文•伍立群
文•伍立群
有病方為貴（三）
(續上卷)喂！所謂高人，你又話口乾要休息一下，咁，茶又飲過，仲瞓咗成個鐘，而家可以繼續講得未呀！呵……瞓咗一覺真係舒服好多，你又唔駛咁心急嘅，等我去一去洗個面先，咪又嚟講囉。鞋！真係頂你唔順，扮晒嘢，不過無計啦，鬼叫自己有求於你呀，速去速回啦。
嗱，細佬，頭先講到八字或多或少都有嘀唔妥，咁即係有病啦，除咗話毛病係財，係官殺，係食傷，係印，係比劫……之種種問題，但都不離日元本身之重要性，本身之毛病先至係關鍵，所以咪有下一句：無傷不是奇囉。
以我自己之理解，可能你係唔同意都唔出奇，咁就當我亂嗡囉，之咪係無傷不是奇怪，嗰八字無受傷唔係奇怪，亦可以調反轉頭話，八字有受傷又唔奇怪，真係亞奇個奇呀，亞奇又生亞奇，你話奇唔奇，奇就奇在你八字有受傷，奇又奇在你八字無受傷，有無受傷都奇，有無受傷都唔奇。又可以理解為命中無食傷不足為奇，命中有食傷也不足為奇，咁，命中幾時有食傷先奇，幾時命中無食傷先奇。嗱，嗱，嗱，係唔係身強無食傷先奇，定身強有食傷先唔奇，又或者命弱無食傷先唔奇，定又或命弱有食傷先奇呀。高人，鞋，講到呢度又要抖一抖先，下期再續。(待續)
伍立群網址：www.fengshui-master.com.hk/nglapkwan
