吳鈞洋師傅其他文章

                                                    文•吳鈞洋

 

金木水火土,睇下虎年好唔好?                                    

     

    

    又到咗老虎頭(釘蚤乸),循例、送舊之際又重重咁大踩老牛一腳、迎新一刻再輕輕咁柔拍虎屁幾下。

    謹此肅立一鞠躬,再…… 啊!原來一鞠躬已夠)

    拱手恭祝各位讀者、網友、老友…… 等等,虎年一年之中:事事如意,樣樣順景!虎虎生威!威過威而鋼,堅過張堅庭!

    今期寫乜好呢……教人買股票?流年干爭爭加上斗數天同化忌,年終過後衰硬,想人死咩!買樓?樓價咁鬼高,仲有人敢落疊?講笑嘛!明年文昌化忌,衰文件合約……你敢咩?鬧貪官、媽政府、吠財爺?唔好啩,新年流流積番啲口德好……哈哈!諗落都係寫啲應節嘢、計下拾天干虎年嘅吉凶休咎還得人歡喜(買藍罐曲奇):

    甲木天干、流年庚金劈甲木。庚金係太歲、大叉哂,金剋木係太歲伐我,庚金劈甲,木必亂,亂親多數妄動。所以甲木天干嘅人年內多數會轉工調職,至於從商者也肯定有經營改變甚至業務拓展。甲木人整年奔波頻撲在所難免,也由於庚寅一柱寅木司權而木比金強,甲木之人年內也少不免焦積牙擦,動不動唔好老脾兼發哂難渣而周圍得罪人,招尤怨惹是非係意料中事、一個唔覺意仲會惹上官司添!

    乙木天干、流年庚金夾硬合住唔放。庚金係太歲、惡哂,佢要合你敢say no咩!冇法,怕咗佢怕米貴、唯有乖乖就範。年內乙木嘅人凡事服從逆來順受,因而好受上頭賞識、升職機會大大提高,唯獨畀人擺上神檯加以操縱利用亦係正路而合乎邏輯。屬乙木天干嘅靚女年內大多數愛情將有所着落,至於係好係醜則要夾五行八字才有分曉。之不過由個大象觀察,畀個靚仔係咁合埋嚟、似乎嗒糖多於反抗,話抗拒不過姿姿整整而欲拒還迎而矣!

    丙火天干、流年丙火見太歲庚金必然相剋,火欲熔金、係征太歲而列入犯太歲嘅一種。庚金係太歲、流年至尊無上,你丙火冇有識死想熔我? 唔畀啲利害你睇以為我係LULU好蝦!所以丙火人入庚年、上半年大多數唔多掂。梗係,如果五行有強金強水加上濕土……助旺庚金、咁就冇有怕矣!至於丙火是旺是弱則係另一回事,火旺自然任得起財官而事業旺而財運發,火弱無可奈何以庚財為忌、庚金生水而剋弱火即係因財引鬼招惹禍害。但睇清楚今年個太歲庚寅,庚金坐住大碌木,丙火既有壯木生則差極有個譜,一如趙紫陽名句:怕甚麼!翻譯成廣東話即係:驚乜叉喎!

    丁火天干、流年丁火見太歲庚金必然相剋、剋嘅程度還犀利過丙火,唯獨真金不怕紅爐火,欲熔金? 嘥氣啦!亦算征太歲,之不過唔入犯太歲之列。太歲庚金係精鋼、中意爐火鑄煉成器材。流年丁見庚歲君、中間斷不能少咗碌甲木,事關佢係歲君嘅權力來源、亦係丁火嘅媽咪,庚金劈甲個象就好似「破柴生火」,由此可知:庚為君、丁為臣,君劈甲而有權、臣抱甲而獲恩,君臣共慶相得益彰。今年太歲庚寅即係庚金坐住碌甲木,橫睇掂睇丁火之人流年都唔差,反下手仲財官並旺而財色兼收添!

    戊土天干、流年見太歲庚金驟看好似土生金,查實卻係燥土埋金、慈母敗兒母慈滅子……土本來生金,唯獨戊土、佢見到金非但不生不養,更甚者還無情哋埋金(原因在於燥土不能生金)。唯獨面對太歲戊土卻無能力去埋金,不但不能、還分分鐘要冒難產危險去生育,事關庚金太歲係龐然大物、咁大堆咁大舊金埋在戊土大山之下,斷冇理由唔去開採。不採猶是可,一採肯定開山劈石搞個「天翻地覆」。但話之你戊土生庚金生得點痛苦都好,總之做仔嘅忤逆係定數,試睇庚寅一柱見戊士,庚金非但不領戊土情,還劈開寅中之甲木去剋土。咁搞法,戊寅流月見庚寅太歲明顯「傷官見官為禍百端,好嘅唔見衰嘢先應驗」戴高樂!希望五行有強金相助以劈木救助戊土喇,否則嘅話、終日地動山搖都咪話唔得人驚。 就咁睇,   除非秋冬季節,戊天干嘅人今年運勢實屬麻麻、猶其係春夏天極唔睇好。

