《新玄機》雜誌主頁  通天記者其他文章

                                               文•通天記者         

玄圈八一八

批鋒芝戀,自命大師講到亂晒籠

 

    恭喜賀喜,香港特區十四歲生日了。十四歲的少男少女,正值反叛期,現在的特區,亦是鬧哄哄的。呢度示威,嗰度抗議,有錢的在報紙賣廣告發表政見,有社會地位的專業團體,則發完一個聲明又一個聲明。鬼咩,有個咁嘅阿爸,唔造反才怪!造反有理!但罵時罵,要有分寸,始終一家一主,唔好主動叫阿爺嚟管埋一份,否則一下子失晒所有自主權,到時點算?

批鋒芝戀,自命玄學大師講到亂晒籠

    講完其它,還是八番玄圈事。最近幾乎全城,在茶餘飯後都在講的娛樂新聞是甚麼?當然是謝霆鋒、張栢芝鬧離婚了!就算你永遠不理娛樂新聞,但這家人的消息日日新鮮奉上。且牽涉的不是兩個人這麼簡單,還有兩個無辜稚子,還有男家的兩個家庭四個娛圈中人。女家更是陣營鼎盛,兩對父母加上同父同母的、同父異母的、同母異父的眾多兄弟姊妹,再加埋男女主角的眾多前度,說多複雜有多複雜。最攞命者是傳聞連DNA都要驗埋,仲連奶奶的陳年艷史都擺埋上檯,男主角是超級富豪私生子的傳聞也自然順勢翻炒。

    講咁多,關玄圈乜事先!唉,而家香港乜嘢事都要加個玄學角度喇,今次事件,玄學家梗係乜都被諮詢啦喇!最妙者,是有人講到亂晒大籠。

     有口痕友向筆者報料,話有自言輩位好高、自稱大師的某師傅,一時話栢芝屬重金,一時又話佢屬火,嚇死人。口痕友仲話:唔好賴記者寫錯呀,佢自己個官方網站中亦係咁寫架!至於其它的就無謂講喇,怕佢唔認哎嘛。仲有,一時話栢芝以火為夫星,一時又話水是佢命格中的夫星,全都是引自佢官方網站的。仲有,佢係3月23日仲話緊:「只係呢幾年佢哋借唔到流年,於是栢芝未能扶持霆鋒,到咗二O一三下半年,栢芝就開始旺夫四年。兩人事業運都增強。」但最近卻又大大聲公開話一早批佢哋實離婚。咁即係點呀

    筆者謂,儍嘅,講乜梗係按需要而定喇。總之見到報就得,邊有人學得你咁細心,發覺佢前文不對後理哎!

    口痕友再說,嗰位自命大師仲話:栢芝以火為夫星, 2012年會出現另一粒夫星,會有新嘅真命天子出現……口痕友謂明年壬辰年,天干壬屬水,地支辰藏戊乙癸,點睇都冇火啦,鬼嚟夫星啫!筆者回家查查,係就係,但戊癸合化火,的確有一點火喎,用唔用得到就唔知啦,故這個「指控」不算數。有問,你識八字咩?唔識,諗起都頭痛,但我識查萬年曆,這些基本嘢,幾乎任何萬年曆都有,有些詳盡些的連擇日神煞資料都有,冇通勝在手都可擇到幾年後的日子啦,當然,還得看你學的是哪一派別了。

天命師傅牙骹能否得保,還看七月四五六!

    講開公開預測,最近一個月,港股跌到一仆一碌,係6月30日先升番3佰幾點,冇咁樣衰。但搞作多多的天命大師,佢去年嘅預測好似唔係咁喎。

    「《 蘋果日報》於2010年11月22日財經版《財經人語》中,刊登了題為《農曆 5月股樓齊鳴 楊天命:兔年升到你唔信》的文章。單看標題,很可能以為天命師傅對明年股樓非常看好,但細看內文,又似乎唔係咁睇好喎!」這是筆者去年12月在本專欄內提及天命大師的首段文字。

    續下去,筆者這樣寫著:「文章(指《 蘋果日報》當日的文章)再這樣寫著:楊師傅又話,出年嘅情況,會係一大嚿錢嚟一大嚿錢走,「熱錢係有史以來咁犀利,震盪亦係有史以來咁犀利!」 咁即係有幾震盪呢?「出年係容易有個大升,會升到你唔信……有 3個好關鍵嘅月份,農曆 3、 5、 9月,而最高位可能喺 5月出現!」特別之處,係出年極有可能股樓同步,「今次未必股市行先,大家一齊調整都唔出奇!」

   
該文的圖片說明又這樣寫著:高盛之前唱好港股,話十二個月睇二萬九,楊天命就話:「唔使咁慢,出年三月都二萬八啦!」 

    哈,今年3月已過,港股2萬8未見。「會升到你唔信」「3個好關鍵嘅月份,農曆 3、 5、 9月,而最高位可能喺 5月出現!」農曆5月,不論是計陰曆定計節氣,正是依家,看來楊大師又算錯了。至於「今次未必股市行先,大家一齊調整都唔出奇!」 對不起,今次股市肯定行到好先,而且在農曆5月開始跌到一仆一碌。7月1日已是陰曆六月初一,以節氣計,7月6日是農曆5月最後一天。這幾天冇市,咁即係如果下星期一二三(7月4,5,6日)恆指唔升番千零兩千點,楊大師成棚牙肯定被自己刨晒矣!

