五黃入中火燒南離，天災人禍不利投機
水蛇嬉春報祥瑞，富泰康寧應新歲，
豐饒盛景全年旺，萬事勝意歡樂隨。
誠祝各位讀者新歲進步，事事順景，康泰全年。
年初五嗰日，約咗偉哥和經紀陳去報社拜年。偉哥提議買紥花代替糖菓，上去攞個意頭，畀我哋否決咗才作罷！
每次去親探佢報社都要響Security reception攪一大輪至入得去、煩到死……。到步之後我哋三人腳步輕輕行到不哥辦公室旁，聽到裏頭傳出歌聲、口技聲、嘆氣聲……十足播音室：「相思欲寄無從寄，畫個圈兒替；畫在圈兒外，心在圈兒裏。我密密加圈，你須密密知濃意；單圈兒是我，雙圈兒是你；整個圈兒是團圓，破圈兒是離別；還有那說不盡的相思，把一路圈兒圈到底……」，我本來還想聽下去探究竟，但偉哥早已按捺不住，一下子嚷道：「老而不你幾時入咗大圈幫？睇你口口聲聲又圈裹又圈外，就嚟加多個響頸上，豈不是變成笨實加個箍……哈哈！」，失驚無神一輪咀、老而不先怔咗一下，隨即白了偉哥一眼，見到我和經紀陳立刻滿面堆笑，說盡拜年吉利話。
客氣過後我問老而不：「咩事咁感觸？」說話間，正好不哥頭馬大爛財走入嚟，聞言笑道：「老編個舊情人前日ell咗，你睇佢幾傷心！真係多情種……」，老而不強笑道：「新年流流咪講埋喱啲唔吉利嘢……嚟，搲銀！」，我本想問下去，但礙於大節攞意頭、也就點頭附和、支開話題免得偉哥多事：「梁紹壬喱首：〈兩般秋雨庵隨筆〉幾有捉機味道，係咁圈裏圈外，正好寫實咗國內政治和中日美……之間三角關係。至於香港，更加明確道出親疏有別…… 」講到喱戍老而不開始眉飛色舞，咩嘢新相好舊姘頭……通通放埋一便置諸腦後，所以話人只要開心、樂觀，一應傷心煩惱都會踢出圈外。
「吳老不，你又講得冇錯，大圈細圈……你估我諗到乜？」老而不得意着地問我，我答：「嗱！123大家一齊講答案好嘛？」，於是乎大家口噏噏數完123後，我大聲叫：法蘭黑，老而不則提高嗓子：吹波波……二人同聲發話，話音一落，幾個「重量級」人物都會意而開懷大笑。
「喂！大編輯，聽聞你哋今年落重本攪春……」經紀陳本來想恭維贈慶，但說話卻被老而不搶下來：「陳腥，攪乜春呀，春茗？哈哈！何止，仲舞獅舞龍、人人都傷風大利市添！想唔想知咩嘢事？嗱！大爛財，批准你話畀佢哋知！」隨着說話朝大爛財藐咗下咀。本來口沒遮欄嘅財哥鵪春咁企響旁邊好冇癮，忽然有開腔機會自然整色整水：「公司第一投資贃大錢，第二換咗新總裁，第三老細娶心抱，第四老細又添丁……」話未說完、經紀陳已經打叉搶咪：「喂！你哋事頭婆我舊年12月至見過，邊有中大附小呀？仲有，佢五張過外咯喎、生瘤呀？！」
老而不等佢說完、他他條條咁出言相窒：「哈！反你底、客家佬，幾拾年都冇變！家陣生仔要靠原配咩！還有呀，女人只要未收經、一百歲都有得生！」，我見老而不一輪咀搶白、攪到客家陳面紅面綠，於是幫話打完場：「人家點知你老細咁威喎！還以為同你差不多……」老而不聽後做了個不文手勢……大家細眉細眼咁相對而笑。
「對上哪個蛇年，由於七運尾聲出現靈蛇效應，所謂邪惡軸心靈蛇出洞噬白虎，點知一噬噬出禍，兩場戰爭使白虎遍體鱗傷，歐美睇怕仲要衰多十年先至掂！」我感觸而言，那廂經紀陳更加感到不安：「老吳，早排你咪寫過：中氣現已交入春分正月廿四驚蟄，乙木進氣、甲木當令。甲乙主風、主肝風動，容易傷肺經感冒、骨痛，風入脾土更傷脾胃、易惹腸胃性感冒……太陽太陰俱化忌，陰陽怪氣小心投機，木亂剋金，水多金沉！天災以木亂為樞紐、木亂剋土地震為主，颶風、洪水再為次……。嗱！新正頭太陽化忌，日元大跌，股市掉頭……咁，交咗驚蟄之後又加何！？」，「太陽忌完到太陰忌，即係個老公風流完、將啲病傳染畀老婆一樣……」老而不話還未說完，偉哥已經忍唔住指着佢笑罵：「死老而不，咁多嘢好比喻唔講、偏攞喱啲嘢講笑……」，「偉哥，新年流流咪死死聲！我冇講錯，兩儀即係乾坤、寒熱、晝夜……。
寒熱根本就係人生存世上嘅要素，太陽化忌則太陰滋長寒佔上風，於是乎日本婆娘趁日元貶值而借錢生息。好喇！驚蟄之後太陽唔忌輪到太陰忌。咁樣一嚟，日本婆肯定仆哂街。偉哥，你話我嘅比喻有邊戍錯？」偉哥畀佢duck到一面屁，為之語塞。聽到呢戍經紀陳似有領悟：「太陰化忌，澳紐不利！皆因佢哋通通係月亮旗……」，我笑語經紀陳：「哈哈！唔怪得科學家研究過、話客家佬啲精蟲特別壯……陳生就係人版。陳生，仲有係年內五黃入中宮，啦住正南火地，災難特別多並且單單大鑊。」我繼續說話：「八運前十年土寒夾雜兌金，香港經濟命脈掌握在地產鉅子手上，隻手遮天。西方，港官、再勾結國內貪腐……十年間所掠奪財富比起七運時有過之而無不及。九運火司權，火暖生土調候將金全盤拔起。純火純土簡單不雜，投機成份不濃厚。至於甲級地產商誓必受清算！」 (本篇完)
