五黃入中宮，西北南東到處凶
第二次黑雨嗰日、我咁啱約咗老而不和經紀陳去醫院探病，勞動到我哋三個「大孖洒」齊齊賞面嘅梗係非等閑之輩，響戍唔係幾方面透露佢嘅「啲挑」，總之係有名堂人物啦！
下晝將近四點行出醫院門口嗰陣已經密密麻麻落緊小雨，到咗將近五點，當我哋一行三人狼狽地入咗嗰間幫襯開嘅餐廳、啲小雨經已會聚成大雨、好唔講得笑咁傾盆瀉下……仲未坐得暖個籮友，嗰頭就聽聞電視臺播出黑雨訊號懸掛嘅消息。
經紀陳話頭，三個超磅之人好日都唔行埋一齊、一行埋自然天昏地暗廣招風雨……猛人嘛！既然受落猛人嘅稱呼，就話之佢落狗屎啦！
「知唔知道廣州最近又有嘢發生？」相熟嗰位部長難神祕咁對住我哋細聲發話「報密」：「廣州好似又嚟第三次反地方主義，聽聞第日唔准講廣東咁話喎！」，「真唔真架？」我眯着眼懷疑地望住佢，嗰邊老而不則陰陰咀地低著頭一味笑，對方乘興而嚟攞話題博好感，卻被我和老而不冷待，當堂失咗方寸：「唔關我事架，係啲落嚟旅遊嘅同胞爆料咋！」，呢個時候但見老而不笑看着我、佢嘅表情令人有多少侷促，如是者在腦海中猛地搜索、想翻尋下記憶有乜叉痛腳畀老而不佢捉倒……「你咪預測今年白虎噬五羊，庚刀割禾穗嘅，畀你恨倒喇，反革命分子！」老而不得意地噴口水：「一世烏鴉口，永冇話學下人家大陸報紙凈報喜而不報憂……」，「佢哋敢咩！放完二氧化碳喇嘛，筆哥？」我側側頭笑望住佢，兜友越望越似電視劇中奸相和坤嗰個又乞人憎又滑稽個衰樣：「你話我有測錯咩！（白虎噬五羊，庚刀割禾穗）你以為就咁算嗱！好戲還在立秋之後、你老人家有排唔得閑喇……」，呢個時候經紀陳打叉問道：「以前咪聽過陶鑄反過地方主義，差啲連廣東方言都禁埋、並且處決咗好多人添……」，說話還未說完、老而不已經指住佢怪笑道：「邊有處決到人呀？知啲唔知啲！當時只係處分咗古大存和馮白駒兩位省領導人之嘛！」，
「好喇！都唔關我哋事、咪鬼討論佢……」經紀陳顯得有多少不耐煩：「不如講吓近排龍轉水仲好啦！」，「龍捲水呀……哈哈！你個lao鬆嚟咗香港咁耐廣東話還係講得一舊舊」老而不忍不住又取笑經紀陳，對方則打個哈哈解窘。「龍捲水數現係吉兆，因為子辰會局嘛！猶其入申月而會申子辰水局，加速南水北調，明顯係國運昌盛之好兆頭呀！」我笑著點頭顯得有啲雀躍：（「虎躍龍騰滔天水，東翻西倒決興衰」，今年祥龍沖白虎，下半年中國將威盡！），「望係咁望啦！」愛國嘅經紀陳由衷地吐心聲，呢個時候老而不用眼尾睄咗我一下：「喂！吳老而不……」，我回道：「幾時送個咁名畀我？唔老而不……咪即係話我並非老而不，你至係……哈哈！」，老而不指著我笑道：「你條不哥……喂！你咁叉愛國，下個月五黃入中宮、二五交加重疊中宮和西南，未交節令、世界之中宮和東北已經災難疊起，立秋之後咪仲大乜鑊！」，經紀陳不解而發問：「南韓美國軍演，日本海軍犯界，東北災禍疊起……呢啲我都知，但中宮災乜呢？」