預測2011年(辛卯)運程
流年卦數基本論斷
卦象意義
辛卯干支是(風澤中孚)卦，卦象：上卦為震、雷，下卦為坤、《易經》第六十一卦〈風澤中孚〉上巽下兌。
中孚：豚魚吉，利涉大川，利貞。中孚．豚魚吉．利涉大川．利貞．
彖曰．中孚．柔在內而剛得中．說而巽．孚．乃化邦也．豚魚吉．信及豚魚也．利涉大川．乘木舟虛也．中孚以利貞．乃應乎天也．像曰．澤上有風．中孚．君子以議獄緩死．
意義：中孚為誠信、信實、真心之意。孚字係雀乸用爪挑抓住雀仔嘅形象。而整個卦之形狀亦似足隻蛋。
預兆：處於彼此親睦，誠心相待時侯，表面旺盛也似守井井有條，唯獨內部已呈現空虛之狀態，要同心恊力進行改革調整才可以收到成果，勤有功戲無益，宜遠離色情逸樂。
意思話：表面風光咋！再唔改革調控嘅話，聽揸兜、等滅亡啦！
(辛卯年立春八字)
壬 庚 庚 辛
午 寅 寅 卯
辛卯歲建五行月柱日元庚寅犯伏吟，四柱木壯金強、兩神成象，天干陰陽金、又斧頭又刀仔咁舞動，地支花草樹木蓬勃。春木當令不出干、根莖卻藏於土下、只怕水腐不愁金傷。反之朋鐵透干地下無根、易為木折。獨喜時柱壬午，天干壬水通關有用，時支寅午會局調候有功、護木有力。但如此一來，地支寅午會火局剋金，金亦不降伏而生壬水剋火……五行木亂傷金剋土洩水，唯獨木旺逾度，而母旺子相火氣也有熸升之象新的戰局又形成而鬥餐死，鬥到頭崩額裂之後再拍膊頭講數！
辛卯流年紫微斗數
紫微斗數命宮三方四正：太陽化權天梁守太歲卯垣、火星同宮，對沖天刑祿存酉垣，會照天同巨門化祿丑未、太陰、天機巳亥。機月同梁格局，又係諗計度橋，細眉細眼嘅一年。
玄機看2011界運程
因循五行而論世情，明顯亂在木、木亂自然剋土洩水傷金鬱火……斗數機月同梁、浮動星系，星數五黃在東、二黑飛南，相夾東南。流年世情普遍以變動在先、及後先至獲得安定，即係話先嚟個惡鬥，由於大象擺明金木相戰，話之你政治抑或經濟……
去到年中過後好大機會來個令人意想不到嘅改變，變好可以先睇流年卦象，再參考八字斗數飛星……等等，以卦義睇，既預兆：處於彼此親睦，誠心相待時侯，表面旺盛也似守井井有條，唯獨內部已呈現空虛之狀態，要同心恊力進行改革調整才可以收到成果，勤有功戲無益，宜遠離色情逸樂……講乜叉燒？一字咁淺；風吹雞蛋殼，樂極生悲，因住2012年呀！
由於流年整個卦之形狀十足隻蛋，風在上澤在下，爛咗嘅嘢都可以列入兌卦，打爛咗嘅卵都入數，唔講你唔知，兌本質就係垃圾、溝渠、沼澤、糞便……咁，風在上澤在下咪有「風吹雞蛋壳財散人安樂」個意思存在！弦外之音反復叫你行路睇車。另一方面，兌為澤管西方金，震為風菅東方木，風吹雞蛋壳，終極含意係「東風壓倒西風」老毛五十幾年前之預言至今逐一應驗。
流年世界政治
