咁無能、抵佢一世貧
七月十四嗰日，晏晝睇完風水正返緊公司，一路上見到唔少人哄住有電視機嘅商舖、個個神色凝重咁響戍邊睇邊議論紛紛。呢種情景在當年「六四」前嗰排日日周街見，廿一年矣！已經好耐冇見過囉……究竟發生乜叉事呢？心中暗自納罕，於是乎加快腳步，返到公司乜都唔理就先扭開電視睇個究竟。
啊！原來有個揸搶嘅賓佬響戍脅持人質，大批軍警包圍現場……整個場面睇落好熱鬧、情景好似當地人在參加嘉年華一樣而無絲亳緊張氣氛。講到劫持人質，電影睇得多啦！往往成班差佬包圍住一個或幾個賊匪，然後搵談判專家啦佢講耶穌，多數差佬呢邊嬴，一係賊匪投降、一係差佬突襲成功，甚少有危險鏡頭，更遑論流血殺人質收場喇！雖然知道被脅持嘅人質係我哋香港人，但由於當時仲係兵賊「和睦對峙」局面，所以睇得好悠閒、好他條……過癮過睇電影，因為真實嘛！同時個心諗住：「超！個劫匪喺戍玩嘢啫，冇耐一定投降。」睇睇下忽然記起有啲「功課」仲未做好，於是乎諗住做完正經事先至再睇過。望下個鐘夜晚六點幾矣！自己還對自己講：「盂蘭節正日喎，啲（朋友）應該出嚟搵食咯，嘻嘻！」
約莫過咗個零鐘頭度，電話突然響起，聽鈴聲好似有啲不祥預感，由於擁有呢種直覺，好多時會令自己忐忑不安。「仆佢街！仆佢臭街……」電話嗰邊傳來老而不忿怒聲音，成把聲顫哂：「你有冇睇電視？」「頭先有……」，「畀佢……畀條仆街打死8個……8個……港人呀……
呵！」老而不急促嘅聲音夾雜住哽咽，我聽完之後也傻咗一陣：「頭先、頭先仲好哋哋架，點解會發展成流血……還死咁多人添！」二話沒說、急急腳走向電視機……慘劇發生之後，和所有香港人一樣、個心未嘗平靜過，好似08年汶川地震翻版；夜晚冇覺好瞓、日頭見到乜都忟憎……。
過咗幾日，星期六嗰朝早個天還未光哂，由於差不多寅時至入倒睡、所以臨天光寧舍好瞓，睡夢中嘅我正同緊周公個孻女盡訴心中情……煙煙靱靭之際、卻被唔通氣嘅死老而不電話嘈醒！話有兩位lao-sung慕名到訪喎、叫我點叉樣都要畀面同佢哋飲番餐早茶咁話。
到步之後，卻見到所謂lao-sung不過係B君和經紀陳，佢哋確係如假包換嘅lao-sung，兩位藉貫分別一魯一燕（唔識咧！魯即係東北、燕即係北京……廣東人對外省同胞一視同仁尊稱lao-sung，即係老兄咁解，即如幾拾年前香港人舉凡見親操著外省口音嘅男女、唔理三七廿一一概都叫人：上海佬、上海婆一鬼樣。
「吳老不……你早！」老而不驚死我發爛喳、先發制人學着官腔而向我打招呼，嗰頭B君則朦著豬兜眼朝我向老而不藐藐咀：「嚟得啱喇！你個老友正響度咒緊你，你唔覺眼眉跳咩？」我笑答道：「畀條粉腸咒得多、啲神經早已經緊咗無哂反應……哈哈！」說話引來一陣笑聲，但見老而不忽然扮成一本正經咁個衰樣：「有冇咒都好啦，唉！你睇下死咗幾多人吖？」話音一落大家都沉默起嚟鴉雀無聲、自動自覺地献上默哀一分鐘……禮成後先由我開腔：「唉！8個港人真係死得無辜呵！響我網誌有位網友留言可圈可點、特錄嚟畀你哋感受：（8.24）係商臺老前輩林彬逝世四十三周年紀念日，佢當年創新嘅鬧暴動分子名句言猶在耳、永遠難忘：（無恥無良低能辣撻下流賤格……），將佢套用於菲律賓差佬身上、好過度身訂做！事發睇電視時真個把幾火，邊有特種部隊咁叉低能、揸住個大鐵錘係咁去鏗巴士度窗……即係擺明催谷個槍手去殺害人質啫！越睇越肉緊……我認為班賓佬有岐視心看待我哋中國人，換轉係鬼佬、睇佢哋夠唔夠膽咁兒戲吖！」，B君接着說話：「一鬼樣咋！嗰邊警方……應該讀作（驚慌），在犧牲港人同時，佢哋亦集體向世界表演咗一次將低能暴露無遺嘅實力show」講到呢度、B君好似haihai哋：「諗唔到佢哋位總統冇有識死，以為豆腐潤咁大嘅香港好蝦，呢邊特首打電話畀佢都唔聽。唔知佢真唔知抑或假唔知：香港地位今非昔比，英國佬管嗰陣、因為我哋係二奶仔、仲可以側側膊應付算數……E家喎，上頭將我哋打造成阿拉丁神燈，只要摸下佢就有求必應……」唔等B君噏完、老而不又響戍搞笑：「摸邊戍呢？」