浩瀚北水向南流，有人歡樂有人愁
由於有啲濕星嘢要搵老而不幫手、所以上佢報館。還未行到辦公室已經聽到佢聲大大在鬧人：「唉喲，yiah蕉囉！yiah蕉囉！人家日日充滿朝氣，而你條友仔yiah完蕉後卻充滿蕉氣……」鬧到呢度佢自己也不禁噗嗤地笑了起，一眾同事也忍不住跟着咧開嘴笑。老而不望見我笑着點點頭，隨即又繼續噴其口水：「成日教你靜坐常思己過，諗吓自己有冇蝕底畀人。閑談莫說人非，說人非有叉用咩，行動先至真！」，「嘩！有冇搞錯，好好哋一句處世格言，畀你亂噏一通竟然好似光棍佬教仔，將意思改變到唔係思過而係想尋仇咁」我邊說邊留意畀佢鬧嘅係乜水，睇清楚原來係條廿歲開外靚仔，見佢嘻皮笑臉模樣、已經揣測到兜友惡教，老而不平日唔畀佢激奀先至奇，於是朝他打趣：「細路，做錯乜激到老總嘔白泡呀？」，答道：「佢話我篇文章唔知寫乜喎……」，「呢！叫佢做篇專訪啫，寫埋人家有幾多個契家佬，你話係咪該煨呀？！」老而不脹紅了臉將疊稿紙劈在檯面怒道：「快啲攞番去從頭寫過，我明早要見稿！」，「係喇，老腫！我（床）頭嚟過，保證令你滿意……嘻嘻！」條友鬼聲鬼氣用半咸淡普通話潤了老而不一記，執起份稿急急腳地閃開，後者無奈地望住佢背影嘆了口氣再拎拎頭。
「大帥，最近氣色唔錯噃，是否做唔切？」老而不望着我打了個哈哈，隨即接過我要佢代勞嘅文件說道：「兩天內幫你搞掂。喂！你在Blog寫僧凸首，香港島嗰頭風水真係咁差咩？」，「你話呢，風水係咪差另一回事，重要嘅係佢畀你哋班報紙佬啫到恆，睇怕唔挨得幾耐囉！」我答道，老而不接話：「如果報紙佬唔啫恆佢，等佢勾結完本地奸商、再出賣本地利益畀上面班貪官，到時香港廣大民眾聽（揸兜）連咸豆都有冇粒食。唔係我話，香港市民唔做得順民架，越做順民越會被統治階層蝦，嗰班根本唔係人嚟架！」我對老而不嘅說話有所醒覺，也體會到所謂報紙攻擊「僧凸首」，只不過係借佢過橋而矣！。
講到呢戍，老而不有兩位男女同事走埋嚟，介紹過之後原來都係編輯，男嘅姓高、女嘅姓文。首先高君開腔：「吳大師，講開明年太歲，屬猴嘅歲破，紫微斗數又天同化忌，我今年買咗本運程書，咁橋寫書嗰位大師個名叫（候天同），睇嚟佢明年咪好濕滯？」，我答道：「哈哈！你都幾心水清噃！天同屬水、至少位大師佢身體以下部分肯定唔多妥先」，老而不搞笑發問：「下低邊度？」「太陽巨門是也，嘿嘿嘿！」我陰陰咀指着佢笑答道：「死老而不，唔衰嘅唔攞嚟講」。高君、文小姐唔知我哋噏乜，只有陪着笑的份兒。
忽然間老而不若有所思地朝着文小姐笑笑口：「你咪想買樓嘅，近住城隍何不占支好簽呢？」，文小姐也打蛇隨棍上笑問：「我條命五行缺火、依家住響何文田山，聽某啲師傅話八運旺西和西南，本來想搬過去，但畀老總規勸才打消呢個念頭。今勻真係要師傅你指教囉！」，「乜說話呀，你哋老總都識架，仲好叻添！」我極力推荐道，老而不接話朝我說：「咪謙啦，你專業嘛！」，我點頭笑道：「好喇！恭敬不如從命，你最適宜住香港、猶其香港仔嗰頭，切記買樓要有南風窗、千祈咪住食西北風嘅屋」。呢個時候高君插咀問道：「講開睇風水，係咪搵個行緊運嘅師傅着數啲呢？」，我答：「呢個係必然、普通常識嘛！」，高君繼續笑問：「咁，風水佬若然標榜自己富有而且物業多，係咪顯示佢有運？」，老而不聞後插咀道：「NO！咁即係表明你同佢都冇運行，事關江湖錢江湖花，風水佬係江湖中人，若借用玄機之術而斂財發富、必遭天譴而多有報應。至於佢行將遭到報應而閣下卻去搵佢、亦預兆閣下嘅運已經行得七七八八矣！」，高君和文小姐聽後不禁伸伸舌頭，我則微笑點點頭。沉默咗一刻，文小姐又啓齒發問：「我有個朋友個老公響大陸收埋隻九尾狐妹妹，於是搵高人幫佢老公化桃花。佢老公肖鼠，高人教佢響廳中央掛隻大貓……」，老而不不等他說完即搖頭搭口：「你位朋友即係想個老公死啫！」，文小姐嘆咗口氣點頭：「老總講得啱，佢老公冇耐交通意外去咗，唉！」，「冇法喇！貓屬虎科，交通工具統稱入市虎嘛！」我搖頭感嘆，呢個時候老而不好似充夠電、精神咗兼夾有中氣：「老吳，引用你本月〈風水擺設〉內文嘅說話：由於火炎上催谷，預測投機市場仍有一陣虛火炒一頭半月……最怕月中10月23日霜降中氣過後，來月五行濕木鬱火了無溫暖，加上五黃入中宮之氣已進，尚在投機市場來不及較腳者宜小心矣，真箇稍一不慎分分鐘冧樓死人……弟兄們要祈求∼主耶穌打救自己……