整個2011兔歲五行木亂傷金、火旺熔鐵，大有（風火無情金自殘）之嘆！世界局勢擺明東風壓倒西風、世界政局也相當單純；只不過係東西方之爭，講得簡單啲即係中美之間嘅紥馬，之不過互相拖馬講數而矣！自從烏卒卒上臺之後中美之間明爭暗鬥從未停過、去到虎年更為激烈，彼此各出奇謀但求鬥倒對方。就算表面互通款曲、唯獨暗底下也你想我死我想你亡。隨着金虎年過去，新嘅兔年一樣要鬥，只不過冇咁激咁勇矣！當權執政者開始急於進行檯底交易；均分利益；不惜棄車保帥以保權位。互相牽制；縱橫交錯的關係是2011年嘅特點。
三年前嘅預測、有啲嘢美國至今仍要面對：1).中俄、中朝……合作大打經濟牌、騷出政治張而爭取籌碼。2).美歐之間見利忘義被分化而各懷鬼胎互相疑猜。3).陷入泥濘嘅中東侵略軍抽腳不能，以後歲月只可以換防而不能撤軍。4).伊朗和北韓進一步趁火打劫利用核武問題進行政治勒索。5).日本陽奉陰違利用經濟手段換取政治利益……等等。
日出東方而太陽化忌，2004年甲申開始嘅廿年八運；到今時今日數手指已行咗六年有餘，2010年庚寅太歲六冲甲申、明確暗示七運兌金至此已煙燒雲散，話之你「旺西南」大師點樣唱好正西、西南，總之玄機嘅嘢自己要執生，否則耶穌都無能打救你！
世界東方地域在亞洲，年內高危度環繞於呢戍地域，預測中東亂開嘅地區、政局不穩勢將持續，戰禍及天災還是集中於此地。由於五黃飛東、二黑飛南，二五交加夾東南……咁搞法，整個亞洲；特別東南亞，政局將極不穩定，相信部份國家內部再有黨爭和分裂行動發生，唔排除有執政人物經妥協後而下臺，亦有殿堂人物、皇候貴胄……不再食人間煙火而騎鶴西去。至於宗教極端份子之溫床雖然仍在亞洲，但已開始將惡法弘揚拓張出去各地，用阿拉精神炮製恐怖活動至世界每一個角落。
至於世界正東方是南北韓和日本，北韓在牌張上因應局勢發展而派發、斷估後臺係由中國控制，之不過政治影響力；心理多過實際。南韓受制於美國；冇乜主動權，地域流年既不利東方，以南北韓嚟講；相信流年政治問題多於天災人禍。只不過政治和天災人禍雙重打擊恐怕應數在日本居多，鬼叫佢稱東洋咩！旗徽是太陽，今年文昌化忌（日本十日本旗＝昌字），首當其沖自然係文昌嘅東洋日本。點亂？相信國內會發生動亂；而導至執政者下臺，甚至統治者；名人及皇室人員遭劫數，突發性災難不能避免。
試睇下流年八字陰陽金出干，騷出實力一如十隻手指有長短，同屬西方的歐洲國家今年話好不過呃你！由於貧富懸殊而長貧難顧、歐盟內部不少國家已出現分化現象，猶其中國細眉細眼以援助為名分化為實，不少吃了甜頭而頻臨破產國家因此和美國之間嘅岐見愈見加深及擴大。頑固如多舊魚嘅法國也一樣和中國互通款曲，其他國家更加唔使講。
預料整個2011年，中國在外交上和往年一樣將獲得重大進展，過往奥運舉辦成功、國際聲望進一步提升。今次慷慨援助歐洲佬因而博得不少好感，特別收買得「多舊魚」而成功分化歐美關係。至於架仔，由於佢都係大碌木東方國度，縱使靠龍美國佬、彼此亦都同床異夢，就算行動上對付中國表面上顯得同仇敵愾、實質裡留有一手。惟不可不知；五行上卻木傷金、玄機內裡架仔肯定剋死美國佬。
在國內，由於庚辛金代表異見人士，既然聯埋劈木顯示社會矛盾不容樂觀。有「金木相戰而強木剋土」現象，好明顯地方上有更多權力危機嘅事件發生，由個象睇倒中央政令逐漸難能下達地方執行，好多地方因為「山高皇帝遠」而自立「中央」魚肉百姓。