    筆者唔係針對楊大師,因一直不同意玄學家出來預測股市的,尤其是講到好細節嗰種,大哥呀,實中架,唔中點算呀!故一直認楊大師這種作風不理性!筆者在這方面的立場一向沒有改變,很多年前筆者已這樣寫過:「人總是人,極其量只是『半仙』,總有預測錯誤的一天。且外間愈信你,錯了時所作的孽也愈大。現今的股票市場幾乎已等如賭場,累人傾家蕩產,日後如何面對自己、面對人家?」然乎,不然乎?

    (**補充:7月1日放假在家清理物品時,忽然一本#388卷的《東周刊》出現眼前(出版日期是2011年2月2日),封面的標題《3大玄學家批香港兔年運程》引起了筆者的注意。翻閱內文,該3大玄學家竟也包括楊大師在內,而文中引述他對股市樓市的看法,竟又與上文引述(2010年11月22日《 蘋果日報》財經版)的有異。

    玆抄錄如下:「楊天命推算:『香港股市在新曆五月六日後會大升大跌,恆生指數一天上落高達六百至八百點,隨後的五月三十一日至七月十二日,外來資金將大舉撤走,股市急瀉,許多股民損手,資金被綁死。』他預測樓市形勢亦同樣惡劣,『新曆四月三日至五月七日,樓市將出現反覆大調整,且違反經濟規律,不是股先跌再到樓跌,而是樓市首先崩圍。』」

    筆者引述楊大師這段文字,不是要說他是否估對了股市樓市,而是他先後兩次對今年上半年股市樓市的表現,竟有迥異的看法。是今日的我打倒昨日的我嗎?咁,2011年2月2日後,楊大師又曾否在相同或不同媒體,發表了又不同的看法呢?**)

 

王喜現身《大凶兆》發表玄學角度

    上卷在此欄已提及兩單世界末日或大災難的流料預言,但世人似乎仍對2012年12月世界末日之說很感興趣,無線電視翡翠台於6月初起乘時推出的資訊、訪談節目《大凶兆》(共11集),頭三集加長版即以「2012末日天機」為題,邀請了很多嘉賓出席探討。節目播出後,坊間一般意見是太多基督教人士出席了,好似睇緊創世電視咁

    其實頭一集亦有「玄學角度」的,但發表此角度者竟是電視藝員王喜。關王喜乜事?筆者初時也很奇怪,後來才記起此君曾說過日後會以給人看風水為副業。哦,明晒,但觀乎他在節目中的發言很有附會氣味,看來他還得好好、好好學習!當然,亦可能是他講了很多,但被cut得支離破碎吧!此外,當朱欣都有份出席講世界末日,由一向勇於發言的王喜來說話,又有何不可呢?始終都是以娛樂為主嘛!

西洋神棍群集法國小村莊想吃大茶飯

    相對來說,絕大部份香港人對201212月世界末日之說,仍是較理性的,西方的情況卻又有點不同。法國政府異端教派監察機構於6月中曾發警告,網上傳言能逃過201212月世界末日的法國西南部村莊Bugarach 已有美國異端教派設據點,其他「宗教大師」及組織亦紛紛在當地酒店舉辦收費講座!

    嗚呼哀哉!看來又有大批西洋神棍想食大茶飯了!

美國太空總署發出緊急防災避險警告

    唔知係末日之說太深入民心,定係真係有些災難被預測將會發生,6月11日,「美國國家航空暨太空總署」(NASA)對其部門及家屬人等發出電郵,並在其網站上載短片,提出緊急警告。請看以下連結:

    http://www.nasa.gov/centers/hq/emergency/personalPreparedness/index.html

    在短片中,負責官員呼籲在美國本土各地居住的美國人,為自然災難或來自外部的力量作好準備。又說在未來三個月,要提防意外事件發生,包括太陽磁暴,以及突變的天氣。呼籲儘快計劃求生計劃,準備一切求生安全工具,準備足夠食水及食物,以及保存藥物及急救工具。

    亦有人將此段短片配上中文字幕,上載Youtube,有興趣者不妨看看:

    http://www.tudou.com/programs/view/ZvWqSOPRDW8/

又一嚇怕學生的術數師傅

    自上卷本欄的「聽說有個"專業風水顧問"的風水收費」出街後,筆者又聽到有關此師傅的傳奇事蹟,包括年年生日要徒弟學生花錢豪吃一番,送上名貴禮物不在講,還要逐一親自夾餸給他以表孝心。

    原來此不是個別現象,據聞某師傅在行家處開班後不久後拉整班學生過檔在外邊教,這是經常有的現象,無乜特別。但嗰位師傅可能要突顯身價,開始擺老師款。適值年尾,他在班上叫齊班學生課後一起吃團年飯。課後他叮囑學生先往點菜,自己隨後到,但他到達後當知道點了甚麼菜式時,竟勃然大怒,破口大罵道冇鮑參翅肚點叫團年飯,今次唔食啦,下次再食過。成班學生呆晒,個個面面相覷,唔識點反應。

    結果有冇再食團年飯,唔知,但據聞嗰班學生不久後,就……自動消失晒勒!

    嗰個師傅係邊個?筆者可以知的,但沒有追問,因為人老咗冇乜記性,問咗都唔記得啦,而且香港這行的師傅何其多,邊記得咁多哎!仲有,係邊個師傅唔重要,重要係佢做咗乜囉,結果又係乜囉。對否?

 

對李居明大師編撰粵劇的意見

 

    提醒大家,鄭國強師傅在本卷文章中,對李居明大師搞的粵劇,及振興粵劇的籌躇滿志發表了意見,可讀性高,大家不容錯過。

 

 

駱思嘉電子郵箱:loksika@hotmail.com.hk

 

WB01343_.gif      回首頁     WB01345_.gif