劫印化晉格
好耐冇見經紀陳，講真話、係有少少掛住佢…… 。有時真係日頭唔好話人夜晚切忌講鬼，可能係腦電波效應吧，嗰日晨早諗起佢、條友下晝就蒲頭。咁啱該日又係令全世界跌哂眼鏡之「 狼、豬」鬥凸做王八之大日子。
陪同經紀陳嚟嘅係一位約莫五六十歲紳士型男仕，形容佢紳士型、係行為舉止予人一種誠信穩重而值得信任感覺、並且散發出一種中年男人才有嘅魅力。經經紀陳介紹過，知道老人家姓段（虛構），廣東梅縣人，旅居歐洲多年、經營的生意大多數和國內軍方有關係。段先生舉止一如其貌、落落大方……彼此寒喧過坐低之後就打開了話匣。原來段先生係官貴子弟，「段爺，你點睇今次特區選舉？」經紀陳首先發問，喱個時候正係點票時刻。「唔使睇喇，梁振英贏硬！」段先生禮貌之中用堅定語氣答道。我聞後心諗，來者肯定唔係等閒之人。「段先生，有人話國內權爭已經殺到香港……」我試探性發問，誰知我仲未將話說完、對方即刻爽人快語答道：「江系網絡一日不拆除，中國內憂外患一日未能消除！」我聞後不禁連連點頭，因為英雄所見略同。「段爺今日到來係有事請教」經紀陳矇起了豆豉眼神神秘秘地笑着對我說：「段老係慕名而來……想你參詳一下八字、斗數」。
開出八字端詳之後證實所作猜測也偏差不了多少，係大富大命格，風度、言談、舉止……命與相極之配合。
庚 癸 乙 壬 乾造「印化晉格」
申 丑 巳 辰
81 71 61
癸 壬 辛
丑 子 亥
本命五行屬水，是雨露水，夏令四月喜水調和炎熱氣候；兼蓄水強。
更宜強金生水作來源。庚壬兩透，制火潤土而有根源，名稱之：劫印
化晉格（癸水弱極之時得壬庚劫印並透，係絕處逢生「火地晉」卦，大富大貴）。命能旺父母益兄弟。得用父母財，妻賢子孝，享受祖業。
於是笑語段先生：「喱條命係萬中無一嘅（劫印化晉格），等同風水名局（七星打劫到南離）」，我繼續講落去……試瞄了段君一眼，但見佢氣定神閑、無驚無喜：「喱個格勝在八個字着咗六七個團結一致，字字好唔得閑……做乜？咪劫提綱父母財囉！丙火當令、取之不盡。時柱庚申生水也源源不絕。」
段君聽後微笑點頭答道：「托賴啦！祖輩革滿清命，父親革老蔣命…… 算得革命世家，到了我這一代、仍然要革命，跟隨鄧老爺子改革路線走、現在着手政制改革……。另一樣值得安慰嘅，係結婚多年，夫妻之間相敬如賓並無多兩句，講到事業大家均專注於工作，子女都出身矣！全部在國內工作。我自己為國家營商，呵呵！無比滿足，內子從事藝術工作也有一定成績……」講到喱戍佢輕輕嘆息了一下：「最近有兩件事令我心煩，第一係老頭子最近身體一日不如一日，第二係我想淡出生意，但上頭不批准。至於第三件卻係喜事，事關大……心抱有了喜，我想擇日子為佢剖腹，咁當然要大師幫手囉！」。
佢說話時我一直凝神靜聽，並且嚴肅地注視命盤。聽到這裡時不禁點頭微笑、回道：「你斗數係紫貪守命卯酉，會照殺破狼祿科權忌、特別武曲化忌，劍膽琴心，肯定從事事業係一等一偏鋒，至於人緣卻是左右逢源、猶其頗得女人歡心……結合八字時柱庚申，後臺照住你嘅正是一人之下萬人之上。11歲後早行火鄉、少年入財地，自然家肥屋潤，旺家旺父卻剋老媽……」段君聽到喱戍、默默沉思，我睇唔多對路、立刻時呢洒哪跳過說話：「36歲後進金鄉，名利去到高峰、官也越來越做得大，唯獨三刑逢沖入妻宮，自然中年入花叢……」，段君略加思索、微笑答道：「唉！慚愧……」，喱個時候經紀陳不斷向我打眼色，我知又係講多咗，於是乎再將說話繞開：「段兄現在行亥子丑北方運，運走劫財鄉首先不利父系人口，跟住老婆和家人，甚至……」，「女朋友嘛，哈哈，現在她的而且確有咗身孕……」
我聽後先呆咗一刻，望過去經紀陳卻見佢微徵咀笑，內心明白了：「段兄，我有個提議，六十甲子一個小循環八字大同小異，你不妨揀個和你差不多日子畀…… 咁咪得囉！」，段君和經紀陳聞後不約而同：「係喎！」於是乎坐言起行打開電腦，仔細為段君個孫…… （寫錯，係仔至啱）揀生育日子。 (本篇完)