，B君瞇着笑咀瞪咗佢一眼、跟住有意無意捧住個茶壺輕輕撫摸住底部係咁掃，咁嘅舉動你話我哋又點可以忍得住唔笑呢B君繼續：「鬼佬呢、佢哋更加公認我哋呢戍係金山，亦係卡薩布蘭卡……嗰兜新仔總統、乜叉名話？啊！記得喇，係阿基佬三世點解佢班幕僚咁低B冇提醒佢呢單嘢係棘手嘢呢？等條粉腸仲響記者招待會上扮哂瀟洒、好輕挑咁笑口噬噬將單慘劇同當年莫斯科大劇院相提並論。」B君嘅說話發人深省，我正想開腔附和，但見旁邊座位有個年過花甲、雙目仲炯炯有神嘅老人家搶先搭腔：「咪怪我多口驟亂你哋歌柄，事關我啲兒孫大部分響哂嗰邊，所以知曉佢哋好多嘢……上一任總統矮婆阿羅若夫人，由於瞓身倚靠美國佬而獲得無限支持、貪過歴屆總統！竟然夠膽染指國家預算支出嘅財政，首先侵吞軍警資源、警察裝備資金……佢雖然貪錢，但對班軍警特別係將官非常懂得收買人心，待遇優厚非比尋常。早幾年現總統佢老母：前總統科拉桑、企出嚟想話支持反貪污，聽講個矮婆派軍警到科拉桑個農場殺咗唔少人……從此之後再聽唔倒科拉桑反對聲音！唔……講唔埋今勻單慘劇係現總統有樣學樣趁火打劫，借人質事件而達到個人政治目的……」，聽到呢度老而不忍唔住打叉：「我都懷疑緊喇！一招借刀殺人、等釀成血腥事件之後，利用國際壓力去整頓本國軍警……如果真係嘅話，現總統阿基佬咪係正式殺人幕後黑手！我哋8個死咗嘅香港同胞就確係死得寃枉囉！」講到呢戍、B君面上帶有多少不安神色：「你哋話係咁搞落去、會唔會演變成民族主義鬥爭……到時美國佬肯定又叉隻腳埋嚟搞串個party，我驚搞搞下會發展至排華咋！」，我答道：「哈！排毒美顏寶，將啲資金排哂過嚟香港，係咁就過癮咯！」
老而不突然失驚無神咁沖著我說：「乜都假！總之要讚吳老不：蕭佛貴、蕭佛口！」眾人不明，唉！可憐我畀人潤咗仲要幫作解釋：「老而不話我係屎忽鬼，仲有把屎忽口……」兩兜外江佬聞後笑到見牙唔見眼……「即係話你有料啫！你哋話係咪啦？」老而不笑笑口吟道：「邊個話：五黃入中宮，上下一齊沖，二五疊臨打孖上，西北南東到處凶，八方月內禍無窮……？」，「仲有你漏咗：太陽化忌沖起天同化忌呢！講實話啫，咁都蕭佛口？」我笑着指指老而不：「下半月當處暑過後，肅殺之氣覆天蓋地，步入白露其八字金旺火虛而缺木……天地陰陽怪氣一片，黎明前之黑暗勢必持續……計計數、唔到年底至小寒二陽進氣，睇怕世情冇咁易好轉！」，經紀陳顯得十分無奈而問我：「會唔會係因為槍手個名叫門多剎、而剌激起未來煞氣呢？」，我答道：「部分啦！事關門多煞即係二五交加到大門，哈哈！點叉知佢嗰個……乜羅剎公園嘅坐向啫？我始終認為係大太極影響所致因素多啲」，B君點頭附會：「有道理！請吳大……」「大乜叉呀！叫佢吳老不咪得囉…… 哈哈！」B君話還未說，老而不即刻打叉，我向佢笑駡道：「倒不如學冰皮月餅廣告咁叫咪仲好！死老而不！」B君也隨即眤咗佢一眼：「咪驟亂歌柄啦，阿筆哥，呵呵！」B君一出聲老而不不得不收爹，唔知點解每當佢哋兩個走埋、後者多數讓前者三分，呢啲咪所謂一物治一物，糯米確係治倒木蚤囉…… 「今年白虎沖狂龍，一早講明秋後肅殺進氣肯定多事！再趁勢五黃入中宮、上下左右一齊沖嘅效應，月令而先沖白龍、再沖黑龍…… 白龍江引發泥石流後，話口未完黑龍江又有水患，及後仲話有客機失事添！咁沖法，我晨早已經預咗香港嗰條被稱為龍嘅怪雞一定釀災起禍，本來響秋後最大機會係港龍航空出事！誰知佢好彩罷工罷唔成卻將煞氣卸哂畀遊客…… 唉！早前泰國紅警，今次菲遊更發黑警，E家隔兩日就聽到泰國放炸彈、講唔定遲下連泰國都黑鬼埋，咁就該煨矣！我幼承庭訓：勤有功而戲無益，所以…… 」呢個時候死老而不又伺啱機會贈慶：「所以冇建設性需要嘅地方唔去吖嘛！」經紀陳聽出話裡有骨而笑著向我戚眉戚眼，我擺出不以為然個款大聲向經紀陳指桑罵槐：「陳腥！你知唔知廣東人用咩詞句鬧嗰啲為老不尊嘅粉腸？」B君搶住舉手答問題：「dirty-oldman」，經紀陳則指住老而不笑道：「人版在此！」隨即大家一齊笑、連老而不自己也笑埋一份。 (本篇完)
