紫氣東來、喜擋百災
嗰日難得有空閑，約咗大編輯和經紀陳飲早茶，諗住飲完茶周圍貢下、順便買番啲日常用嘅「雜吧冷」。
去到酒樓，一路埋位、大編輯一路抹着汗，吟吟沉沉響戍咒駡個天無良、點解唔降低啲溫度以益佢老人家。「老而不，何不做鱉呢？浸在水中幾咁凉爽……反正你個身形似到十足……哈哈！」看在眼內、我不禁出言調侃，經紀陳也瞧到他那副怪雞樣、瞇着笑眼加把口幫腔：「女人30如虎、40似狼、50十足鱉，嘻嘻嘻！」，我和大編輯聞後有所不明、因而同聲問道：「點解呀？」，經紀陳則有心吊胃口：「嗱！咪話我咸濕，聽人講咋！畀鱉咬住、打雷才鬆口……哈哈！係知咁多。」我和大編輯聽後心領神會而笑罵他抵死。
開茶洗杯沉默咗一陣，大編輯開腔道：「老吳，你咪提過港深邊境河套區嗰塊不毛之地嘅，最近唐唐同上頭密斟緊開發細節喎！」，我陰陰咀扮了個鬼臉：「花莖不曾緣客掃、蓬門今始為君開……老處開苞，落紅有期矣，哈哈哈！」話音一落，三人齊爆笑、笑到眼淚水都出。「第時嗰度肯定變成三不管地帶，中央鞭長莫及、自然下放權力，橫掂塊地係贃番嚟嘅、深港政府肯定側側膊放軟手腳。於是乎燈紅酒綠、紙醉金迷，三教九流之輩又多咗個好去處。」大編輯繼續：「到時又變成九反之地！青龍崛起噬白虎，如果真箇處女地開苞的話，恐怕澳門第一個yah蕉！」，我呷了啖茶點點頭施施然地接話：「響（神兆機動）效應之下，點止馬交衰呀，睇怕整個西方世界將面臨沖擊！」，經紀陳聞後不禁咋舌：「乜咁大鑊呀！係否牽一髮而動全身呢？」，我和大編輯不約而同頷道稱是。
「喂！吳師傅……」經紀陳繼續發問題，但佢說話鄉音未全甩而引來大編輯笑柄：「唔舒服……你呀？」，經紀陳回道：「唔使咁嘅老而不……咳！啋你哂氣。老吳，你上個月嘅預測好似中咗大部分喎！」，我漫不經心地回道：「係咩！係唔係立秋風水嗰部分呀？」，經紀陳點頭稱是：「嗱！總結來說：美國參議員愛德華甘乃迪和南韓金大中前總統去世，後者年內計埋死咗兩個總統，睇嚟為金正日消了大部分災和有望過得埋今年。仲有外電證實咗塔利班頭目阿馬哈蘇德在美軍無人機的導彈襲擊中被炸死。另外印尼警方和反恐部隊也證實，在中爪哇省的反恐行動中，擊斃了上月策動襲擊雅加達兩間豪華酒店的主腦努爾丁。至於財經方面，8月份恆指調整至萬九點，睇怕白露後必然再復升勢而迎國慶也………」經紀陳一輪咀說下去，大編輯聽聽下好似唔多耐煩：「鬼唔知（唔舒服）佢叻咩！嗱，老吳，咪鬆毛鬆翼先，講到寫文章、你認真唔衛生，叫我做老而不叫得多矣，難道呢個稱號唔配你咩？」，我朝他瞇瞇咀笑道：「咩呀！（老而不）三個字係你嘅品牌商標嚟架、誰人敢侵權呀？」，大編輯不忿：「好似你寫甚麼：張開大髀而走光、謂之太字……」，我回道：「你試下用手指寫個（太）字、睇係唔係張開大髀而走光呀？老而不！」，大編輯用手指指我不知好嬲抑或好笑地搖搖頭欲有所言……但卻被經紀陳搶閘：「老吳，我也見到你響blog處答網友、話乜天狗食日中之日自然而然係「青天白日滿地紅」，馬英九三字中、馬屬乾卦而乾為天，馬總統可以說是天九中之九五尊……」，我答道：「你話唔係咩？」，大編輯接着說：「所以話抵人哋共產黨叻啫！紅色國旗避開太陽不用而選星星，費事日光白白一舊烏雲吹過搶哂啲光芒。自家五粒星而星光燦爛、永遠長霸夜空，以陰制陽！」
「老而不，你噏咗成朝、呢段說話最啱聽！」我拍掌附和：「記唔記得早輪我哋嘅對話？」，大編輯得意地答道：「梗記得啦！風災水患，地震海嘯，礦坑倒塌，冧樓爆炸……等等災難將一波疊一波……仲有係舉凡大人物，越大越應數，個名有：日、明、光、輝……等等部分嘅人、特別係男人，多數有難……火虛土弱、金寒水冷，加上世情虛無飄渺，未來股市、樓市……等等投機市場有如鏡花水月得不到實質數據支持利好，斷估立秋後會有一次似模似樣大調整，猶其股市，有貨在手嘅散戶要小心在意矣……」
大編輯有如數家珍般說下來，經紀陳聽着聽着不禁輕拍檯面：「老而不好記性，咁多細節都記清楚」，大編輯聽後、睇得出佢鬆毛鬆翼，事關佢背脊翼位兩舊骨好似響戍抖動故也：「老吳，嚟緊呢個新曆9月、（白露）節令又有乜預測以益大眾？」，我聞後𠲖𠲖哦哦地、拈起手指打起官腔：「這個嘛！這個嘛……」，「嘛乜叉呀，扮哂嘢！」大編輯忍不住噴了我一臉屁，隨即递過紙筆：「嗱！紙和筆響戍，爽手啲啦！」，我抬起頭舊了他一眼、笑罵道：「死老而不！」跟住寫出了白露節令八字：己丑 癸酉 乙卯 丙戌：「乙卯日柱生酉月，地支酉丑會局而解卯酉之冲、日時卯戍之合大可親和燥土以固根莖，時干透丙火陽光、深秋足以調候溫暖並進行光合作用，月干透癸水混和年干己土，濕泥帶暖而養木有功。整個局面：上下左右相生相輔、拱衛有情，溫暖濕潤沐雨櫛風、既濟恊調。預測中國甲子國慶慶典將在全中國各族人民、全世界華人大團結之下歡欣隆重地渡過，舉國歡騰完美無瑖地結束。時空值（白露）節令而五行調和，有咁樣嘅神兆機動之發生，大可以預見未來全球經濟漸現復甦曙光。至於呢個月、大單嘅天災人禍應該會少咗……」，聽到呢戍大編輯忽然打叉：「時空吉兆真係可以擋百災咩？」，經紀陳點頭附和：「好似得嘞！你冇聽過一喜擋百災乎？」，我聽後不禁頷首微笑：「歴來七八九運（紫氣東來），詩有云：紫垣遣使非常例，應有星文動九霄。正係神兆機動之效應」。
話音剛落，酒樓電視大銀幕傳來一片歡樂熱鬧嘅聲浪，原來係北京市進行甲子國慶慶典封路綵排，人流和聲浪拱托出無比歡樂的氣氛，我們在電視機旁的觀眾也備受渲染而不禁神往其間。