由於中國在世界位屬正東青龍地域、而整個正東地域今年均犯煞緣故，預測年內嘅天災人禍將會一浪大於一浪、猶其西南、正西…地域。政經方面、相信不少棘手難事要面對。胡溫政權早幾年在鞏固權力大前提之下，整肅運動跋扈非常嘅（上海幫）查實不過江澤民棄車保帥而矣！今時今日恐怕再難有大行動以息民忿，點解？皆因吾今老矣！無能為力矣！
2012年六星入中宮而五黃飛東南，流年武曲星化忌，是年亦係沙士頭搭尾十周年紀念，有人話沙士係上天針對國內貪官污吏而發出之懲罰性警告！事隔十年，各地貪官勾結奸商，貪污舞弊、作奸犯科……等等罪行非但冇收斂到，並且變本加厲添，已經達至天怒人怨地步……寃氣再度直沖牛斗。咪話靠嚇！未來上天懲罰（天修）肯定來一次比（非典）更嚴峻和慘烈。
香港、澳門
自香港開埠以來，政治經濟均倚賴外國人生存，任何一個運程好壞興衰離不開殖民地角色。自從中國在近廿年來改動風水後，在整個炎黃大地神州河山中，香港一躍成為北京首都外最重要一個城市。
係人都知香港特區會（生金蛋），生金蛋要特種雞，哈哈！又到咗特首選舉年矣！上次曾蔭權在絕無僅有對手競爭之下順利當選，未來一屆乜水做呢？既然八運戊土當令，位處南隅東南土旺地域、梗係捧個金形人上臺有運行啦！點至算係金形人呢？合格嘅：色清肉白、吐字鏗鏘、行為果斷、上下堅挺……。氹氹轉菊花圓，睇勻特區都摷唔出個咁款嘅名人，咁睇嚟，未來特首係阿英抑或阿年做呢？鞋！英年早逝，大吉利是！
玄機看世界經濟走勢
金融海嘯之後人人姓賴，有頭有面嘅分析師甚少將問題歸咎於侵略因果。幾年矣！由於美國仍未擺脫經濟復蘇和就業低迷的困境。今年年底美國好有可能就有所依郁，重新啟動對人民幣匯率施壓，而施加之壓力、睇怕將延續到出年中美戰略與經濟對話。放長眼睇，美國經濟將長時間保持慢慢哋嘅低速增長，為咗刺激經濟，美國聯准會將長期保持寬鬆的貨幣政策。加上美國貿易赤字與財政赤字居高不，預估美元長期將維持弱勢震盪格局。即係話新的一年繼續印銀紙，無孔不入咁狙擊人家貨幣而搶錢。
面對明年人民幣兌主要貨幣可能全面升值，大量熱錢又再湧入、當中不乏國內資金非法炒作。
至於歐元，歐元區政府債務問題短時間內仍難以徹底消除，未來可能出現反覆。歐元區各國經濟發展並不平衡，歐洲央行不得不維持低利率以支持各國經濟恢復。歐洲各國財政緊縮計劃的實施也將壓縮政府支出，這可能導致歐洲明年經濟進一步放緩。
對目前已處於十幾年來高點的日圓匯率，明年若日圓繼續升值，日本央行很可能會採取新一輪干預措施。日本經濟增長乏力，基本面不支持強勢日圓，呢啲因素都增大日圓在2011年下行的風險。
w
澳洲、紐西蘭、加拿大等資源型國家2011年都將面臨國際資本流入、通貨膨脹壓力上升等問題。為控制通膨，睇怕呢啲國家央行未來又要進一步上調利率，但利差加大又將提升對這些國家貨幣嘅需求。即係話，兔年資源型國家仍將保持強勢貨幣地位，並可能創出歷史新高。 k.