    己土天干、流年見太歲庚金係濕土生金,己土天賦包容力和慈愛性,唔似得戊土母慈滅子般無情……己土和戊土雖然一樣都係印星、只不過前者有生金嘅親和性(事關濕土能生金而有如嫡母,所以太歲對佢好鬼死冧),亦因為有己土生庚金,所以庚金有力度去剋坐下嘅寅木而任財,也由於庚金劈甲木而劈出火花生出(丙火),如是者庚寅太歲逢己土、庚金力劈寅木而沖刷出木火土(財官印)三奇。相比起戊土與庚金之對立無情,己土入庚歲係優越嘅一年,呢種奇逢佳遇與戊土相比、簡直係蚊髀同牛髀。嗱!呢啲咪包容有好報囉!用戊土打比喻,話佢陳振聰不為太過。

    庚金天干、流年見太歲庚金係肩劫重逢、一如飛星嘅66連珠,即係:兄弟有情朋友重義,兩脅插刀。表面睇嚟好似庚金橫刀奪太歲錢銀女人……之所愛,查實卻係仗義幫太歲渡過難關,事關庚寅太歲一柱,明眼見到白虎畀隻東北虎係咁連拉夾拖咁扯住跑、上不得背時也落不得地……想話張開白虎口狠狠噬落個東北虎虎背啦,點不知仲硬過鋼板、牙崩咗也咬唔入……。家陣忽然間走多隻白虎出嚟幫拖,仲唔驗虎虎生威咩!呢種就係五行嘅:「財多身弱用印劫喇!」,斷估庚金天干嘅人今年運勢斷唔會差得去邊!

    辛金天干、流年見太歲庚金係肩劫重逢、一如飛星嘅67交劍煞,即係:兄弟反目朋友失義。表面睇嚟庚辛金好似一樣都係仗義幫太歲劈東北虎而渡過難關,咁就睇漏眼矣!知否庚辛之區別?前者係鋼材、後者係爛鐵,鋼材大有能力助庚劈甲,辛金非但幫不上忙、反下手仲要採陽補陰「黐」番轉頭。評論庚金、話佢走多隻白虎出嚟仗義幫太歲拖,因而虎虎生威相得益彰。評論辛金,同樣亦係走多隻太歲白虎出嚟義無反顧咁扶助,但由始至終辛金只有攞着數而冇半點蝕底,嗱!呢種格雖然亦係:「財多身弱用印劫」,唯獨稱佢做:「羊刃駕殺」似乎貼得多。忽然間沖出隻白虎嚟助長辛金氣燄唔可以話係虎虎生威……叫乜叉好呢?啊,係啦,呢種咪叫「狐假虎威」囉,似你呀,嘻嘻!

    壬水天干、流年庚金太歲見壬水必然相洩,也樂於用水生木而驗食神生財。至於壬水碰上庚金即係有阿媽生(庚金印),而白虎見玄武也盡顯母愛。壬水見庚金叫做行印運、有印生。所謂有印生、即係有人扶助我、照顧我……猶其庚寅一柱:壬水得庚金生轉而生寅木,即如身旺行食傷。壬水天干嘅人因為流年有庚印太歲生,所以年內大多數做事醒神有沖勁而大利舖MO(係英文升職意思、斷唔係潮州粗口)。讀緊書嘅肯定利考試而位列前茅。不足嘅地方係假若壬水本身已經好旺,流年再有庚金生,咁就明顯多得滯而旺過龍矣!係咁嘅話、部分壬水天干嘅人、話就話做事醒神有沖勁,唯獨年內會變得躁急沖動而不滿現實,讀緊書嘅學生哥更加會粗心大意叻唔切錯漏百出,仲有女嘅壬水人要提防生育血光,若然生得出挨一刀都值得、最怕生唔出再挨一刀咁就寃乜枉。嗱,呢啲咪稱作「傷官配印」又或者「印制食傷」囉!

    癸水天干、流年庚金太歲見癸水亦係相洩,和壬水一樣也樂於用水生木而驗食神生財。癸水碰上庚金同樣係庚金印,由於壬癸水皆屬玄武,白虎見到也不分彼此咁盡顯母愛。癸水性質比壬水柔順,由於屬雨露水、故容易被熱氣蒸發殆盡。癸水見庚金正宗行正印運而有正印生,所謂有正印生有如嫡母育兒。癸水得庚金生轉而生寅木,因為屬於雨露水、生木較壬水親切並且水源源源不絕。以質量比較,壬水強卻獨立任性,癸水弱但倚賴服從。癸水天干嘅人因為流年有庚金正印太歲生,年內最明顯係讀書叻考試醒。但講到做事、由於服從性強而乜叉都一板一眼唔識通變緣故,所以未必及得上壬水之挑通眼眉和夠世界仔。之不過也勝在癸水本質柔弱而旺極有個譜、不似得壬水旺極會泛濫(非洲和尚乞人憎),加上有庚金正印生、因而四季得以保持中和。更加不會沾染壬水躁急沖動和不滿現實……等等壞習氣。流年癸水遇庚金也可以稱作「傷官配印」又或者「印制食傷」,只不過係屬於積極和正面嘅嗰種。 (本篇完) 

 

吳鈞洋網址:www.ngkwunyeung.com.hk

吳鈞洋電子郵箱:raymondnghk@yahoo.com.hk

 

WB01343_.gif      回首頁     WB01345_.gif (616 bytes)