多時因此而「捉到機」，呢種經驗屢不爽而有時仲好得人驚添！
好似今勻提到「甲子國慶」又諗起毛主席……自自然然聯想到中國國運（做人梗係愛國為先）。如是者打起冷顫、跟住急尿……係咁就捉起機上嚟而占咗支「梅花易卦」。
由於普天同慶即喜悅，喜悅卦取「兌為澤」為沼澤、為毛澤東名字中間個澤字、也驗西方兌金。六十循環之「甲子」為東方震木係理所當然，震卦為東、為扯火、也是毛澤東名字中第三個字。六十年一個循環之「甲子」與「澤東」都異曲同工水生壯木之大象……。於是乎神兆機動地捉機起咗支「澤雷隨」卦，（兌金劈震木有如刀仔鋸大樹，刀口崩咗而出不得聲，好明顯地擺出個大象係：「東風壓倒西風」。由於起卦時在午時，卦變初爻而變卦「澤地萃」，兌卦卦體，間爻「風山漸」。呢支卦嘅意義係：發揮積極性，廣交天下豪傑，順應時勢以成大業。
我不嬲對毛主席眾多詩詞歌賦都極之欣賞，之不過情有獨鍾係佢響三十年代所寫嗰首「崑崙」念奴嬌，節錄尾段：「而今我謂崑崙：不要這高，不要這多雪。安得倚天抽寶劍，把汝裁為三截？一截遺歐，一截贈美，一截還東國，太平世界，環球同此涼熱。」
在詞中，毛主席一早已占測到中國將與歐美平分天下，仲有係藉題目「崑崙」二字，好明顯地指出喺戊土八運「大山」主事之際而實現，還明確預言到在整個八運廿年間，世人將爾虞我詐兄弟無親、天倫無情地鬥個你死我活（在山之下，昆欠仲而侖缺人）。
嗱！早在幾拾年前毛主席已經有咗非常準確嘅預言（威過劉基之燒餅歌）。主席話，未來中國肯定繼續強大下去，事關佢認定在交入2004年東北艮土八運「山主事」之廿年間，崑崙山將一分為三截，其中兩截借又好送又好、分別發送往歐美大洲。從此，歐美地域將「執到寶」而有排煩，皆因「崑崙」山下似乎冇乜着數嘞！唔信咪睇下崑崙二字點寫？揮出去之兩截崑崙未來一定要還原，到時連同收回來嘅「寶藏」，中國將進一步繁榮富強。
至於我所占嘅卦係印證出毛主席之預言：卦體兌卦為喜悅，用神坤卦為大肚腩女人、也屬八、是土地。如果以卦「坤土生兌金」而論世情，即係話國運和民生，前者興隆繁榮並富強，後者豐食足食且美滿。係美好嘅，民生衣食豐足因而充滿喜悅，正合乎卦義：發揮積極性，廣交天下豪傑，順應時勢以成大業。
之不過，好驚樂極生悲！我以前曾有文章提及到：過於〔順與平安〕則容易流於安樂、安逸之弊端，設若恣情逸樂必然喪心敗志，故宜戒之。
如果唔信邪而縱情聲色，暴斂財貲，官有官貪、民有民貪的話，毛主席「崑崙」詞中最後一句：「太平世界，環球同此涼熱」可以解釋為：一個運勢循環之後，唔知乜世界，總之好自為之啦！