嗱！你噏咗咁多、即係詛咒投機市場唔掂啫，快快趣趣從實向一眾讀者交代清楚……可免你死罪，哈哈！」，「要死幾大攬埋你老而不一齊上路，事關你熟路嘛，嘻嘻！」我扮作擁抱老友狀而唱道：「老而不，我哋相擁抱相偎傍、雙雙拜會拜會阿阿拉……」，老而不卻陰着咀笑回道：「乜唔係去搵耶和華天父咩？阿拉嗰戍我唔識路噃，騎騎騎！」說話引來哄堂大笑。笑過之後我接續說話：「既然上不成路，唯有向一眾讀者教路矣！我在網誌有篇講是非根嘅文章、內文用咗個嬲字，即刻有聰明讀者用之斷事。如是者我也因應玄機而將（嬲）字起梅花易占現實。（嬲）為男女男，即（震兌震），卦成（雷澤歸妹）變震四爻而成（地澤臨）。卦體為（兌）、用神為（坤），間卦係（水火既濟）。整支卦是：開心、得米、喜悅……之象……」，老而不朝我嚷道：「咁籠統即係點啫？你唔做得唔解釋清楚架，大帥！」，「死老而不，咁叻不如你嚟解嘞，事關你年紀老、經驗好嘛！」我瞋了他一眼嗔道，老而不頓時騎咗上了虎背、成個「庚寅」咁款晦氣答道：「嚟咪嚟，驚你有牙……嗱！聽住囉，（坤係土）、雖則有生育之意義，戌月占亦當時得令而旺盛，唯獨坤有拖延阻滯嘅大象、就算好都嫌瑕疵唔少。事實上（兌卦）的而且確係：開心、得米、喜悅……之佳兆。所以支卦係好卦，至少手頭上有股票、房產……嘅普羅大眾唔使驚青，大象判斷：年內十二丑月會有一次似模似樣嘅升勢，樓、股皆然，明年夏天持續好景。至於幾時世界經濟復甦呢一層，推上去似乎要到：2013、2014、2015。之不過目前水旺月令，農十月、十一月兩個月都唔睇好，玄機係水多剋火、水多土蕩之故也。」話音剛落各人皆拍手掌叫好，還有不少在「拍的臣」做緊嘢嘅同事也走埋嚟八卦。想唔到老而不將支卦解得有紋有路，我也不禁有多少自豪而豎起拇指連說：「好！好！好！」，老而不扮作漫不經心狀：「咩呀！係咪學康熙讚個仔嗰場戲？哈哈！好叉感動呵……」，我補充道：「唉！感動又好、感觸又好，卦中（坤土）係管治者、即係領導人，末來兩月水多土蕩變成爛泥，明年大運和流年飛星五黃更加打孖飛臨坤方西南，再加上現凸首府第響正上亞厘畢道坐西南向東北，須知道每年中秋一過來年煞氣逐漸飛臨，你話凸首縱使得以大步檻過也必然七癆八傷」，老而不接口道：「大帥，你咪講過風水輪流轉，上頭玄武水浸而急於北水南調、因此調個汪洋到廣東排洪，依家大膠鑊喇……」，我有意打叉笑問老而不：「大膠鑊點解？」，佢略為猶豫隨即作答：「（大鑊）本應係鋼打造、換轉膠製品肯定被燒熔……哼！你條友咪驟亂歌柄」，我嘆口氣接道：「浩瀚北水向南流，有人歡樂有人愁。03癸末干支，09己丑正宗係天剋地沖逢六一沖而澤水成困局」，老而不繼續說話：「明年庚寅年係老虎騎虎背，騎上虎背即係冇得選擇而要侷住上。現運衰西方，鬼佬固然要經歴荊天棘地、所有女強人如是，就連住响西邊區域嘅人都要小心、若然晤係病傷意外，就肯定破財敗婚姻……文小姐，算你有運冇聽老點而去西南嗰戍買樓，否則又唔知衰邊泛矣！」，文小姐點頭作感恩狀：「好彩得老總提點……師傅，我屋企買咗幾餅風水DVD返嚟睇，若然照佢指示擺風水有冇大礙？」，我答道：「如果好似你老總咁就冇乜大礙嘅！」，老而不笑問：「似我點呀？」我瞇着笑眼答道：「唔識郁囉，老而不……哈哈哈！」，說話引得眾人大笑。
笑過之後望望鐘又係時候較腳矣，於是別過老而不及佢一眾同事而「奔向我的前路」，早幾日唔記得響邊聽過一句說話好似係甚麼：「全球性思維，地方性行動」，ngao哂頭唔知點解，如是者一路行一路唸唸有詞挖空心思地去想……。
