丙辛合申金助化水
(一)
娃娃女強人最近甩拖而傷心欲絕，經過多日箍煲失敗之後，耐不住單思之苦，於是喊苦喊忽咁嚟搵我。睇佢梨花帶雨嬌俏樣子﹔情不自禁地望多一二眼先至睇命……哈哈！
娃娃不過廿八，供職於外資證券行。辛未日柱生三月，全盤土厚埋鐵。獨喜時柱丁酉，丁火獨殺為權，酉刃駕殺為尊。今年丙申歲干丙火合辛金，年支申金助化水。於是對佢講：「羊刃駕殺用酉金而獨殺為權火出干，丁火坐酉永不滅，酉刃強身如鋼鐵，今年官來合身肩黨劫。年尾結婚明年生仔……驚嫁唔出？烚戇！」
(二)
寫寫下忽然勾起我一則記憶，差不多同時日子也有位靚女到來問前程。印象深刻係靚女亦是辛金命﹔辛巳日柱，天干透三甲地支會南方局而從殺，家陣三十過外入火鄉先結婚復旺夫事業而自己工作運也不差！只不過既從殺旺夫同時間也旺別的男人，是以告誡她小心婚外情之煩惱……誰不知佢目前處境正是如此，兼且煩完一單又一單。最大鑊係今年丙申歲干合辛而歲支助化水，金生水即子息惟剋火……告之年內婚外情會換畫，也有機會刑剋男家、夫家人口，自己則秋後有身孕……至於（授精）來源則要執生矣！(本篇完)