，我笑著答佢：「如果世界正南係澳洲、咁喺佢上面嘅：印尼、巴基斯坦、緬甸、印度……等等南亞國家咪响正中間囉！最新鮮熱辣消息係巴國空難死咗百幾人……查實，呢個國家嘅位置應該算入中宮偏西南至啱。」，「唉！五黃入中宮，上下一齊沖，二五疊臨打孖上，西北南東到處凶！」老而不仰天長嘆、擺出一副憂國憂民衰樣，唔識嘅畀佢嚇鬼死，識佢嘅畀佢笑叉死，我有意挨近佢身邊細細聲同佢講：「筆哥！金刀劈木在太歲，凡係個姓有木嘅、至少要步步為營，若然個名有木又有金，即係話金木惡鬥、咁就要執生囉！」，老而不點點頭道：「我認同吖！天匯惡鬥IFC惹禍嘅四叔、佢單嘢仲未搞掂，嗰頭又傳出話超人兩仔爺得罪咗中央老江老胡……。不過你仲講漏咗一瓣，就係普遍姓龍、名龍……今年年頭如果唔記得禊太歲，咁就唔死一身孱囉！」，我回答道：「啊！你指白龍王……唔，佢早輪病係因為泰國啲水被抽乾啫，最近咁鬼多雨、又龍捲水、又申子辰……死唔去嘅！反而我驚海南島博鰲嗰位龍永圖……」，經紀陳瞇着眼問道：「係乜水呀？」，老而不好唔抵得咁大聲回佢：「佢都唔識、你叻極有限！沙士初期佢被江澤民派嚟香港指手畫腳、話死五十萬人唔算多嗰條粉腸呀！」，經紀陳笑著點頭：「呵！原來呢條moke咀，如果今趟佢冇事、個天真唔開眼囉！講開又講八達通嗰個陳碧鏵、佢個鏵字本身咪已經金剋木囉，如果照你哋咁講、你咪幾手尾長？！」，我拍拍佢膊頭讚道：「老江湖到底老江湖，挑通眼眉、一點就通……」，我話還未說完老而不已經打叉：「成個八達通咁款，哈哈！」話音剛落、大家一齊爆笑。
我接續說：「陳碧鏵，逼住庚金劈中華，依家至掀起龍爭虎鬥序幕咋！大佬呀，妳鏵女嘅老細係九鐵噃、屬於政府財產政府機構，流年白虎鬥青龍，既然叫九龍鐵路局、白虎點會放過你呀！就係立法班白虎議員肯定窮追不捨，立秋之後白虎司權，好戲在後頭呀，筆哥！」，老而不點頭接着說話：「我認同老吳不見解……嘻嘻！講開又講，你哋點睇阿珍呀？」，經紀陳不明：「阿珍……邊個呀？」，老而不笑著打趣道：「問邊個？咪睇佢咁銷魂、着住鴛鴦綉花呀裙……嗰個囉！哈哈，死蠢！」，經紀陳笑住摸摸頭恍然而悟，我又學住老而不咁笑唱着：「錯在佢叫阿珍，珍珠都冇咁真！乜佢咁失魂，帶團乜都冇……真笨！你話喇，冇底薪、凈靠班客買嘢扣佣喎，聽餓死啦！」，老而不接話：「要班山頂蘿蔔自動自覺喎……」，經紀陳又打叉：「老……唔係，係大編輯至真！咩見山頂蘿蔔呀？」，老而不陰陰濕濕地睨咗佢一眼：「山頂又寒又乾，生啲蘿蔔邊咬得入呀，聽咬崩呀啦！」我和經紀陳聞後不禁大笑，老而不正色道：「如果中港兩地再唔取締呢啲老襯團，最後被累死嘅，只係香港呢邊咋！」。
大家正說得惧興高彩烈、七情上面之際，老而不個電話忽然響起……。原來有大鑊嘢發生而要佢急返報館。我不嬲打趣老而不，話佢做報管而並不是做報館，事關好多次聚會都係咁結尾而佢到處被人「規踴」！真唔知佢做世界和解放……等等時候有冇熄手機……哈哈！
