羊刃駕殺劫後顯赫
認識女強人多年，老實話睇佢命多過睇自己……。
（坤造）庚金命生初春正月，五行用陽光調候然而卻火會局剋金，天干雙壬透出雖能制火唯獨春金體弱懼寒不能勝用，勉強用也用得痛苦。喜時透戊土得洩火氣兼且防水生寒，雖則懼戊土埋金，之不過救起命上嚟冇得選擇而矣！獨嫌四柱欠強金幫身。經歷過委曲求全火土鄉廿年之後現在正進入羊刃架殺酉金高峰運勢……。
其五行最令我佩服的地方係結構上發揮了人生循序漸進自強不息精神，八個字之中字字有用而無一得閒，因時制宜，能屈能伸……如果要形容她命似乜誰的話，喻之似「亂世佳人」主人翁也相當貼切。
2000年認識佢之初已再三叮囑其工作一離不開供職西方人機構，二非金融投機職業勿沾手。如是者十多年來睇住佢由普通留學生因加入外資機構打滾而飈陞晉身女強人行列。
今年初例行睇「榴槤」之際但見佢雙眉緊鎖一副（水山蹇）模樣，知道一定發生不尋常事情，事關過往行火土運咁多年如何劣境都冇見過佢如此這般……。
「師傅，你又話我轉入酉運之後羊刃駕殺、威鎮邊疆嘅？點解乙未年至今頭頭碰著黑，公司樣樣唔掂唯獨瓣瓣都要我管埋……話我冇出色都好，寧願行番火土運；雖則畀人包起，但有樓有車……唔似得家陣咁苦！」強人熟客慟容呻道。我聽後瞇咗佢一眼道：「靚女，你知乜叫羊刃駕殺、威鎮邊疆呀？即係拜將出征，打生打死呀！意思係話你家陣運程要經歷死過番生先至有好日子過……。」強人熟客聞言先是顯得激動無奈，惟瞬息間即流露出一絲堅毅神釆回道：「多謝師傅解我年多以來困惑，我不怕苦而係怕苦無出路，我期待已久正是你呢番説話。」(本篇完)