由於「東風無力百花殘」緣故，隨亞洲經濟年內受到西方地區諸多不利因素而顯得差強人意。全球食品價格急漲，窮人首當其衝。呢場人道危機的因由，話天災即係車大炮，主要原因係人禍。不少本來是炒家冷門貨的糧食，例如大米，變得出乎意料嘅搶手貨。唉！又係美國佬！美元貶值，游資充斥，炒完股市又有炒商品期貨，商品價格升得超過美元貶值又多又快。糧食供應本來只是稍為緊張啫，經過商品炒家和衍生工具的連番炒作，竟然變成奇貨可居，商品市場之設計本來係為咗紓緩價格變動嘅衝擊，想唔到依家經過游資翻雲覆雨，反而令價格矛盾尖銳化特別通脹高企物價飈升直接影響民生、甚至波及到政治。當中受打擊最深自然又數到亞洲地區。或者你話，超！你哋啲奸商污吏炒作啫，關我美國叉事呀！又唔咁講喇，烏卒卒！如果你哋本身唔響戍質低美金而大印銀紙，個世界點會咁慘呀！
中國大陸
美元持續弱勢、自然燶燶罅罅蜂擁到人哋國家炒作啦！而「人仔」咁馨香，一為經濟二為政治都係炒佢民幣升值，經濟高速增長伴隨通脹正比上升，美元貶值，游資充斥，百物騰貴年內已成咗世界經濟的主要特式。有中國特式嘅社會主義總唔能夠置身響種「世界典型特式」之外架。以中國嚟講，最慘係貧富懸殊嚴重，物價飊升當然影響唔到中產階級和貪官，真正受害的是升斗小民。2010年美國佬已經成年響戍玩緊嘢，2011年相信玩得更冇人性，進一步玩埋佢班兄弟姊妹添！到時佢美利堅合眾將成為神臺貓屎而犯眾憎。
港澳特區
美國因經濟衰退而持續減息導致幣值下滑、猶其對比起人民幣每況愈下，香港貨幣因與美元掛鉤，同樣對換人民幣無日不貶值，最弊係香港因為有祖國作為後盾不愁冇國貨進口，想唔到我在2008年嘅預測至今竟然一一實現：如此一來好似本地歌星許冠傑1978年所唱名曲曲詞：糖又加鹽又加成日咁加任佢話……。香港市民今年想有好日子過？難囉！還有係年內「天機化忌」加埋「三壯木剋土」投機恐怕冇瓣掂，特別係股市、若然持有者不趁每次反彈而出貨的話，聽硬做蟹也……。之不過兔年春夏、甚至秋天都睇好股市，原因係美國佬識得無抵押而印銀紙，投機者若不炒起股市似乎同個荷包過唔去，唯獨講到明無抵押，幾時爆煲天知道！要我估，我實估2012龍年沖白虎。
玄機看流年天災人禍
天災
木主風、金主刀，木亂天干而地支刑沖，流年八字五行鬥個天翻地覆，加上文昌化忌，火忌、水忌、金也忌而烏忌白忌。今年風災是天災之首、雨災為次、水患則發生於不同地域，至於地震仍然頻密，犯煞的地域成災釀劫之嚴重有可能超越過去而創紀錄，大自然反常怪現象引發之災劫恐怕又係百年所罕見。
另一方面，木主風、木多傷金（酉金、肺經）加上太陽天梁守疾厄對天刑、文昌化忌七殺同宮……等等也正是蠱毒之誘因，諸如：禽流感、呼吸系統、血液……之類流行性疾病又有可能一下子猖獗於秋冬，還有諸多不明來源的疾病及新病毒變隨着氣候反常而相繼活躍起來侵襲人類。
以香港而言，由於位處廣東省南端，記得對上五黃飛東南嘛！邊一年？咪響2003年囉！即係2012年龍年。兔年文昌化忌、明顯話你知流行性疾病又開始失控，諸多不幸的意外和疾病年內將由廣東傳過來，所以下半年開始要小心。
人禍
庚寅年美國佬係威係勢咁響亞洲搞搞震，到咗兔年因為搞過龍而欲罷不能，五行克應所致，中東地區年內肯定再呈亂象，針對美國的恐怖活動肯定比去年活躍，各地政變及騷亂事件相對頻密。爆炸大火、樓房倒塌、礦井意外……等等災難相信在世界各地有所增加。最特別係兔年受破壞嘅建築物十居其九係尖頂或長方形（文昌），又以寺廟、教堂、學校…… 佔多數。
犯罪活動
兔年預測：由於流年五行金木戰鬥明顯，年內地區性的犯罪活動更加以武力做為主，除了恐怖活動之外，人為武力犯案也相對劇增、並且單單新鮮鑊鑊甘。也由於年內文昌化忌，.諸如：文書詐騙、營造假帳……等等不法活動藉投機市場動蕩將有所增加。
流年玄機大象
財蔭夾印而昌曲忌科：任何條約、合約、恊議….等等表面達成但暗裡講數，咩嘢烏粗辣撻手段都用上，最終仲有可能被撕毁而出現危機。翻舊帳揭醜聞事件又再鬧哄哄地發生響政界和上流社會。最多醜事被揭發於出文書發證件部門和教育部、學校，另外因文字出錯或強姦民意鬧醜鬧，選舉舞弊事件……等等屢見不鮮。投資機構爆內幕交易事件不止個別一二單。名人見報、上電視……等等名氣越大、風頭越勁嘅年內肯定惹麻煩更多。恐怖分子頭頭和黑社會大阿哥……等等邪惡軸心人物落網或受戮者各地皆有之。 (本篇完)
